佔中基金缺水，戴耀廷（右）要出力籌款，佢同譚蕙芸（左）合寫咗本「對話 X佔領」，大談社會各界點睇佔中，暫定捐二百蚊有書送！（王偉洪攝） 

八卦陣

佔中缺水　戴耀廷賣書贖身

佔領中環第一個商討日使咗廿幾萬，但佔中三子之一嘅戴耀廷話，暫時捐款額少過十萬，搞到依家仲爭緊香港大學錢，「佔中基金」嚴重缺水，唯有靠七一遊行籌款。嚟緊佢亦會出兩本有關佔中嘅書，將佢喺報紙寫嘅文章同埋對談系列訪問結集，由余若薇對佔中謹慎嘅取態，到李慧琼同施永青大潑冷水，甚至黃之鋒鬧佢立場模稜兩可，都一一輯錄，呢本佔中前傳都咪話唔堅。

負責筆錄嘅中大新聞及傳播學院講師譚蕙芸喺後記仲有料爆，原來最初戴耀廷拉朱耀明同陳健民落水搞佔中，事前冇同過對方單聲，到訪問出咗街，二人先知道被「擺上枱」，不過既然大家方向一致，三個人埋堆就成事。戴耀廷好老實咁話，最初冇諗過搞佔中會咁忙，「嗰時真係唔知死！」
兩本佔中書暫未公開發售，戴耀廷話暫定捐款二百蚊可以送一本書，五百蚊就有齊兩本，至於會唔會喺七一遊行時擺書喺街站籌款，就視乎印刷商印唔印得切書喇。依家三子唔單只忙緊商討日，仲會成立籌款小組向名人揼心口籌錢，戴耀廷話會諗吓搵男拔師弟杜汶澤幫手添，睇嚟佢又係冇事先同杜生單聲啦！
戴耀廷構思中嘅第二次商討日，會同不同政黨同民間團體合作，一齊搞一系列約廿次小型商討日，每次數十至一百人。早前佢同民主黨中委開過會傾 D day 2。據知戴耀廷已約實公民黨、工黨同民協，亦都係傾 D day 2嘅安排。
佔中之後，戴耀廷會唔會出書探討佔中心路歷程呢？佢答︰「我諗到時嗰本叫做《獄中書簡》先得喇！」

佔中遊戲　抽中淨心要扣分

新民主同盟話過要出一套「佔中無雙」紙牌遊戲，依家終於搞掂，好快有得賣。呢款遊戲幾個人一齊玩又得，自己一個玩都得喎。遊戲入面會有一個民意支持度分數，抽到泛民人物牌，例如戴耀廷或者陳健民就會加分，砌到同花順咁出仲有額外分數添！相反，抽到建制派人物講嘢嘅事件牌，例如梁振英、曾偉雄或者陳淨心咁，就會被扣分喇。遊戲完結之後，睇吓個分就知可唔可以成功爭取普選，即使唔得都唔緊要，因為個遊戲最主要都係推廣佔中。
驚唔驚個遊戲俾人話標籤同醜化建制派人物？有份設計嘅范國威話啲牌都係引用呢啲人物之前嘅公開言論，因為佢哋對普選同佔中有破壞力，所以一出就要減分。遊戲咭暫時印咗一千套，為咗減低成本都要拎上大陸印，最快星期六可以攞貨。如果一切順利，會首先擺上 Facebook俾人訂購，七一當日亦會拎出嚟賣，部分收入撥捐俾佔領中環。

玩家抽到呢啲牌即刻扣分，皆因為佢哋對佔中有破壞力，真係冇人想見到佢哋！ 



范國威呢排好忙，又要反對擴建將軍澳堆填區，又要趕製佔中遊戲。（曾春南攝） 

蘇錦樑自彈自唱籌百萬

雖然建制派成日身光頸靚，但佢哋從來唔認係大陸泵水，聲稱係靠籌款同捐助。「愛港力」疑似金主新界社團聯會，上週四晚喺荃灣如心酒店設宴「籌款」，請到梁振英同埋中聯辦副主任王志民上台主禮兼唱《中國夢》，話要實現國家主席習近平提出嘅「中國夢」口號，結果係點？成班記者以為去咗六四集會囉。
由商務及經濟發展局局長蘇錦樑自彈自唱廣東話版嘅《愛拼才會贏》，加埋政助陳百里同「橄欖仔」陳鑑林之子陳俊傑伴奏，呢個環節冇乜驚喜都籌到一百零一萬，真係好俾面。民建聯主席譚耀宗單拖用粵曲腔唱《大地恩情》，臨尾嗌歌兼走音，真係好驚嚇，但都籌到八十二萬。新社聯全晚進賬二百萬，咁究竟足唔足夠養起三百幾個屬會呢？真係得佢哋先知喇！

蘇錦樑（黃圈者）喺台上自彈自唱，雖然冇乜驚喜，但起碼冇走音，台下反應已經好熱烈，最終幫新社聯籌到逾一百萬。（鄭樹清攝）