cover face
黃德斌“我想做主角”
嚴格來說，黃德斌都算潮界前輩。他做過潮店售貨員、模特兒，甚至服裝指導助理，刻下，賣緊潮衫，對美感應有一定認知程度。
我話《金枝慾孽貳》後宮中，屋爛、色又齋、衫唔靚，堂堂如妃睇場大戲所享用的食物，差點以為拜神用剩！
他臉色一沉，「你睇吓啲國畫，畫皇宮都係素色。
「今次，平實但富文藝色彩，突出後宮寂寞。」
一副導讀上身，指引迷途觀眾；「上集故事於冬天發生，衣衫有刺繡，係會靚啲。」
最後，他更以《天與地》老話作結，「都係想俾大家多啲選擇。」
他的「戚其義鐵膽」身份真係堅過塊鐵。
依他所言，即係就算神劇班底親自出馬，閣下都唔一定要 buy，這等於茶餐廳整得好味與否，純屬個人口味，我都慶幸有得揀，弊在，餐廳得一間，咁至最得人驚，一心恨坐正做主角的黃生，又明唔明？
Profile
Kenny Wong
出生日期： 1963年 4月 30日（金牛座）
出生地：香港
身高： 5呎 11吋
體重： 175磅
語言：普通話、廣東話及英語。
簡歷： 88年，投考第 14期無綫電視藝員訓練班。 92年，與陳寶蓮拍三級片當男主角。 06年，憑《火舞黃沙》獲得「最佳男配角獎」。 12年，與林保怡和陳豪合唱《天與地》主題曲《年少無知》，獲得叱咤樂壇流行榜頒獎典禮「我最喜愛的歌曲大獎」。
主要作品：電視劇《真情》（ 95）、《金枝慾孽》（ 04）、《火舞黃沙》（ 06）、《珠光寶氣》（ 08）、《天與地》（ 11）、《心戰》、《天梯》（ 12）、《金枝慾孽貳》（ 13）。電影《聊齋三之燈草和尚》（ 92）、《 C+偵探》（ 07）、《風雲 2》（ 08）、《 Laughing Gor之變節》（ 09）、《志明與春嬌》（ 10）。
微博： http://weibo.com/u/2522881284 
做戲搵錢
黃德斌說，《天》和《金貳》兩套劇均走非大眾路線，收視差「預咗」。如此先知，所以我諗，不苟言笑，棱角面貌，並非典型開麥拉面孔的他，入娛圈做明星，大抵都一樣「預咗」難突圍吧！
「路線冇得預設，以前，以為自己靚仔，點知入到 TVB，大把人靚過你，結果，行出嚟嘅路就唔同。」
當過男模，更拍過情慾片，對手是當時又靚又後生的陳寶蓮，照理唔會太難受，拍心口上，點都好過死守壽命短過螻蟻的男模，「 Model唔長遠，新 agency不斷湧現，我接到嘅騷又少……」若再嫌三嫌四吊高嚟賣，怕且連這一點點機會都冇埋。
這是他所謂「煮到嚟就食」的人生態度。
當年，好友林俊賢（ 90年代無綫小生）將「 TVB訓練班招生」這碟餸遞給他，黃德斌便成了電視演員。「做演員搵多啲錢，做到七十歲仲有得做。」一副朝不保夕的心態，話晒當家中生，怎不教人心酸？
也難怪，黃家出身草根，父親為警員，收入不多，撐起一家，做仔嘅一早搬開住，靠做 sales月入六、七千蚊自力更生。然而，入行後，一直跑龍套，未獲重任，明星夢並非想像中咁好發。「第一套劇有角色有對白， 88年添哥（李添勝）《阿德也瘋狂》，我做周星馳嘅壞朋友，已經開心到不得了。
「但添哥一直冇再用我，直至《天梯》。」《阿》劇拍罷五年後，公司更以一句「多謝合作」完結雙方合約，長期飯票頓失。
00年再返 TVB，重操故業當兼職模特兒，「點都要賺外快生活。」 
06年奪最佳男配角，前途並未光明，「拎完人人都話得，之後咪又係冇嘢做。」 
12年與女友感情要好，「我唔識浪漫，好彩佢都 OK。」
阿戚幫我
路是人走出來的。為生活，黃德斌棄視從影，聽落幾好，點知拍完三級片，依然寂寂無名，於是，連幕後服裝指導助理都撈埋。
「嚴格來講，我只係服裝指導助手嘅助手啫！工作就係於指定時間之內走勻各大出租戲服倉搵衫，全港所有有布賣嘅地方都要去埋，搵晒材料返嚟等大家揀……
「我點會有機會見到阿叔（張叔平）。」
他入行時，正值電影低潮，冇乜工開，連撈散工也少，眼見銀行存摺數字驟減，唔係辦法。「做幕後，開始得太遲，我性格太收埋，唔主動，只係了解愈多，對呢行興趣愈大，惟有的起心肝改變自己。」最大改變，就係埋 TVB前金牌監製戚其義的堆。
97年回巢，捱到 04年，終有機會接到戚監製的《金枝慾孽》和《火舞黃沙》。「佢唔止幫我，仲好信任及熟悉我，其他監製只憑印象分派角色俾我，咪做嚟做去都係賊。」
工作上，二人密不可分，私底下，亦算有緣。「我哋住埋同一棟村屋，日日見面食飯，佢知我鍾意音樂，叫我整啲歌嚟聽攞靈感，好似《天》、《火》拍攝前，我都整定一大堆 soundtrack俾佢！」
朝中有人好辦事，但隨着阿戚離開 TVB，我戥他擔心，豈不是又要重新捱過？早前，公司安排這個年屆 50歲嘅男人去撒哈拉沙漠狂奔，這到底是福？還是禍？
「呢行好被動……公司叫到，點可以唔做呢？」聽得出語氣帶點無奈。
時裝難做
Kenny Wong橙色薄針織上衣$7,800湖水藍斜布褲$5,200both Salvatore Ferragamo
經歷過冇工開的日子，黃德斌已學精，事業上，分散投資，「總要搵啲嘢做。」年多前，與女友 Joyce齊齊做回老本行——開時裝店。
「時裝最難做，鋪租隨時加你十萬八萬，係咁好賺，就唔使咁快大減價啦！」滿嘴散戶口吻，乘機狂呻。 90年代，他也曾在沙田新城市廣場開鞋店，賺過兩年錢。「當時，我會飛去法國睇騷，入 Dr. Martens及 Kickers等靚鞋，只係敵不過加租執笠。」
前車可鑑，現在，打本給女友開鋪，選址尖沙咀街鋪，決不再揀商場。
「商場一落閘，乜都做唔到，街鋪仲有得博，有乜唔掂，轉開廿四小時賣魚蛋都可賺番個和。」數口幾精。
只是，租金之外，還有另一件事令佢頭痛。「請人難！
「依家，年青人已唔同，即使我講到明，每月唔遲到，就有一千蚊獎勵，個 sales第二朝繼續唔知醒，又嫌人工少，叫佢執吓嘢打理吓店面，好似叫佢去死……
「我以前做 boutique，冇客時，自動自覺執拾鋪頭。」管家姿態，跟「唔識埋堆」的深沉形象相差甚遠。
之不過，事業正上軌道，跟女友感情穩定，很有苦盡甘來的感覺，那麼，尚欠的一紙婚書，甚麼時候簽埋呢？
「未定！生小朋友更加唔會諗；「我細個環境太差，唔想下一代重蹈我嘅困境。」眉頭深鎖，這個樣子，很熟悉，原來，並非裝出來的，是日子有功。
Kenny's tips
Q：最愛時裝牌子？
A： COMME des GARÇONS，年年款式咁上下，只係個 patch左右搬來搬去，唔會著一季就 out，值得投資。
Q：點保持 30吋腰？
A：飲食最重要。少食多餐，每餐七成飽就收手，肥膩唔好掂，仲要少飯，但可少少油。
後記
Kenny Wong灰併黃色西裝外套$22,500灰色斜布褲$5,200灰黃色併皮波鞋$4,900all Salvatore Ferragamo
我問黃德斌，已年屆五十，甘心永遠做綠葉嗎？
「邊個唔想做主角？（曾經有男藝人話我聽最想做許紹雄。）你信？唔係話許紹雄同吳孟達唔好……但我坦白，我想做主角！」
大抵有黎耀祥人辦在前，個個都希望「綠葉變視帝」的奇蹟再出現。
有夢想，有幹勁。祝您好運！
Salvatore Ferragamo金鐘太古廣場 303號鋪 2845 2718
The Swank中環置地廣場 B51-54號鋪 2810 0769
撰文：黃鑑江
形象：黃健華
攝影： Gary Lau
化妝： Jan Chan@Annie G.Chan
髮型： Ice Leong@ii Hair Nail
留言列表
