818 娛樂八掛大放送★

被編劇插搶飯碗無份寫稿扮功臣王祖藍委屈：眼濕濕回應我會伸出和諧之手！

王祖藍為《老表，你好嘢！》，首度一身兼兩職，參與演出之餘，還負責創作劇本工作，即成為話題之作，揹上天大罪名，被指引起中港矛盾，不過祖藍面對被同胞圍插，依然以「和諧」心態輕鬆面對。但祖藍這部誠意之作，同樣引發另一樣矛盾，日前無綫編審關皓月在微博公開質疑他的「編劇」身份，似為了有人明搶飯碗感到不快。日前祖藍接受本報專訪，坦言得知公司有是非傳出，感到相當委屈，提到這事更一度眼濕濕，還表示會伸出和諧之手，希望同事能明白他的苦心。

：撰文：杜淑霞
攝影：畢紹基
服裝：收集點

“老表，你好嘢！”在

不想搶任何人飯碗

對於關皓月公開質疑，祖藍事隔10日後，亦有在微博親自解釋，「哪一集完全是我編劇的，沒有，一集也沒有，每一集我都只是『有份』……至於字幕沒有我的名字？……我望觀眾可以留意到其他編劇，這組編劇從不計較名銜，只想單純地一起創作一個好劇本……」

日前祖藍接受本報專訪，坦言這個劇令他成為箭靶，得罪了不少人，眼濕濕地說：「我知道我可以直接同Tommy（製戲劇製作總監梁家樹）講我嘅橋，我又用咗好多唔係公司用開嘅人，會令到好多人唔開心，係聽到有啲是是非非，但我會伸出和諧之手，希望佢哋明白我，只係想創作一部好劇，令觀眾睇得開心，絕對唔係想搶任何人飯碗，我不嬲好尊重TVB編劇，今次反而證明要有好創作，係要畀多啲空間大家去吸收多啲新嘢，不停咁寫係會榨乾榨淨，我都建議公司帶編劇同事出外旅行。」

其實祖藍為了這個劇，確實犧牲不少，「我花咗3個月去創作劇本，推咗內地劇同電影，仲有其他工作，夾夾埋埋真係無咗7位數字，但係我覺得要寫好個劇本，就一定要專心，唯有依家努力啲搵番，依家聽到安仔話『個劇算係叫好叫座』，我都覺得係值得，大家努力無白費。」

望成立製作公司

祖藍坦言還構思了幾個劇本，但暫時未決定是否會開拍，「等睇埋結局先，到時如果Tommy話拍，我係兩、三個古仔可以拍，都係啲笑中有淚嘅故仔，但一定唔係《老表》續集，全部我都可以唔做主角，因為真係好鍾意做製作，我未來目標係好似獎門人（曾志偉），或者好似林心如咁，一手一腳去創作一個劇出嚟，其實今次係一個試金石，將來我希望成立間製作公司，成個製作賣畀電視台，我真係鍾意自己演番自己作品，你見所有喜劇演員，大部份都係自己創作先會成功。」

祖藍提到近日的是是非非，亦忍不住眼濕濕。

關皓月在無綫作品包括《學警》系列，最近作品是緊接《老表》播出，跟胡杏兒合作的《戀愛季節》。

祖藍坦言劇本創作並非他一人之力，還有電影編劇龍文康和其他編劇合力而成。

結婚等多年

事業得意，愛情亦順利的祖藍，對於有傳他將會在西貢買地建愛巢迎娶李亞男，他就回復抵死本色說：「以依家傳媒嘅能力，如果我有買地，佢哋一定有地契啦！佢哋間屋個設計，真係佢哋『設計』出嚟！我係想買樓，亦都想買村屋，因為我想靜啲，但又要方便屋企人出入，依家仲未睇啱，不過買咗樓真係無乜錢淨，所以今年都唔會諗結婚住，下年或者會諗多啲嘅！」

早前祖藍奪得傑青，嫲嫲，媽咪和女友李亞男都有到場支持。