《老表，你好嘢！》大收，幾乎成了facebook晚晚的洗版熱話。在我們勁嘲笑蔡芯（王祖藍）用半鹹淡廣東話說着「和諧、和諧」、劇情夠搞笑浮誇的同時，有些人卻會認為此劇加深中港矛盾，既醜化了內地人，也抹黑了香港網民，結果才播了一星期，便已接獲二百多宗投訴。

然而身為主角的郭晉安，卻只是聳聳肩笑着說：「咁多人有咁多聲音、咁多意見，好難話去做一個滿足晒所有人嘅劇集出嚟，如果咁樣就好難有啲創新嘅寫實題材。

「反正套劇嘅處理手法唔係好serious，你咪當我哋係米奇老鼠咁睇囉，可愛啲去睇呢個世界囉！只要你肯睇，就算係鬧住嚟睇，我作為演員，我係歡迎o架，最好做埋2013年嘅代表作啦！因為我都係個好典型嘅香港人，對我嚟講，都係利益嘛！哈哈哈！」

是的，很多事情也不能盡說對與錯，問題只是在於你從哪個角度去看—始終，一樣米已可以養百樣人，更何況活在同一天空下，每個人都會有着不同的故事？

 

屋企

《老表》內容搞笑浮誇又不失寫實，以內地人和香港人之間的衝突作題材，自稱是典型香港人的郭晉安，也有他的看法。

有人嘅地方就會有衝突o架啦，除非你獨處嘅啫。以前，日本人嚟香港買LV，好似養起咗成個香港咁，一見到日本人，LV就會當佢哋係大爺。但依家，好多店舖只要見到係內地人、講國語嘅，都會招呼咗先。

其實有啲咁嘅情況，都係因為大家都好想喺最短嘅時間裏面，攞到自己嘅利益：內地人嚟到，只係得四、五日，瘋狂咁購物，買佢哋想買嘅嘢囉；香港人呢，就想乘機賺最多嘅錢，呢啲都係香港人嘅特質。

當然，有啲內地人會認為，我落嚟買嘢消費，你哋梗係要對我哋好啲啦！點解仲要對我哋咁差呢？但我哋始終畀英國管治咗咁耐，受英國文化長大咁根深柢固，咁你哋嚟到人哋屋企，係咪應該要依番人哋嘅規矩呢？不過，內地人又會認為，呢個屋企本來係我哋o架，只係我哋離開咗呢間屋好耐咋嘛！

講到尾，香港人為咗搵食，都已經唔會理畀人笑，厚住面皮都要努力同你講普通話，其實無非都係想共融咋嘛！我覺得，兩者之間無論發生任何矛盾，如果有愛嘅成分喺裏面，好多唔好嘅事都會化解，千祈唔好將啲問題化大囉。

「阿旺」一角深入民心，絕對是安仔的代表作。

慢板

四十八歲的郭晉安，入行廿六年，拍劇佔了他的大半生，從出道以來，他都是默默幹、默默做，不會搞緋聞博宣傳，也不會特別埋甚麼堆，進步不是沒有的，但相對於很多小生來說，卻稱得上是「歎慢板」。

我入行冇耐，好快就做男主角，但咁樣係咪就會平步青雲呢？公司仲有咁多男主角，始終都會有排名，如果我係排到最尾嗰個，我已經可以叫做drop咗落去，叫做低潮！

做我哋呢行，一直有好多嘢要配合，自己係好被動，因為我唔係一個技術人員，可以今年博升做主任，下年博升做經理，真係好睇自己嘅際遇，好睇自己會唔會遇到一個好嘅劇本、一個好嘅角色。

就好似我自己，其實嗰陣都係排咗好耐隊，先會有套《創世紀》咁大製作嘅跨年劇，有個叫「馬志強」嘅角色，好需要由我嚟做。然後，又要等多好幾年，先再有《戇夫成龍》嘅「阿旺」，都係成個TVB冇另一個男藝員可以做到嘅人物。

「歎慢板」，我都唔想o架！際遇呢啲嘢唔係自己可以返嚟嘅，亦都冇得返嚟，咁我咪拍每套劇時，都做好啲準備囉！因為我總係好相信，機會係留畀啲有準備嘅人。

九九年《創世紀》中的「馬志強」（右二），令安仔的男主角地位升呢。

騷錢

其實早於九十年代中，郭晉安曾經轉型當過歌手，在出唱片、上台演唱之餘，亦同時以歌手身份參演電視劇，情況猶如《老表》中的王菀之和張繼聰。

我好記得，我初初入TVB拍劇，係三百蚊一個騷（即有份演出的節目播放半小時），即係話，一套劇一個鐘一集，我每集都有六百蚊騷錢。跟住做咗四、五年，我轉咗「部頭約」，已經講緊係一萬蚊一集！

冇耐到我出碟嗰陣，簽歌星約拍劇，估唔到竟然返番轉頭，只係得三百蚊一個騷錢！六百蚊一集同一萬蚊一集，你話個差別有幾大！不過佢哋當時係咁計o架：我始終係個新人嘛——喺唱歌嚟講！哈哈哈！

安仔說，拍此劇時，他和王祖藍經常也會調整劇本。「我哋好想啲嘢到point啲、實況啲。有啲人話祖藍啲戲份好似特別多，其實大家都好平均o架！」

我唔知依家歌手拍劇幾錢，但一直以嚟，加幅都唔多。其實都明嘅，你作為一個歌手，入到嚟，公司畀個好好嘅主角位你做，然後去換取一啲嘢返嚟，而嗰啲嘢呢，係會令到你喺出面可以再搵錢，條數計落係啱嘅！但依家，你拍一套劇，佢後面條數會唔會幫補得番呢？如果佢繼續用番一個歌手合約，去拍一個劇嘅時候，咁條數又點計呢？

我諗，比起以前嚟講，歌手搵錢嘅機會真係難咗。以前都仲話有雙白金、四白金，但依家，啲人都係買翻版、喺電腦download啲歌，所以依家做歌手就有呢啲辛苦囉。

○三年，憑《戇夫成龍》中「阿旺」一角，奪「最佳男主角」，算是他其中一個事業高峰。

教育

郭晉安生於一個十一人的家庭。小時候，父母外出搵食，排行最小的他，在家裏便要聽從五位哥哥和三個家姐的話，形成他長大後，曾一度失去了自我價值。直至○八年，兒子郭令山出世後，才令他對自己改觀。

我細個時，屋企真係乜嘢都用打呢個方法嚟教我。例如我半夜瀨咗尿，我阿媽就會打我打到上天台，打得好緊要！試過打咗我四、五次之後，有晚我發夢夢見自己瀨咗尿，結果又瀨過，阿媽又會再打，唔畀我發啲咁嘅夢！哈哈哈！

○六年與歐倩怡於迪士尼舉行婚禮，至今六年多，跟她已是一仔一女的父母，關係比從前更密切。

最近我同個仔戒夜晚嘅尿片，我要同佢瞓，有時瞓到半夜兩、三點，佢話要尿尿，我就會起身同佢去廁所；如果嗰晚佢冇嗌要尿尿，我就知道佢一定係瀨濕咗！然後我就會同佢講：「下次唔好啦！記住呀！」

可以同個仔一齊去經歷呢啲嘢，我真係覺得好開心o架！因為，係佢教番我，我嘅自我價值喺邊度。我依家有好多嘢，都已經同佢磨合咗，對住佢，我唔可以前言不對後語，有好多嘢我要講得出、做得到，我想佢可以觀察到佢爸爸我，係一個點樣嘅爸爸、一個點樣嘅人，佢依家已經慢慢大個，有好多嘢更加呃唔到佢！

一一年多添一名女兒以雅，安仔說：「哥哥有時都會妒忌妹妹，會好肉緊咁拍妹妹塊面o架！我哋就會叫佢要對妹妹斯文啲。」

另一個天空

關於成長、關於人生際遇，郭晉安告訴了我另一個天空的故事。

話說在他五、六年前搬進匡湖居時，鄰居有一個約十二歲的孩子。「嗰個細路仔，自細讀國際學校，父母都係眼光好宏觀嘅人，唔會參與乜嘢遊行，唔會反政府，佢哋成個family，生活都好簡單，平時喺屋苑度打吓網球，夜晚唔會睇電視，只會上吓網睇吓國際嘅資訊。

去年聖誕與仔仔令山在太古城的合照，成為了他現在手機的wallpaper。「佢影影吓相伸脷，我咪配合佢古靈精怪囉！」

「到依家，個細路已經十八歲，睇埋都唔知有冇五、六套電視劇，完全唔知我係邊個；佢仲已經去咗美國讀書，學校見佢打網球好勁，就搵佢讀一科專係訓練運動員muscle嘅科目，呢個亦都係佢好想做嘅職業。」

然後，他歎了口氣，有點感慨地說：「呢個細路嘅世界，好大好廣闊同好國際！但我哋嘅天空，可能淨係喺香港搵食、搵食同搵食！」

我跟他說，其實他的兒子令山將來還有很多機會，把視野變得更遙遠廣闊啊！「我都想佢有個咁嘅天空o架，不過大前提下，我個仔讀緊嘅係local學校，咁已經好唔同啦！而且我呢份職業，都已經限制咗佢，佢間唔中都要畀啲傳媒影吓相，喺報紙雜誌見到自己個樣，咁已經去唔到人哋嘅天空啦！

「不過，其實都要睇個仔自己嘅意願，同埋天父嘅安排，佢將來嘅路，冇得夾硬逼佢o架嘛！」

「橫看成嶺側成峰，遠看高低各不同。」令山，令山，將來總會有他到達高峰、看到另一片天空之時。

騎呢組合逐個講

《老表》中有多位首次參演TVB劇集的演員，個個來自五湖四海，郭晉安形容選角十分「騎呢」。「對住佢哋，我唔可以叫幸運囉！哈哈哈！」

萬綺雯 易雪飛
佢係一個好騎呢嘅人！唔做戲嘅時候不停笑！總之佢撐你嘅話，你講乜都會信你，但偏偏我就成日對住佢講啲好無聊嘅嘢，佢都當以為真！哈哈哈！

陳嘉佳 細細粒
佢好肥！拍得住沈澱霞最肥嗰陣！佢本身教琴，佢話，因為自己唔使做，淨係坐喺度教鋼琴，所以就咁肥喎！真係畀佢激死！哈哈哈！

陳明恩 聶小茜
佢雖然係個鬼妹，但佢喺香港出世，爸爸係個傳道人。其實佢依家嘅職業係教跳舞，不過真正嘅志願係傳福音！

林盛斌 程少山
我同佢一拍即合！佢好好，好放！好難得可以除晒衫、光晒頭，肉騰騰咁畀你睇晒！哈哈！

王菀之 吳芝晴
佢係個好感性嘅人，創作天份好高！佢喺戲入面作嗰首歌畀哥哥，即係我，我第一次聽都已經好感動！

張繼聰 宋為潮
阿聰係個好有talent嘅人！始終係演藝出身，佢做戲嘅節奏捉得好好！係個娛樂圈嘅材料！