以為爭產案塵埃落定，甘太（右）及其兒子甘崇轅（中）表示可展開新生活，怎料仍要周旋於爭產，甘太一臉憂愁。（林志謙攝） 

中環人語

鏞記再爭產　神秘的失物

鏞記大哥甘健成去世半年，其妻子、做咗遺產執行人嘅甘太，要開始整理先夫嘅遺物。今年二月，佢由民政署嘅代表陪同，去中環滙豐總行開甘健成嘅私人保險箱，點知一開……「乜都無！」甘太說：「民政署代表陪我去問銀行，佢哋話原來舊年十一月，即係大哥死咗之後，甘琨禮（與甘健成爭產的二弟）有去過開保險箱。」甘太話民政署都好懷疑，「全世界都知我老公死咗，財產要凍結，我都要民政署陪同先可以開保險箱，點解琨禮可以入去？我問琨禮點解，裡面有啲乜？佢通通都唔答。」

民政署致甘太信件表示，他們對於甘琨禮在未獲授權下打開甘健成的保險箱，表示關注。 

估計兩兄弟未反面前，甘健成曾授權細佬可開保險箱，甘太話未質詢銀行，而警方就話唔受理，「佢哋話因為我都唔知失物係乜！」小宗搵到甘琨禮，佢話個箱雖然係大哥個名，但裡面啲嘢係屬於鏞記，但有啲乜就唔講，佢話一定唔係盜竊喎。
自甘健成離世後，甘琨禮一直向外聲稱，會買入大哥手頭上四成五股份，徹底分家。甘太同小宗講，原來甘琨禮一直採拖字訣，甘太指曾要求雙方一同聘請估值師，「佢話：『你自己估到夠啦。』」她繼續哭訴：「我同琨禮講，想睇公司盤數，佢又唔俾。而家我哋嘅股份，變咗一張廢紙（小宗按：因甘琨禮持股五成五，是大股東），而家我哋要求好卑微！」

Give me a break
名媛旗袍店

中環都爹利街商業大廈十四樓，有間隱世旗袍店，老闆張水法四六年已創立該店，現時傳到第三代張正年（ Asa）。不少名人政要都係熟客，好似利孝和夫人、陳方安生及梁愛詩等，佢哋平日都愛著旗袍。 Asa向小宗透露客仔喜好：「利夫人同陳太都鍾意來買布，佢哋有自己嘅裁縫。利太好爽，知道自己想要乜，鍾意鮮艷顏色的布料。有時來咗新布料，向佢推介：『呢隻顏色新返，好特別㗎！』」佢望一眼就會話：『呢隻唔啱我。』自己揀其他款。」利太幾十年來只找裁縫李世良做衫，李師傅退休後，利太聘請他，實行將師傅「私有化」。 Asa亦曾為城中一位老太太縫製生日時穿的旗袍，用最上乘的布料，一針一線由他親手製作，價值達二十多萬，係佢做過最貴嘅旗袍；而莫文蔚結婚，亦係搵佢哋做旗袍。
OL都想有件度身訂做嘅旗袍？ Asa話約一萬元；做一件衫由度身設計、考慮花紋擺位、剪料、畫紙樣等等，最少要一星期。現時款式都與時並進：「以前旗袍款式少，變化只在於選料同顏色，高衩定低衩，鬆定窄。而家嘅旗袍用很多西式剪裁方法，例如斜腳、大露背等，務求中西合璧。」

第二代掌門人張德忠（左）退而不休，經常回鋪工作，與 Asa（右）兩父子會就縫製旗袍交流。（關永浩攝） 

喜歡穿旗袍的利夫人，不時到店鋪購買布料。 

莫文蔚亦愛穿旗袍，她結婚時穿的另一件橙色旗袍是出自 Asa手筆。

本週 photohunt

各位讀者，試下圈出圖中兩個 logo嘅分別。想飲咖啡，唔好去右邊嗰間啦。你睇圖中公仔手上揸嘅，係鉸剪同梳，呢間只係髮型屋，唔係 Starbucks呀！

邊個夠我「虧」

業績期剛過，小宗為大家排出巨虧龍虎榜。當中高踞榜首的，是冧庄的「蝕錢王」中國遠洋（ 1919），前年蝕近一百三十億港元，去年則蝕一百一十九億。董事長魏家福認衰仔，喺年報深表歉意；鬼咩，航運股衰咗幾年都未翻身，長期供過於求。間公司喺內地都有上市，根據規定，連續兩年虧損要蓋一個「 ST」（ special treatment）印，若來年無盈利，大有機會除牌。
次虧係年頭被踢出藍籌嘅中國鋁業（ 2600），一年發足四次盈警，因鋁價下滑全年蝕過一百億，管理層唯有減薪三成幾共渡時艱。而排第三、虧足八十七億的中國冶金（ 1618），就因為承包的中信泰富西澳鐵礦項目工期延誤，搞到成本大增。佢哋將項目甩手，又賣走蝕本貨，招積到喺宣布巨虧同日發盈喜，預告今年首季有錢賺啦！排第四、五分別係蝕四十八億及三十五億嘅馬鞍山鋼鐵（ 323）及中興通訊（ 763）。離奇嘅係，五間當中有四間都係三月廿七日公布業績，唔知呢日係咪做咩都特別虧？

擔大旗的「虧王」中遠董事長魏家福（右）早前接受訪問，仲話希望股民能「等一等」，他有信心帶領集團轉虧為盈，未來一定有回報咁話。（《蘋果日報》圖片） 

金牙大狀講嘢
積極不干預碼頭風雲

貨櫃碼頭大成咁，起幾多個黃埔花園都夠地方也。 

碼頭風雲驅之不散，擺明係因為梁振英放棄「適度有為」之承諾，冇由勞福局之張建宗出面斡旋其事。如斯「積極不干預」又焉能不令人懷疑 689是否另有所圖。
須知現今特區政府以房屋為重中之重，而建屋之難非因庫房冇水，而係特區冇地。若然國際碼頭以至所有碼頭通通摺埋，你話可以騰出幾多地方起屋呢？一個黃埔船廠發展出個黃埔花園，一個太古船廠發展出個太古城。你話葵涌貨櫃碼頭可以發展出幾多個黃埔花園加太古城啦！
天要下雨，娘要嫁人。製造業內遷珠三角三十年，香港廠廈丟空；即使航運為四大支柱行業之一，但上海老早已取代香港嘅世界貨櫃碼頭壹哥地位，到今年深圳鹽田港更又爬埋香港頭，試問香港仲何來優勢經營貨櫃碼頭？
由得罷工癱瘓碼頭運作，俾超人李多條道理摺埋佢，咁仲使驚香港冇地方起住宅乎？田少話班商家佬睇死 689冇——料——到，佢哋未見識過佢嘅真功夫而已。遲吓你就知！

中環人語迷你版

壹傳媒針對我。

估中邊個中環人講呢句說話，送你 PNY Key Attache 4GB USB Flash Drive一個
有意參加者，請於四月十五日 24:00前將答案電郵 mailto:centralman@nextmedia.com
小宗只接受電郵，郵寄免問。

上週人語揭曉

選舉權普及平等，並不包括提名和被選權。

答案：譚惠珠
得獎者： Yuki Au
中獎時間： 1:00pm 3/4/13

本刊員工及直系親屬不得參加。
為求公平及杜絕偷步搶答起見，請於星期三下午一時後來電郵競猜答案；在此之前發出之電郵作廢。
超過一位讀者估中，先到先得，恕不接受上訴。
答案及中獎者姓名將於一三年四月十八日本欄揭曉。

廣告時間

你有某財團嘅黑幕想爆？你知邊間上市公司造假？
你仲想舉報地產霸權嘅不公？
歡迎你將財金界嘅寃屈或過癮八卦事，爆俾《壹仔》財經組知，一切報料，均會保密！

爆料熱線/whatsapp:6829 5929