雖然 SMS提示好普通，但實際收到時，的確覺得好貼心。 

ILIKE

整機大不同

上個禮拜勁黑仔，部 Samsung GALAXY S3死完芒，就輪到部 Olympus XZ-1壞閃燈，好彩未過保養，即刻拎返原廠整。

@林梓添 

Samsung維修中心出晒名人多，好彩當日臨收工冇乜人，唔使三個字就搞掂，不過，啲員工淨識打官腔，問幾時可以整完，只答話會盡快處理，有乜事可以打熱線查詢。相反， Olympus員工就人性化得多， check完機等打單，員工仲會吹水傾吓用機心得，臨尾仲提醒我可以上網睇維修狀況。
最估唔到隔咗兩日， Olympus就 send個 SMS嚟話部機整完有得拎；至於 Samsung呢？打足半日電話先有人聽，但結果就係要等多日……

一物幾用喇叭條

公司枱頭有一個藍牙小喇叭，音質 OK，食完 lunch聽吓歌，方便。最近喺 iTunes download咗《孤星淚》 soundtrack（單碟 Highlights版），一首《 One Day More》聽極唔厭，與此同時發現個藍牙小喇叭開始交唔足功課！行過「蘋果士多」，有「條」叫做 Zooka嘅藍牙喇叭（真係藍色嘅），由賣相至音質（矽膠外殼，襟跌；夠大聲，不過低音欠奉）至價錢（八嚿有找），都算合理，最正係可以夾住個 iPad當手柄用（夾喺 MAcBook Air都得）！

Zooka喇叭條原來係 Kickstarter原創設計，值得支持。 

@劉定邦 

穩陣路跑

跑步嗰陣習慣聽住歌，可惜咁多年都冇隻心水藍牙耳機，唔係太重，就係唔夠靚聲，所以兩年嚟都係用 Sony MP3機 W262陪跑，最近終於頂唔順部機容量唔夠，成日要換歌，卒之分手收場。其實對 Plantronics隻 BackBeat Go藍牙耳機有啲心動，可惜唔係運動用，大汗怪如我，跑半 K已經跌出嚟。早幾日又試咗隻 Bluebuds X，夠輕、穩陣，音色幾好，戴住跑 20K，差唔多臨尾先甩，濕成咁都頂到咁耐，今次掂喇。

一條過，夠晒輕，耳機嘅蜂巢形耳箍可以頂實耳殼，夠晒穩陣。 

@劉耀祥 

型格吸塵

上個禮拜行過 K11，見 Dyson間專門店放咗部新吸塵機 DC46，八八卦卦又行埋去試吓。拖落個球形機身設計又真係幾就手，轉彎絕冇戳住戳住，不過間鋪冇嘢好吸，試唔到雙層圓錐氣旋吸力有幾勁。之後特登問代理借返嚟試，喺影樓入面左吸右吸，唔使一陣，連牆角隙位啲垃圾都吸埋出嚟，而且影樓入面鬼咁多雜物，真正試到拖得有幾暢順。不過，我都係 buy部無線吸塵機 DC35多啲，屋企又唔係大，叉一次電都夠用啦，勝在型吖嘛。

影樓環境超雜亂，拖住部吸塵機活動都算靈活；上一代吸塵聲嘈到耳鳴，今代多咗氣旋，竟然冇咁嘈，抵讚。 

@周群雄 

text：科技組