close

社交圈

珠光寶氣

女人買得起牛眼般大的鑽石，當然唔想收收埋埋，先有向太用八千六百萬投得鑽石，開記招公諸同好，再有太子珠寶鐘錶老闆娘戴住十六卡藍寶鑽戒入馬場，事實證明鑽石是用來晒的。

陳嵐　晒命

中國星老闆向太陳嵐心口的全美鑽石吊墜重七十五卡，巴閉到改名叫「中國之星」。上週二她戴埋十八卡鑽戒（圓圖）出現，妙答話︰「有時傻傻哋唔覺意買多咗。」有記者說笑要摸鑽戒，氹到她見牙唔見眼，「平時借你戴，你都唔敢啦。」

楊千嬅　晒腩


調轉件衫著？（真實對白） 

獲頒「太子珠寶鐘錶精英獎」的楊千嬅，沒有闊太的珠光寶氣，但有「豬」腩護身，即使修身能著靚衫，高腰 Loewe裙下還是唧出幸福的車胎。當日手戴護腕的她說抱得 BB多有媽媽手，「而家唔成日抱，囝囝交俾媽媽湊。」

鄧宣宏雁　晒幸福

週日馬場有太子珠寶鐘錶精英盃，老闆娘鄧宣宏雁孖老公鄧鉅明做生招牌，戴了十六卡的藍寶鑽戒，和兩隻共約十二卡重的藍寶耳環，來襯鄭兆良為她訂造的牡丹花裙。她晒珠寶之餘順便晒幸福，「呢套係結婚五周年禮物，啱啱過咗十周年，最緊要一家人身體健康、平安。」

楊如芯　晒眼鏡

唔似傳統女人愛買首飾，趙式芝老婆、波爾錶太子女楊如芯愛追新科技。上週五她借了在美國做 IT的友人副 google glass試玩，眼鏡未正式推出市面， ebay已經熱炒到一萬美元。眼鏡可聲控上網、拍照同拍片，楊如芯試過都話爽，「好得意，眨吓眼就可以影相，好似占士邦咁。」




撰文、攝影：名人組


社交圈

 

久休出籠

 

匿埋咗一段時間的名人若忽然彈出，又確實有份親切感，但要 keep得住昔日風采，咁先至難。

 

馬清偉　急來急走


唔見一排嘅大生地產主席馬清偉，上週三帶同女友 Winnie一齊出席 BALL for BMW最新腕錶發布派對，不過二人逗留了一陣，酒會未正式開始就話要走人，想同佢哋傾番兩嘴都唔得。

 

王馨平　唱出癮


波爾錶活動上，王馨平上台獻唱，更自爆在寶馬工作的叔叔及堂妹都有嚟，搞到佢擔心話：「屋企人睇住有壓力。」已為人妻久休咗一段時間的她唱到癮起，簽了內地經理人公司，豈不是有機會和舊愛鄭嘉穎合作？「無人提出過，無諗過，私下係好朋友，兩個月前食過飯。」

 

孫佳君　自認執樣


孫佳君自去年六月宣布復出，一直 keep住去社交活動，不過塊面一次硬過一次，難得佢出席波爾錶派對時，打扮好似自然咗，佢就唔否認地說：「我試過 botox去皺紋，年紀大整容好正常，唔好太多就得；要拍戲就唔會打，怕拍戲做唔到表情。」

 

馬英九女兒　避鏡


台灣總統馬英九長女馬唯中，上月出席一個藝術活動初見傳媒，影相時頭耷耷避鏡，之後佢同老公一直沒在公開場合蒲頭，直至上週四才恰巧撞正佢搭的士在灣仔落車。難得 ball場有新血，唔知佢幾時先肯再出嚟？

 

吳綺莉　後勁不繼


兩年前吳綺莉帶埋小龍女吳卓林回港生活，風頭一時無兩，曾在無綫拍劇，仲去過商台做主持，可惜個勢 keep唔住，依家只在數碼電台做主持。上週四，她出席湘港澳青年美術家作品展，難得佢有主場，習畫的她即場露兩手，清減了的她話：「之前我在上海開過畫展，依家儲緊畫，想兩年後在北京開。」希望靠支畫筆能再次發圍。


撰文、攝影：名人組

arrow
arrow
    全站熱搜

    tvb4life 發表在 痞客邦 留言(0) 人氣()

    E-mail轉寄