818 娛樂八掛大放送★

鍾欣桐 放煙幕屋企慶生 阿嬌 中環 蠱惑 包場仔

藝人拍拖本來係平常事，但仍然有藝人覺得寧俾人知莫俾人見。就好似曾經俾陳冠希深深傷害過鍾欣桐（阿嬌），雖然已公開承認有個韓籍男友，但就始終唔俾男朋友曝光。本月21日係阿嬌32歲牛一，傳媒當然關心佢同男友點慶祝，不過阿嬌就好醒目講明會屋企慶祝，等傳媒狗仔隊唔好浪費時間等佢，但呢個原來係一個煙幕。

阿嬌生日當晚，本刊就發現阿嬌好姊妹「阿Sa」蔡卓妍，罕有地去中環甚受藝人追捧夜店「Play」出席私人派對。據知當晚其實係阿嬌搞生日派對，韓籍男友仲西裝骨骨咁出席。不過當晚阿嬌就非常小心，玩到凌晨點幾，就s好姊妹阿Sa出門口巡視，一向醒目阿Sa亦好快發現有傳媒在場。之後本刊就發現英皇藝人御用七人車，即刻駛去夜店後門，之後就全車落晒簾咁離開。不過好姨最佩服都係阿嬌生日當晚，仲自己微博話自己屋企慶生，實行聲東擊西，認真高手。

講開Twins呢對好姊妹，感情路真係唔易走，阿嬌呢頭感情終於有落，點知又輪到阿Sa同男友陳偉霆傳情變，二人正處於冷戰階段。不過冷戰又好、情變又好，阿Sa少少都唔寂寞。日前就有網友發現阿Sa去韓國首爾「朝聖」睇BIGBAND演唱會尾場，不過身邊人就唔再係William，而係由著名形象指導馬天佑補上，網友仲話見到兩個人成晚雞啄唔斷，關係非常close，睇「卓霆戀」傳分手，都幾空穴來風feel！

放大圖片