陳國峰在店內執頭執尾，食完又會問食客意見，絕無架子。 

試食王

唔做巨聲做拉麵

《超級巨聲》做咗三屆，只係捧紅咗林欣彤同許廷鏗，其他參賽者多數被安排去劇集做二打六，唯有轉移戰線。好似二幫隊長陳國峰，趁拉麵熱潮分一杯羮，喺佐敦開間日式拉麵店巨一麵堂，請來日本師傅坐鎮，又請本地麵廠每日製作麵條。麵店位置唔就腳，新開無耐，七八點晚市最旺時段都未有人龍，但就見陳國峰做人肉生招牌在店內打躉，仲見到狄易達、鄧智偉入 VIP房，唔知邊位？哦，算啦……

餐牌上有 8款拉麵，湯底可選鹽、味噌及醬油味，配叉燒、葱花、玉子及雲吞等作不同配搭，湯底由豬骨及雞骨熬成，終於唔使再食周街都係嘅濃厚博多豬骨湯，算有新意。可惜餐牌寫得唔清楚，每款拉麵價錢唔同，又唔知特製拉麵包咩配料，例如原來牛舌拉麵已有半隻蛋，我唔知情再點多一隻蛋，侍應亦唔提醒，唔夠細心。小店只有十四張吧枱，但職員不夠熟練，來錯拉麵、漏單樣樣齊，都幾混亂。好彩陳國峰親自招呼，殷勤有禮，反而女侍應唔夠醒目，問佢拎紙巾冇咗件事，唔主動斟水，扣分。
至於味道，推介鹽味牛舌拉麵，第一啖有驚喜，鹽湯夠清，帶微甜而且少油。牛舌切得薄身，炆到腍晒，入口即化，牛味亦濃郁，灑上黑椒調味更加香口。味噌湯底香濃，食得出帶沙的麵豉醬，可惜湯底愈食愈鹹，食完口渴足成晚！特別訂造的麵條是直身蛋黃麵，質感剛好夠煙韌，玉子亦入味夠溏心。雲吞是拉麵界新嘗試，皮做得薄身，豬肉餡加入柚子胡椒，味道不錯，敗筆在雲吞湯淡如水。總括來說，同豚王、一風堂等名牌冇得比㗎喇，始終巨一麵堂都帶有港式影子，但至少比坊間一式一樣的拉麵有個性，亦欣賞配料夠創意。如果湯底冇咁鹹會更好，有實力，唔需要靠味精嘅。

通常拉麵店都會供應醃菜或者七味粉、蒜頭等調味料，這裡卻只有黑椒，反傳統。 

雲吞三件$15似中式雲吞，一入口已食得出柚子味，幾特別，但要放入拉麵湯先好食。 

特製味噌拉麵$99已包叉燒、雲吞、玉子及海苔，可拌上韓式辣醬，湯底杰身有麵豉香，但真係好鹹。

巨一牛鹽舌拉麵$80牛舌炆得勁腍身，鹽湯唔油膩，加埋洋葱粒相當香口，玉子入口軟滑。 

叉燒味噌拉麵$85叉燒厚薄適中，賣相亦靚，不過肉質偏瘦唔夠入味。 

小店有十四個吧位，還有一間 VIP房，但唔知係咪只招呼明星客仔。

評分

食物：★★★ 1/2
服務：★★★
環境：★★ 1/2
價錢：★★★

巨一麵堂　地址：佐敦長樂街 28號地下　電話： 2323 0220

試食王

喜歡外出用膳，也喜歡誠實，不相信飲食網站的所謂評分，也怕了所謂食家獲得優待後的意見，情願隱姓埋名，真金白銀，測試飲食雜誌飲食網頁捕捉不到的真實一面。

飲食特務 B
名牌威士忌 wine dinner

愈來愈多人開始欣賞威士忌，英式餐廳 The Pawn將於 5月 14日與蘇格蘭品牌 The Glenlivet合作，推出四道菜配酒晚餐。以傳統蘇格蘭菜式如 Scotch Egg、慢煮鹿肉等，配上 12、 15、 18及 21年的單一麥芽威士忌，比配葡萄酒更有新鮮感。

The Pawn
地址：灣仔莊士敦道 62號 2至 3樓
電話： 2866 3444
日期及時間： 5月 14日 7pm
價錢：$500/位

布根地薄餅
買三送一

法式薄餅專門店 Fleur de Sel，為響應法國五月，推出三款布根地特色口味，用紅或白酒煮成醬汁，配上水煮蛋、法國蝸牛等，仲特別引入布根地紅酒作配搭，風味地道。優惠期間選三個指定口味，即免費送一款甜薄餅作甜品。

Fleur de Sel
地址：中環嘉咸街 51號地下
電話： 2645 9828
注：優惠只限中環分店，優惠期由 5月 1日至 6月 30日

撰文、攝影：試食王