探熱針
港姐走鬼潮 栢芝奶媽 林芷嘉 縮沙
應屆候選香港小姐早前進入第二輪面試，入圍名單未正式公布，但一班大熱佳麗已被連環起底，結果引起連環縮沙！繼「大眼超蓮」徐豔薇以私人理由退出，被指小三的「翻版徐若瑄」劉燕妮 Rika，受不起是非糾纏退選；被指變臉、僭建以及有富貴男友撐腰入硬三甲的「栢芝奶媽」林芷嘉，亦因壓力爆煲，在屋企人力勸下決定唔玩。
唔鬥靚，但翻版徐若瑄原來早已搭上已婚娛樂公司老闆，升呢開食肆；而栢芝奶媽亦憑導彈身材，被電影公司睇中，隨時跳班入行。
連累屋企人
現年二十六歲的「栢芝奶媽」林芷嘉，第一輪面試後即是非纏身，跟苗僑偉親密照流出外，又被匿名 e-mail向報館爆料，指她是「撩仔部」又拜金，還有個跟樂易玲相熟的富貴男友在背後發功，攞硬獎！
事後栢芝奶媽逐點否認，並堅持保持真我，不會刪除 facebook戶口。把口夠硬，栢芝奶媽口講不會將傳聞放上心，但是非牽涉拖埋家人落水，一樣壓力爆煲。
「佢爹哋開模型飛機廠，媽咪就做半寶石生意，喺紅磡有寫字樓， Karen（林芷嘉）啲新聞喺內地同新加坡都有轉載，佢父母好多生意上嘅朋友睇到，都有打電話問佢哋，至於話佢黐富貴男友，其實個男仔只係打工，仲要兩個分咗手好耐。個女俾人寫到咁搞到兩老好唔開心，唔想屋企人面對呢啲嘢， Karen先決定退選。」知情者說。
其實栢芝奶媽有不少娛圈朋友，包括潮媽徐濠縈，是她在英國讀大學時在網上賣古董 Chanel而認識。
「佢同圈中人係有來往，好多 party都會去，肥 Wil（錢國偉）都有叫佢拍《喜愛夜蒲 3》，但 Karen仲諗緊接唔接，另外亦有唔少經理人公司想簽佢，如果要入行， Karen肯定快過選港姐。」
栢芝奶媽在活動上見到苗僑偉，即埋身影合照。 
栢芝奶媽放在 facebook的相不缺三點式晒導彈胸，她亦坦言不介意公諸同好。 
栢芝奶媽做賣古董 Chanel袋生意，自己更做埋 model示範，好識搵錢。
搭上公司老細
另一個走鬼港姐「翻版徐若瑄」劉燕妮（ Rika），更加快人一步，理想達到！據了解，被指姣溝已婚空少做小三的她，原來已轉移目標，搭上亞洲星光娛樂公司老闆 Vincent，剛過去的週日， Vincent的愛駒「抱抱小子」出賽，也是拖住 Rika拉頭馬，反而正印老婆無出現。
在屋邨長大的 Rika，自從搭上五十歲的 Vincent後，即一身名牌升呢住半山豪宅。「 Rika經李璨琛介紹認識 Vincent，知道對方有錢，就即刻 mark實，有水喉射住，佢覺得連選港姐都嘥時間，索性放棄唔玩。最初身邊班朋友以為 Vincent會捧佢入娛樂圈，點知 Rika淨係要做少奶奶，叫 Vincent打本開食肆俾佢掛名做老闆娘，自己就專心陪玩。」 Rika身邊人說。
李璨琛介紹認識 Vincent後， Rika即退選，有足夠時間全程 mark老細。 
Vincent所開的娛樂公司旗下女子組合 Sparkling Girls，不時都會跟住老闆入馬場。
上週日， Rika跟住老闆入馬場拉頭馬，黐到實。 
飛釘千雪 內定三甲
鞏俐師妹飛釘千雪劉溫馨，畢業中央戲劇學院， 08年曾為北京奧運傳聖火，更被指是內定三甲。
DaDa師妹 Moonie晒股
疑整走鞋抽面的劉佩玥 Moonie，日前又將著內褲露股相放上 Instagram，就算入唔到圍，都已經響晒朵。
港版小雪 嗒港男
表面怕醜的港版小雪 Hazel，原來內裡 open，被指黐港男黃建東，又愛夜場豪放啜仔。
黑色乳牛 搭上陳七
被指整容隆胸的黑色乳牛 Tam，再被爆搭上足球員陳肇麒（陳七），不過陳七現任女友是女子組合 MVG劉雅婷，又係小三。
是非鋪路
以前選港姐重名聲，規行矩步，但今時不同往日，有是非總比被當隱形好，有冇獎其次，反而有朵有話題，機會更多。
張名雅
（ 2012年港姐冠軍）
參選時被傳曾墮胎、整容及專黐明星，後再被揭舅父是張堅庭，負面新聞愈掘愈多，結果還成為三料冠軍港姐。有傳她最近被欽點參加《星夢傳奇》唱歌比賽，被淘汰時因兩度落淚又見報，非常了解有新聞就有機會的道理。
許亦妮
（ 2011年港姐季軍）
選港姐時已是風頭躉，傳過整容生過仔，又不停被人爆料指她拜金專黐富家子，攬仔相日日出爐，甚至傳她欠債十萬等等，毫無形象可言。但她一樣有獎攞、還有機會做主持同拍劇。
徐淑敏
（ 2006年落選港姐）
參選時新聞多多，被指為錢戀上 50歲工程師搞忘年戀，網上亦曾流出疑似裸照，但是非多多一樣被視為大熱門。雖然大熱倒灶，但簽約無綫後機會頗多。飛甩阿叔男友後， 09年奉子成婚嫁商人黃浩，繼續是非多多。
留言列表
