Focus

潮媽媽

這個世代，人人對潮媽這名詞趨之若鶩，事實卻不是個個潮得起。
潮媽，除了衣着要潮，更重要是思想上要潮：有勇氣陪兒子出櫃；即使盲了也要夾 band跳 hip hop；做個性博士，執筆寫鹹古，容許兒子「玩小鳥」。
趁 512母親節，找來三個媽媽，看看她們有幾潮。

兒子是攣又如何

丘媽媽開通，接受兒子性取向，還叫他做二小姐。「他們姑丈都讚我叻。老實講大家都有後代，難保不會發生在你身上！」 

丘唐彩露的二仔丘雋熙（熙熙），是同性戀者。「係又點？又無影響其他人生活。」丘媽媽充滿霸氣地說。

丘雋熙 2010年參加 Mr. Gay Hong Kong比賽，要穿泳褲出場。 52歲的丘媽媽不但拉大隊撐場，還拿着螢光紙牌， high爆尖叫。「其他人都叫到索氣坐低，我還企起身繼續叫。」
兒子現在單身，但前三任男朋友她都見過。有年跟一班師奶去北京旅行，她找兒子在當地工作的意籍男友飲茶。「我當佢哋係 friend，仲試過一齊去深圳旅行。」
熙熙不會家務，丘媽媽教他煮飯冧仔，兩母子閒時在牀邊傾偈談心，假日還一起敷 mask扮靚。「我生三個仔，當年都想追個女，阿媽仲話我，你生少四両（少了慈姑椗）咪好囉！無諗過現在都有半個女！」說罷，一家人笑得人仰馬翻。

愛你

丘媽媽本身也是潮師奶。十多年前已去紋眼線，又做激光去斑，試過染了一頭綠色爆炸裝。在家無聊時，要老公替她拍「肉照」留念。
22歲結婚，婚後當家庭主婦，畢生事業，就是湊大三個仔。大仔和細仔愛女人，只有二仔熙熙自小與眾不同。
他愛玩 Barbie和煮飯仔，又喜歡粉紅色。「有年他說喜歡一個粉紅色的兔仔筆袋，我買給他，也不認為有問題，靚嘛！但回到學校，同學笑他死乸型，又改花名叫大家姐，我教他不用理別人說話。」
兒子漸長，跟女同學相處，像姊妹；看到漂亮男生，會偷望。兒子的性取向問題，開始在母親心裏糾結。「做阿媽都好矛盾。第一時間梗係唔想接受，叫自己唔好估。但萬一真係，我就要接受，因為佢係我個仔，最緊要佢快樂。」
熙熙自小玩體操，愛跳舞，及後考入演藝舞蹈系，現職舞蹈員。 5年前，熙熙當時 21歲，正讀演藝三年級，他經常外出，又不回家睡，還鬼祟講電話。
有天，她收到兒子來電。「媽咪……我……拍拖喇！」
「邊個咁唔好彩呀！」聽得出兒子的聲音在顫抖，她特意說笑緩和氣氛。
「他……是男仔來的！」
她的兒子，終於「表白」了。
她呆了數秒，一時間不知怎應對。回過神後，清一清喉嚨，故作輕鬆地說：「識咗你 20年，一早估到啦！」
「佢接受自己，總好過為了掩飾，找女仔拍拖，搞一大輪，累人累己。」丘媽媽說。

一家五口合照，下面左一是二仔熙熙。 

兒子小時愛 Barbie，她買不少絕版跟他一起研究。兒子斷背，有否自責？「無喎！呢啲（性取向）係天生，三個仔都有玩 Barbie，大家只是用欣賞角度睇，唔係猥瑣嗰啲。」 

難得一家人齊心。「好多人以為我們好多掙扎和挫折先能夠出櫃， sorry，真係無咩壓力，所以我好多謝家人支持。」丘雋熙說。

撐你

2010年選 Mr.Gay Hong Kong，全家總動員撐場，最終兒子得了冠軍。左起大仔、丘爸爸、細仔、熙熙、細仔女友、丘媽媽。 

這個媽媽，一直替兒子拆彈。「個仔唔敢同老竇講，我幫佢講。」
她在枕邊向丈夫試探：「假如個仔鍾意男仔，你會點？」丈夫出奇地平靜：「係都無計，最緊要個仔開心。」
三兄弟感情要好，一早就知。「他們仲安慰熙熙，傳宗接代有他們頂。」
難堪的話，少不免聽過。爸爸跟同事談起兒子是同性戀者，對方竟侮辱地說：「咁咪即係 X屎 X？」
爸爸將不快憋在心中，媽媽卻選擇先下手為強。「上星期同兩個師奶飲茶，講開趙式芝是同性戀，其中一個師奶話佢阿爸趙世曾滾得多，係報應，我即刻鬧爆：『你 out唔 out啲呀！同性戀好平常啦！』」
「有親戚問：『熙熙係咪咩？』我即刻話：『係呀！你唔知咩？』對方即刻無癮。」
她肯出鏡接受訪問，都是為了兒子。「想跟和我一樣處境的父母講，做屋企人要支持佢哋。」
做母親的，總是以守護兒子為己任。

丘雋熙自白：感激母親

說到跟母親坦白，熙熙便哭了。 

我跟自己說過，當我有一天拍拖，就要跟媽媽表白，我是同性戀者。我讀幼稚園時，已知自己喜歡男仔。當被同學抨擊時，幸好媽咪教我做自己，別理他人閒言閒語。就因為她的寬容，我才可以在沒有壓力下忠於自己。我好想講句：媽咪，你真係好掂！

潮爆只為我個女

兩母女一起參加香港失明人互聯會的視障人士親子計劃，除一起運動外，還有參演音樂劇等，加強與家人之間的溝通。 

40歲的唐蓮娜是十項全能的母親。
她跳 Hip Hop， Rap歌 rap到去泰國表演；夾 Band夾到在會展向局長獻唱；還參加三項鐵人賽、打保齡、演音樂劇。這個全失明的母親，比健全的，還要能幹。

唐蓮娜是盲人界巨星。「我好鍾意舞台，經常參加歌唱比賽，後來被星探睇中，邀請我夾 band。當然，那星探都係盲嘅，哈哈哈哈哈……」

採訪日，她跟另外 6個 band友為周末演出綵排。這隊「快樂路德樂隊」，隊友中 5個失明，兩個健全。她當主音，瞇起雙眼，高唱搖滾樂隊 Bon Jovi的〈 It’ s my life〉：「我們鍾意 rock and roll。」
她是樂隊主音，也是 rapper， 3年前跟四個盲人組成「 Unbelievable」 hip hop隊唱 rap，去泰國參加「蒲公英之花音樂節」：「我着住賴屎褲 Yo：『睇唔到都有我堅持，依家先學 rap也 rap得及時，產後肌肉有啲鬆弛，我常做運動我動靜皆宜……』」
游水拿盲人水運會總冠軍，又年年參加鐵人賽：她先游 200米，上岸後跑 500米，轉交健全人士作單車賽，最後她接力跑 1500米。
「我要靠導航員在旁邊扒獨木舟給指令，所以不能游兩頭擰的自由式，又或向前撲的蝶式，咪實撞到人，哈哈哈哈哈……」她總是笑得開懷。
讀小學 4年班的女兒紫晴，視媽媽為偶像，訪問時甜絲絲地挽着母親的手。「媽媽真係好叻。上兩個星期，盲人體育會來學校講座，壁報板上貼滿媽媽照片。同學問我：『你媽媽跑步游水不會撞親嗎？佢係咪真係（盲）㗎？』」
女兒是唐蓮娜的盲公竹：練馬拉松，女兒當領跑員；她游水，女兒做她的哨子；夾 live band，替她讀歌詞；跳 hip hop，又在台下為她揮螢光棒。「她還是我的 fashion designer，幫我揀衫。」唐蓮娜說。

女兒出世時她還看到東西，可親自照顧她，現在請了外傭幫手。 

她逢星期一在石硤尾路德會失明者中心夾 band，得她一個女生。 

訪問期間，女兒一直捉着她的手。

潮俾你睇

唐蓮娜做潮媽，只為女兒。「話佢知正常媽咪做到的，我都得。」
她本來看到彩色，七級鋼琴底，日間做游泳教練，夜晚在保險公司當文員， 22歲便找到 Mr. Right結婚。「婚後不久，入夜就看不清東西，起初還以為是夜盲症。」
她只有 150度散光，家族中也沒人視障。一直沒理會，但每晚回家都頭痛，後來連 40吋大電視也看不到，終耐不住看醫生，才知患視網膜色素病變。「呢個病無得醫，可能會全失明。」
起初不敢告訴父母。「直至有天在街上母親和我撞到正，我都睇唔到佢才穿煲，他們怕老公會嫌棄我，好彩無。」
再不能當游泳教練，經朋友介紹，轉到髮型屋幫人洗頭。「頭咁大個點會睇唔到？點知真係睇唔到。」惟有靠觸覺洗頭。「老闆好好，十多年來無嫌棄我。」
她和丈夫也喜歡小朋友，但醫生說有機會遺傳，所以結婚八年也不敢生育。「後來有朋友兩夫婦都健康，但孩子天生腦已有問題。既然天注定，我諗咁多做咩？」
03年，女兒出世，健康活潑，但唐蓮娜的視力卻愈來愈差。「我起初接受唔到（盲），到差不多完全睇唔到，才肯去盲人中心求助。」
是女兒讓她振作。「我要做人辦，告訴女兒：『就算將來你有事，也可以像媽媽般過正常生活，媽咪得你都得。』」
女兒出世時，還看到她的小臉蛋；今日，唐蓮娜只見到黑和光，女兒的樣子，只能憑記憶和感覺。「我摸到她是眼大大，笑容應該很甜美……」
母親節，願望是甚麼？「入目三分囉，哈哈哈哈哈……」

拿了不少獎杯，唱歌最多，打保齡球也拿過公開賽亞軍。「我哋打時有個欄圍住，但有些視障者感覺唔到條 link，個波碌咗去隔鄰條 link都試過。」 

穿賴屎褲跳 hip hop：「咁多個，我（右一）最型。」 

俾佢自己摸雀仔

她曾是電影女編劇，作品有《失憶𠝹女王》，為生計兼寫鹹古。現定居三藩市，在《蘋果日報》寫親子專欄。 

兒子「摸小鳥」，港媽一定唔准，容雅慧卻例外。
「對自己身體好奇、撫觸感覺舒服乃人之常情。」

容雅慧讀幼稚園時，有個姓陳的同學很愛在堂上「玩小鳥」。有天她跟陳同學說：「好悶呀!不如你玩 X周咯！」於是，他玩他的，她看他的，被老師發現，陳同學即卸膊：「係容雅慧叫我玩㗎！」結果他倆當眾被罰企，那學期容操行拿丁，回家給媽媽罰坐無形櫈。
「摸 penis本身無錯，老師這樣做是將性和羞恥畫上等號。現在我會讓兒子摸，但同佢講，挖鼻孔和摸 penis係好正常，不過在人前做就不恰當。他明白，家裏跟外面不一樣。」容雅慧說。
容雅慧在《蘋果日報》風月版寫了十多年鹹古， 05年還到美國讀性學，她的性教育有別一般港媽。「我在家也不收收埋埋，唔需要着衫時，像沖涼和換衫，就唔着衫。我不特意叫阿仔來看，但他過來也不會避，所以兒子對裸體沒怎麼樣。」
看到容雅慧在戴胸圍， 6歲兒子即滿腦疑問。「點解媽媽你去街帶 bra？」「係呀，在外面露點唔恰當。」「點解你 nipples咁大？」「係呀，因為餵你人奶。」「點解你去廁所有血？」「係呀，女孩子每個月都有幾日會咁， for生 BB，你大個啲我慢慢解釋你聽。」
兒子看到影碟上男女主角接吻，裝着厭惡地說「 I hate it！」。「其實他想我俾 permission佢。我同佢講，接吻是很美麗的事。」兒子聽罷，按 rewind重看了廿次接吻。「人有好奇心，好正常。」

包容非主流

容爸爸在她兩歲時已過身，媽媽再婚，跟後父又生了四個，根本沒時間關心她，更遑論性教育。如何明白性與愛，她靠自己實戰。「我愛男也愛過女，姊弟戀忘年戀，中美歐亞黑，已婚失婚單親也試過。」
在美國讀性學時，從網上結識到美籍商人， 08年奉子成婚， 4年後離婚，現在是單親媽媽。「我嘗試過（結婚），但失敗（離婚）。我不愛束縛，接受自己是非主流，我愛自己。」
所以她教兒子，愛可以分主流與非主流。一次在車裏，車停在紅燈，窗外剛好有兩位女生在熱吻，兒子說：「 They are kissing and they are girls！」聲音大得人家都聽到。
容雅慧說：「 Yes, they are kissing and they are girls, and it is okay.」
「做人，最重要學懂包容。」

兒子的 BB Look。 

3歲半時攝。 

兒子很黐她，說跟她住一世。「我話你大個仔會有另一半，不會跟我住一世的。」

撰文：阮淑賢
攝影：陳偉強、周義安、 Claudia Marroquin、部分相片由被訪者提供
錄像：湯文峯、盧芷斌