前年蘇杏璇於自家經營嘅「喬妃齋」接受《忽周》專訪時，已因糖尿病而變得非常瘦弱，但佢一直勇敢面對病魔。
媽咪姐
法師牀邊誦經一周 蘇杏璇含笑離世
上年 4月憑《奪命金》首奪香港電影金像獎「最佳女配角」嘅老戲骨蘇杏璇，於周三（ 12日）下 4時左右，因糖尿病及中風，引致併發症，喺伊利沙伯醫院病逝，享年 61歲。
信佛嘅璇姐，待人好就係人都知，所以聽到佢近月病情變差，一班圈中老友記都輪住去探佢。上周佢病情急轉直下，屋企人日日喺牀邊守候，而丈夫彪哥仲特登請咗兩、三個高僧，喺老婆牀邊誦經，希望佢早登極樂，去得舒服啲，唔使再受病魔折磨。可能因為信佛，璇姐彌留一刻，都面帶祥和笑容。
其實蘇杏璇真係好堅強！舊年佢雖然因為糖尿病暴瘦，經常進出醫院，但一直好樂觀。上次媽咪姐去探佢，佢由最重嘅 150磅瘦剩 99磅，但仲笑笑口話︰「依家都返唔到做女嗰陣 24吋腰！」認真鬼馬！
講真吖，媽咪姐好鍾意睇璇姐做戲，由 84年《新紮師兄》開始，佢已經陪伴咗我哋三十年，無論做賢妻良母抑或潑辣闊太，佢嘅演繹都係咁入肉。願璇姐一路好走，我哋會一直記住你嘅豁達同笑容！
上年 4月，璇姐因糖尿病導致左腳潰爛，要做刮肉手術。但佢接受訪問嗰時仲好精靈，提記者唔好影得佢個樣咁清楚，怕大家擔心。 
周三（ 12日）晚，蘇杏璇大仔喺伊利沙伯醫院接受訪問，表示媽媽安詳離世，而喪禮會以佛教儀式進行。 
璇姐同曾喺電視台打工嘅老公彪哥 87年結婚，生咗一仔一女。彪哥亦信佛，多年來不斷喺內地起學校。周三佢喺醫院為璇姐安排後事，一臉哀傷。
這些年來……
前年杜琪峯揾璇姐喺《奪命金》做一個無知師奶，只有十幾分鐘戲，但個個記得。最終擊敗劉嘉玲、惠英紅同舒淇，攞咗金像獎「最佳女配角」。 
84年蘇杏璇喺《新紮師兄》入面，做一個傳統慈母，佢同偉仔呢 pair熒幕母子，絕對深入民心。 
86年喺《黃金十年》入面，（左起）戚美珍、林建明、狄波拉同璇姐四個女人一個墟。人生有幾多個十年？依家睇番，人生真係有啲欷歔。
88年璇姐喺《新紮師兄》有梁朝偉呢個孝順仔，但 88年拍《義不容情》就俾劇中養子溫兆倫殺死。當年璇姐嘅慘情演技，搞到媽咪姐喊到眼腫！ 
2千年璇姐係娛圈搶手實力派， 2000年曾經去亞視拍《影城大亨》同麥家琪（左一）張文慈（中）做對手戲。 
72年唔講唔知，蘇杏璇同許紹雄、郭峰都係第一期無綫電視藝員訓練班畢業生，同六叔邵逸夫影過畢業相㖭㗎！ 
其實年輕時嘅璇姐，打扮起嚟都幾索㗎！但因個樣生得較成熟，入行以嚟，經常被派演阿媽角色。
群星念璇姐
杜琪峯：消息好突然
《奪命金》導演杜琪峯話：「我幾個月前先同佢食飯，呢個消息好突然，我都唔知道……除咗佢出色嘅演技外，蘇杏璇嘅慈悲同善心亦為佢一生畫上咗完美句號，感謝佢對演藝界作出貢獻。」
陳錦鴻：我同佢好有緣份
「唉，有啲唔捨得！大約三年前喺一個齋宴同璇姐一齊做客席主持，佢近年好熱心幫寺院籌款，為自己嘅宗教做嘢。我同佢好有緣份，感覺好特別，十年前仲一齊去新加坡做話劇，對足一個月，感覺深刻。其實生老病死係自然定律，希望佢屋企人安心，璇姐走得安心無牽掛。」
何韻詩：我會永遠懷念佢
與蘇杏璇於《奪命金》有連場對手戲嘅何韻詩話：「璇姐係演藝界不可多得嘅好演員，可以同佢合作係我嘅榮幸，我會永遠懷念佢。」
陳啟泰：好可惜
「好可惜！上次見佢已經係 08年拍《法網群英》。當時佢狀態 OK，之後就無見，我入行無耐已經同佢合作，演過幾次母子。 08年見佢時，覺得佢開朗咗，可能係宗教信仰關係。嗰時我哋成日去佢開嗰間齋舖食飯，一班人好開心。」
留言列表
