爹哋王瑞勳細嚼仔女嘅「傑作」，大讚「啱口味」兼全程笑唔停，仲話：「個心甜晒！」
上流滙
慶祝父親節 楊婉儀教整親子大餐
為人父母，總希望為子女準備最好，楊婉儀（ Winnie）亦不例外。港姐出身的她， 03年下嫁前練馬師王登平兒子王瑞勳，育有一子一女。自她榮升媽咪後，逐漸淡出娛樂圈，全職湊仔。為了一對寶貝，她先後修讀多個有關兒童發展的文憑，開設教育中心分享育兒心得，湊仔愈見專業。
父親節將至，着重親子互動的楊婉儀，特地與囡囡 Hannah、囝囝 Jonah一同炮製健康大餐。「我先生好注重健康，材料要 low fat，今次我哋試吓整個特別大餐俾佢食。其實小朋友同家長煮嘢食係個幾好嘅親子活動。」冧老公之餘又能教育小朋友，一舉兩得。
楊婉儀與王瑞勳一拍即合，相識 9個月便閃電結婚，一家四口經常親子裝出動。
煮食練耐性
楊婉儀着重與小朋友互動，每星期都安排不少親子節目，希望用好玩的方法，讓小朋友學習。「唔一定係去啲主題公園或者大型商場，一啲簡單方法都可以好開心。我就鍾意同佢哋散步，冇話搵啲咩特別地方，可能係屋企附近。我會叫佢哋留意附近嘅大廈，睇吓有幾多架紅色車經過，觀察身邊事物。」楊婉儀希望仔女獨立發展，從小便要他們接觸不同事物，包括煮食。「囝囝 Jonah 3歲嘅時候，親手焗生日蛋糕俾自己，當然我同家姐都有幫手。當時佢自己撈啲粉、打雞蛋等。完成之後好有滿足感、成功感。」
父親節來臨，楊婉儀教囡囡 Hannah、囝囝 Jonah整親子大餐𠱁爹哋。「我先生食得健康，鍾意食沙律、魚、豆腐等，雞蛋都要走蛋黃，小朋友成日覺得爹哋食嘅嘢好特別。今年父親節就要佢哋整餐健康嘅晚餐俾爹哋食。同小朋友煮嘢食都係個幾好嘅親子活動，可以俾佢哋練小肌肉外，又幫佢哋學習有營養食物都好好味，帶出食得健康嘅概念。佢哋煮嘢食，要有耐性一步一步整，煮完出嚟一齊分享成果。」
周一（ 10日），記者到訪楊婉儀位於羅便臣道屋企，她當日就孖住一對寶貝，親身示範整親子大餐。記者發現她對小朋友非常有耐性，慢慢講解煮食步驟。雖然整大餐過程簡單，但小朋友雀躍地把玩食材，已濃濃滲出家庭溫暖。
吞拿魚釀蛋白
興奮剝殼
將煮熟的雞蛋剝殼後，切開一半，除去蛋黃。剝蛋殼期間， Jonah突然哈哈大笑，原來家姐 Hannah將蛋白搣破了一個缺口。
將吞拿魚加上適量低脂沙律醬攪至醬狀，加上預先切好的葱粒攪勻，釀入蛋白中。之後加少許辣椒粉，便可加伴菜上碟。
四色沙律
材料：
香蕉 2隻
杧果 2個
士多啤梨 20粒
藍莓 1盒
蜜糖 少許
低脂茅屋芝士 少許
邊放邊食
這個沙律要將所有水果切粒，拎住兒童刀的 Jonah與 Hannah表現集中，小心翼翼將水果逐一切好。 
切好後要將水果分顏色逐層放入水杯，之後加入適量蜜糖及低脂茅屋芝士便完成。其間 Jonah與 Hannah突然話肚餓，邊放邊食，場面搞笑，要楊婉儀出聲話留俾爹哋先停。 
完成
三文魚貝殼粉
材料：
貝殼通粉 30粒
三文魚 400克
洋葱 半個
橄欖油 少許
西蘭花 1棵
甘筍 1條
番茄 2個
有機番茄醬 適量
芝士 少許
手放後面
楊婉儀燒熱平底鑊，加入橄欖油，再將去皮番茄加入番茄醬、混入三文魚及洋葱粒煮成醬狀， Jonah與 Hannah雙手放後面，在旁細心聽每個步驟。 
將番茄三文魚醬釀入預先煮熟的貝殼通粉內，加上芝士，伴入西蘭花、甘筍，再放入焗爐焗 5分鐘即成。 
完成
撰文：蔡靜雯
攝影：潘啟德
錄像：湯文峯
留言列表
