壹週刊手機保守黨－818 娛樂八掛大放送★

近日手機界大熱話題，離不開上個月尾推出的Samsung GALAXY S III（http://www.samsung.com/global/galaxys3/），硬件規格頂班，功能又強又豐富，開價$5,598都大把人排隊買，可惜現在買機要哽埋豬頭骨配件，搞到好多用家有怨言。
雖然smartphone市道暢旺，不過，身邊總發現到有朋友仲用緊傳統手機，更堅稱手機毋須有額外function，打得出接聽到電話就夠，smartphone就算有幾方便好玩，都「睇唔上眼」。

終極慳妹
Celia　26歲社工
使用手機：Nokia 6288（http://www.nokia.com/hk-zh/）
機齡：6年

香港人成日話要緊縮開支儲錢買樓，但慳到好似Celia一樣，都幾難搵。見面當日，她足足遲了半個鐘先現身，原來去了排街症睇感冒，「睇街症四十幾蚊就有五日藥，但私家醫生收二百先得兩日藥，而且隨時要覆診，睇兩次已經是十倍價錢呀！」
真難想像月薪過兩萬的八十後，睇醫生仲要諗過度過，兼且要同公公婆婆爭位。

圓買樓夢
她說捱慣窮，長年累月養成慳家習慣，不過同父母逼住黃大仙區三百呎公屋，始終不太方便，所以極想買「大屋」，唯有更出力慳錢，「好彩搵到份好工，所以想改善一下父母生活環境。睇過同區五百呎單位，大約賣二百五十萬左右。計盡份糧，扣除俾家用同每月限住使三千蚊，每個月可儲到萬五，五年後大約儲到九十萬，夠俾三成首期上車。」
三千蚊使一個月，當然要慳得就慳，隨身物件用舊了都不會輕易丟掉，例如身上的Nokia手機，就一用六年。堅持不換機，主要為了慳手機月費，「好多朋友換了智能手機，貪可以隨時上網玩Facebook（http://www.facebook.com）同
WhatsApp（http://www.whatsapp.com/），無錯有時見他們玩得好開心，但其實我平時好少上網，每日放工返到屋企，先至會上網（用緊和記寬頻$128月費）同在外國工作的男友傾一陣視像會議；而且搭車返工只需廿分鐘車程，根本無需要趕住上網。」她說寧願用來瞓覺好過，「何況一睇手機上網plan，嘩！要二、三百蚊！比起而家$38月費相差好大。」她說幸好工作上跟進的個案都來自綜援家庭，湊case不用靠WhatsApp聯絡，否則可能都要換智能手機。

慳到無朋友
話雖如此，Celia承認人人轉用智能手機，無形中亦感到有壓力，「起碼話題少了好多，記得有次同枱食飯，班friend用手機上Facebook，我就無得玩無聲出，仲俾人笑我cheap，都幾尷尬。但諗番轉頭，將來我買到樓先，一定羨慕番我。」言罷仲死撐話，雖然錯過了不少朋友用WhatsApp相約的聚會，反而因禍得福，「朋友都知我無智能手機，有心約我會打電話。其實有時約不到仲好，不用去無謂應酬。」

智能手機上得快
雖然仲有人用緊傳統手機，不過睇番全球不同市場調查報告，智能手機明顯已成潮流大勢，甚至有凌駕電腦、數碼相機的功能，一部機走天涯，傳統手機功能單調，用家只會買少見少。

01. 預計今年手機增長率
智能手機仍有四成增長是意料中事，但最估不到，傳統手機仍有5%的市場增長。
資料提供：Gartner（http://www.gartner.com/technology/home.jsp）

02. 手機滲透率
截至2012年2月，美國已有一半人轉用智能手機。
資料提供：Nielsen（http://hk.nielsen.com/site/index.shtml）

03. 上網快收費減
4G LTE推出，速度同收費開始追貼家居寬頻，進一步推動用家流動上網，刺激smartphone銷量。

04. 未來三個月打算買……
反映流動裝置需求愈來愈大。資料提供：Nielsen

05. 屋企照用
三成智能手機用家返到屋企，會繼續用手機上網，電腦都懶開。資料提供：Nielsen

06. 相片來源
2011年手機相片佔全球互聯網上載相片27%，比去年上升10%；數碼相機佔44%，比去年下跌8%。
（*其餘為以webcam或無法辨認用哪種裝置拍攝的影像）
資料來源：NPD （https://www.npd.com/）

手機影相太渣
Ivan　28歲銀行貸款部
使用手機：Sony Ericsson K550i （http://zh.wikipedia.org/zh-hk/Sony_Ericsson_K550i）
機齡：5年

「我真是忍不住要彈手機影出來的相。」
比起Celia為慳錢而用傳統手機，同是八十後的Ivan，卻因睇不起智能手機的影相質素，寧願將買智能手機的錢，投資落買相機，「好多人用智能手機影相，目的只為放上Facebook，但我次次翻睇別人相簿都好失望，就算手機個相機像素有八百萬，用手機屏幕睇當然不覺有問題，但一用電腦睇就好散。簡單如淺景深，我用部Sony DSLR-A350 （http://www.sonystyle.com.hk/ss/product/alpha/a350.jsp），配支F2光圈鏡所影出來的效果，手機絕對不及相機自然。」

其實HTC（http://www.htc.com/hk-tc/）新出的
One X（http://www.htc.com/www/smartphones/htc-one-x/）鏡頭都有F2大光圈，不過Ivan就堅稱同一題材用相機影出來，總會比智能手機黨贏得更多Like，「老實講，正因為手機影相太方便，搞到人人對相無要求，但我會諗構圖，雖然遲過人放上網，但保證見得人，網友睇完仲多Like。」
Ivan仲話每日返工放工，見到好多人在港鐵車廂內用手機或tablet上網，實情不記得自己睇過什麼，「香港地始終太細，好似我住將軍澳返觀塘工，車程都不用十分鐘，睇份報紙都不夠時間。雖則話我起身第一時間會開電腦上網，但未病態到連去廁所都要拎部手機上網。」

撐傳統手機話音好
另一個不換機的原因，就同Ivan的職業有關，「智能手機太多功能，消電消得好快，玩多兩玩就要駁外置電池。若無後備電會失去聯絡，由於我做借貸，如果客人急起上來搵不到我，隨時搵第二間借。」所以他說用緊部傳統手機先夠穩陣，就算講多幾次電話，極其量兩日先要充一次電。雖然好多同事話用智能手機傾生意，比較容易埋到客人身，不過Ivan說每單借貸講緊一百幾十萬，解釋息口時始終都要用電話講，如果智能手機傾幾傾無電，好易令人覺得不夠專業。話雖如此，Ivan承認都有尷尬位，「有幾次同大客約見面，對方話WhatsApp個地址俾我，要好解釋我用緊傳統手機，搞到個客講笑話做完單生意分到佣，夠錢換部新機。」

好快要轉會
Eddie　30歲髮型師
使用手機：DoCoMo SH004 （http://www.nttdocomo.co.jp/product/）
機齡：1個多月

好多人買智能手機為求上網方便，但髮型師Eddie就話揀手機最緊要夠潮夠型，他大彈自○七年iPhone（http://www..com/hk/iphone/）面世後，手機款式變得一模一樣，「當年iPhone個意念是好新，但之後部部智能手機都是一塊黑色平板加幾粒掣，毫無設計可言，學黃子華話：連賣菜阿嬸都用iPhone，個image，cheap晒。」
多年來堅持用日系手機，寧棄上網無玩WhatsApp，都要與眾不同，「鍾意摺機款，又特別又多色揀。」
Eddie話講功能，日系手機過往一直走在尖端，例如當年香港一街都是Nokia時代，手機影相像素一般只得幾十萬，但日系手機已經有二百幾萬，當時覺得用日系手機特別有型。」不過，Eddie亦承認智能手機愈來愈受歡迎，令到不少日本手機品牌都要死跟，「無辦法，手機上網已成大勢，傳統手機已無選擇，再加上我班熟客都叫我轉用手機上網，話方便預約，睇怕好快都要屈服。」

老中青齊齊用智能手機
一班手機保守黨堅持用傳統手機，話無得用手機上網「唔會死」。實情是一街都是智能手機用家，由中學生到老一輩，全部都話今時今日無可能缺少智能手機。

傳統手機零溝通
服務性行業好多時都不方便講電話，同家人朋友聯絡都是靠WhatsApp，而且用傳統手機實俾人排擠。

感覺老餅
雖然好少用手機上網，但無可能用番傳統手機，一來感覺好老餅，二來成班朋友都用緊智能手機，日常溝通都是WhatsApp同Facebook，不用智能手機邊傾到偈？

搵仔女夠方便
仔大女大，自然要用不同方法去溝通，見他們用智能手機同朋友傾偈，咪試試囉。
起初我仲要靠個仔教點用部機，到而家兩仔爺傾iPhone 5幾時出，關係仲好了好多。

facebook群組創立
NEXT 3.0除了繼續搜羅最新產品同潮流玩意，更特別開設Facebook群組，提供互聯網世界精彩新聞同產品情報。只要在Facebook以「NEXT 3.0」為關鍵詞搜尋，或以手機的「QR code」app掃描就搵到，而且全日更新，想睇更多新資訊，就要即刻加入。 ####

就算上月用爆通話時間，都只是交$43（基本月費$38），Celia得戚話好難有人平得過她。