單人訪
做隻出色的鴨仔 陸浩明
黃鴨走了，一個月簡單的快樂，最終也有告別時。
幸好，一鴨死一鴨鳴。早前看《食平 D》，就出現以下爆笑對白。
陸浩明：「肥媽你今次有乜益我先？」
肥媽：「今次真係益你，明係為咗你而做嘅——做鴨！」
陸浩明：「嘩，你真係為我前途着想喎，做鴨！但我好少做，我屬羊嘅！」
肥媽固然抵死，但陸浩明也不輸蝕，面皮厚，反應快，造就飲食節目難得的有味笑話。
「當然唔介意，做新人做下把位先好睇，呢個直頭係難得嘅筍位。」
人稱「 6號」的陸浩明其實一點也不新了，在有線打滾十年，去年過檔無綫，先在《瘋狂歷史補習社》中扮鬼扮馬，現為娛樂新聞台皇牌節目《 6號訪》主持。
他請上去的嘉賓，都是有分量的巨星。
「做主持又得，扮嘢又得，我真係無乜底線，最重要係帶到歡樂俾大家。」
快樂其實一直在身邊，只差大家有沒有發現。
終於見識威力
時間先倒流一個多月前，陸浩明與肥媽主持飲食節目教師奶食平啲，雖然經常被觀眾質疑食材太過便宜，但二人不時你寸下我，我又窒番你，熱熱鬧鬧，不失為近期一個較可觀的節目。陸浩明通常飾演下把位，專搞爛 gag和發問小學雞問題，讓肥媽更加權威。
「無可否認我的確是廚房裏的小學雞，況且，我有責任代不懂廚藝的觀眾去發問。新人做下把位其實很着數，我這個角色扮演很得師奶們歡心。」
兩人同是由有線過檔，賣點是強勁默契。
「除了那一兩句開場白之外，其餘對白完全無稿，肥媽鬧我是真的鬧，我『瀨嘢』是真的『瀨』，我們好笑在夠生活化。可能我跟肥媽夠熟落，很多笑話都夠膽講。」
肥媽笑他「做鴨」，以無綫慣常尺度這個少少鹹多多趣的笑位其實有點踩界，但又給他們過了關。我敢說，換了第二個主持，肥媽一定不會這樣玩。
「這是火花，真的少少都無嬲，何況觀眾都讚我反應夠快。」
今時不同往日，拿你開玩笑，即是睇得起你。
「之前在收費電視做主持，想『入屋』要逐家逐戶拍門；今次終於見識到 TVB的光速滲透率。我拍一個禮拜《食平 D》，已多人認識過以往十年在 Cable（有線）所做的，無可否認真的很有成功感。之前做甚麼都無人理，現在少少新聞已有記者找我回應。」
陸浩明口中的「少少新聞」，源於他正在無綫娛樂新聞台主持清談節目《 6號訪》，表面上跟黎芷珊籌備中的《最佳女主角》相似，坊間都說他搶了對方飯碗。
「這真是最佳錯覺，芷珊姐姐那個是深情專訪，我則是較有娛樂性，而且有男有女。 TVB每年要製作四千小時節目，多一個小時訪問其實好小事。有次在化妝間見到她，雖然自己無做錯事，但因為報紙炒作都感到有少少尷尬，心想：『打唔打招呼好呢？』但當大家四目交投已經無事，她還跟我合照呢！人氣跟是非向來是對等的，我終於 feel到了。」
《 6號訪》的嘉賓個個有分量，已出街的有阿 Sa和 Kelly，之後還有梁詠琪、張敬軒、鄭中基、何超儀等。 
師奶一面鬧一面睇，有 noise又有收視，新面孔嚟講都真係筍位。
讀書靠朋友
別看陸浩明現在伶牙俐齒醒醒目目，他自言小時候是「大雄」，十足十宅男一名。
「又怕醜又怕事，生命只有漫畫和遊戲機。嗜好是儲周慧敏、楊采妮、黎瑞恩、湯寶如、王馨平的閃卡。」
他在荃灣區長大，唸聖芳濟中學。父母任職銀行，過年過節才會出銅鑼灣。中五，正考慮前途之際，朋友說他聲音有點像洪朝豐＋顏聯武，他居然膽粗粗跑去考 DJ。
「同時還報考了救生員，哪邊考到就做哪邊。結果兩邊都考到了，當然揀 DJ，好玩很多。」
他入了新城，同期還有陳鍵鋒和陳霽平。
「那是梁詠琪剛剛出道的年代，有次她來新城做訪問，飲過水那隻水杯我不知多想偷偷 keep起，但思前想後又覺得這行為很變態，最後還是打消念頭。無論如何，那幾年好像鄉下仔出城，見識好多，也學到很多。」
他一邊做 DJ一邊唸中六、中七，高考成績自然差強人意。他本想唸傳理系，但不夠分，只能選城大的工業工程與工程管理學。
「係得個名勁，其實一點也不勁。我是典型香港教育制度下的一個失敗例子。香港學生只得一個使命——入——大——學，根本不知自己想讀甚麼。我也是一樣，目標為本，只要能夠入大學，你叫我讀印度文學我都讀。」
要在大學生存，自然要懂生存之道，大雄變身牙擦仔，就在這個時候。
「需要點名的課才回去上，平時多幫同學買演唱會飛，臨近考試前就狂請同學食 tea，自自然然會有好多 past paper和貼士出現。都說出外靠朋友，其實讀書更需要靠朋友。有次阿 Sir都寸我：『今日唔使返電台咩？』點都好，符符碌碌總叫順利畢業。」
小時候原來是肥仔一名。 
李連英都可以戴眼鏡？《瘋狂歷史補習社》勝在貫徹始終地瘋狂。
寧願被喪插
大學畢業後加入有線娛樂新聞台做全職主播，雖然觀眾不多，但對新人來說實在是最好磨練。後期主持《主播會客室》，開始獨當一面。
「間中也要主持一些婦女節目呢！我勝在適應力強，即使遇上不擅長或不喜歡的崗位，都提醒自己要快樂地做。觀眾買的是享受不是難受，你苦口苦面最終損失的一定是自己。」
他很吃得開，也交了不少圈中朋友。黎明會接受他訪問，他會上張敬軒家替對方慶祝生日。原本可以就這樣快快樂樂地幹下去，但他不甘心。
「在 Cable那段日子是月薪制，像份穩定的政府工，加上其他司儀外快，供車供樓絕對無問題，但人生是不是就這樣呢？未見識過出面世界，始終不甘心。既然現在有機會也不求變，難道四十歲時才變？到時也不一定再有機會了。」
去年曾在有線工作的余詠珊上任 TVB製作部總監，舊將如陸浩明、黃翠如、洪永城等一併過檔。這種大洗牌的機會，也真是十年難得一遇。
「我知大家說我是 Sandy（余詠珊）黨羽，我明白新聞一定要這樣寫，寫我們相處融洽怎會好看？但我 feel到同事們之間都是友善的，像之前拍《瘋狂歷史補習社》，已很快和呂慧儀、古明華、姚子羚他們去食飯。」
他深明現階段有 noise好過寂寂無聞，即使是網上高登仔的負評，他也欣然接受。
「班高登仔話我同肥媽『有路』㖭，真係笑爆嘴。我情願大家喪插，好過無意見，無意見即係無人留意我啦！被四、五個人插完後有一個讚，都好安慰喇！」
他今年三十四歲，目標是做大騷主持。去年有份出席《東華》騷，雖然只是眾多司儀之一，已叫邁出一大步。
「我不是一個很有野心的人，但也會適當地爭取，希望將來做一個有認受性的主持。拍劇都 ok，底線是不剝衫就可以了，我成副排骨咁！其實我條底線，都真係幾低。」
雖說底線很低，但其實他是敬業樂業。今天便自備了多副不同顏色的眼鏡，我們為他預備的衣服都能襯上。
「我一定要戴眼鏡，唔戴會變咗蘇永康㗎！」
有線的《主播會客室》其實也很有分量，只可惜收費電視觀眾人數始終有限。 
電影《大追捕》原來 6號也有份，他飾法醫，相信大家都錯過了。「我同鄭中基有相同問題，就係無論幾認真做戲，觀眾都以為我哋搞笑，真係吹脹！」
歡迎影相
關於「入屋」後的威力，陸浩明其實還未說完，例子還包括他終於被偷拍到與女友拍拖！
「搭地鐵有條友坐我哋對面，全程耷低頭扮打機，但佢後面塊玻璃反映到佢部手機，我一早知佢拍緊我。其實我真係唔介意影相，你行過嚟打聲招呼，我做埋 V字手勢俾你影都仲得，最怕人鬼鬼祟祟。」
不是個個藝人都拒人千里的，大家以後識做了。
「不過唔好再問我肥媽喺邊，依家出親街都俾人咁問，我哋個節目做完喇！」
入屋，真係有辣有唔辣。
女友是圈外人，從事設計，兩人拍拖年多，感情穩定。《 FACE》圖片 
撰文：林蕾
攝影：袁家樂
協力：李梓軒
化妝： Ayan Chan
形象： Bryan@the Flaming
服裝： another
留言列表
