媽媽 Jennifer細細聲哄：「乖乖哋合埋眼瞓啦！」雪兒反抗：「 No！」仲開始踢被、發𤷪𤺧， Jennifer無可奈何，二人陷入對峙僵局。 

親壹親

解救夜瞓細路

細路扭計唔願瞓，不只是你家孩子的問題，而是普遍出現在二至八歲小朋友身上的現象。今期走訪兩個夜貓子家庭，細路愈夜愈活躍，兩位媽媽每晚又哄又鬧，異常困擾，抗戰至凌晨先有得瞓。中大有研究指，香港小朋友全亞洲最夜瞓，父母若不及早為小朋友扭轉夜瞓習慣，長期睡眠不足會對身體抵抗力、血壓、 IQ等構成負面影響。

未玩夠　唔想瞓

雪兒的日間活動偏向靜態，無論食飯、玩玩具時，都牛咁眼盯實電視的卡通片，專家建議增加戶外動態活動，有助晚上提升睡意。 

眼仔碌碌的雪兒今年三歲，性格活潑開朗，得人鍾意。不過，一到夜晚，就變成一隻唔肯瞓覺的小魔怪，令媽媽 Jennifer又愛又恨。 Jennifer大吐苦水：「平時佢都幾聽話，但就係唔鍾意瞓覺，真係激死我，好聲好氣哄佢瞓係無用，成日掛住睇電視，要打要鬧先肯瞓！一日可以瞓得好少，又唔使瞓晏覺，我懷疑佢過度活躍。」 Jennifer懷有三個月身孕，坦言受囡囡影響，睡眠質素不佳，想十二點前瞓都好難。

抗戰兩小時

雪兒每晚瞓前都會飲奶，答應媽媽飲完就瞓，但成日反口，飲完繼續搵藉口拖延。 

雪兒的爸爸平日要朝早六、七點起身返工，所以十點幾就上床瞓覺，不過總係會俾同房的雪兒嘈醒， Jennifer解釋：「雪兒張床仔放在我哋間房，通常十點左右我就逼佢瞓，不過佢都係會不停講嘢或者大叫、唱歌，例如不停講：『媽咪呀媽咪呀媽咪呀……』，我同佢講爸爸瞓咗，唔好嘈醒爸爸，佢都係會細細聲繼續講。
「雪兒應承咗飲完奶就瞓，結果都係反口，一時話喉嚨唔舒服要飲水，一時要去廁所，一時又話好熱或者隻手好痕，總之就會不停搵藉口唔瞓住。我初頭都好好聲氣細細聲同佢講，後尾都係要發惡或者出動藤條，但有時都搞唔掂。尋晚我試過發晦氣講：『算啦你唔好瞓，我唔理你啦，你出廳睇電視睇到聽朝啦。』佢就自己飲泣，先乖乖哋瞓。不過呢招太早用又唔得，佢會話：『好！』然後真係出去睇電視，所以都好睇佢心情。」查實 Jennifer都有一招萬試萬靈，不過「王牌」不能多用，「雪兒最驚就係姨丈，每次我話『如果你仲唔瞓，姨丈就上嚟㗎啦，佢已經去到𨋢口！』佢會驚到即刻瞓。不過我唔想成日要搵姨丈嚟嚇佢，亦唔想每晚鬧到我聲都沙埋先肯瞓。我都唔明，叫佢去瞓啫，又唔係叫佢去死，點解咁難搞？」

眼瞓死忍

雪兒唔肯瞓，原來並非自細養成，而是兩歲左右忽然發生。 Jennifer留意到，雪兒每日五點左右就開始眼瞓，但叫極唔肯午睡，直至七點幾爸爸回家一齊食飯，雪兒邊食飯，眼皮開始下垂，更試過瞓着！但一叫佢去瞓就死都唔肯，立即撐番大對眼扮精神。
訪問前一晚，雪兒半夜兩點幾先瞓，第二日中午十二點先起身，令 Jennifer開始擔心日後返學難以適應。「雪兒今年九月就讀幼稚園，我唯有幫佢報下午班，咁佢可以十一點起身，食少少嘢先返學。」
不過，香港中文大學兒科學系教授李民瞻卻認為這只是短線的解決方法，若夜瞓的習慣不改，升小學後讀全日制課程必須早起，長遠引致睡眠不足的問題。「小朋友睡眠時間不足或睡眠質素差，一般會透過情緒表達，例如心情煩躁、難以專注或坐不定，可能會影響性情。另外亦有研究指會影響新陳代謝，容易肥胖、血壓控制不好，並影響 IQ及專注力。」

專家出招

盡量不在睡前責罵小朋友，如家長理解她不願睡覺的原因是貪玩，宜先肯定她的感受，並表達自己的憂慮或解釋睡眠不足對身體的害處，令小朋友願意合作。如用「媽媽明白你想玩多陣，不過媽媽擔心你……」等語氣。

令小朋友明白睡覺不代表少了玩耍的時間，可用睡醒後的活動來吸引她入睡，例如：「聽朝早啲起身，媽媽帶你去街。」

意見提供：香港復康會適健中心註冊社工兼催眠治療師黎詠雅

話你知

香港復康會適健中心「我要瞓得好」優質睡眠計劃，提供睡眠質素自我評估、睡前鬆弛練習及小運動，幫助入睡。
網址： http://www.hkwellness.org 
keyword：「我要瞓得好」

眼光光　瞓唔着

七歲的晞晞攬住隻大公仔，遮了半邊面，露出一對熊貓眼。 

雪兒有睡意，偏偏無心睡眠。但七歲的晞晞想瞓都瞓唔着，兼且受鼻敏感纏擾，長期鼻塞，睡眠質素好差。每晚瞓得四、五小時，細細個就養成一對熊貓眼。

「典床」三粒鐘

為了令晞晞快些入睡，媽媽 Wing在隔籬扮瞓，不過活躍的晞晞完全無睡意，反而自得其樂繼續引媽咪傾偈，媽咪瞓着佢都未瞓！ 

今年讀小一的晞晞，每朝要六點九起身梳洗返學，但全無睡意的她，每晚都要在床上「碌」三個鐘先瞓着，所以媽媽 Wing晚上九點左右就會熄晒燈，趕晞晞上床瞓，預時間俾佢「典床」。「我儘量避免同佢講『你好瞓啦。』等說話，為免有壓力，而且你一撩佢講一句，佢會答你十句，更加瞓唔着，只能夠唔理佢。不過佢好識自得其樂，拎住兩隻公仔傾偈、作古仔，笑到咔咔聲。晞晞性格比較多嘢諗，有時就自己在床上諗番剛睇過的電視情節，完全無合埋眼瞓覺的意慾。」
Wing一直唔明白囡囡何解可以瞓得咁少，「佢一日上八堂，照計好攰，點解會無睡意？」 Wing是單親媽媽，獨力湊兩個女，晚晚陪晞晞瞓着先落床做家務，有時凌晨三四點先瞓。

鼻塞瞓唔好

小朋友夜晚扭計不肯睡，主因係精力太充沛，專家鼓勵父母每日帶小朋友去附近公園跑跑跳跳，「放電」半至一小時，有助消耗體力，晚上較易入睡。 

「試過一次想佢快啲瞓着，無可奈何之下趕佢出廳罰企，出面已熄晒燈，晞晞怕黑所以好驚，喺廳大喊成個鐘，入房後攰到立即瞓着，呢個係令佢最快瞓着的方法，不過好殘忍，所以免得過都唔想用呢招。」
晞晞有嚴重的鼻敏感，每晚瞓覺都會鼻塞，睡眠質素奇差，「佢每晚都要用口抖氣，搞到嘴唇好乾，最近鼻鼾聲好大，瞓瞓吓會好似『濁親』咁扎醒，令我有啲擔心。」 Wing為了緊密留意囡囡的睡眠情況，近幾個月同佢一頭一尾孖鋪瞓，「第二朝叫醒佢都幾困難，我喺佢耳邊嗌佢都完全無反應。可能因為自細就唔夠瞓，身體孱弱，愈大愈瘦，每月病幾次，更試過因甲型流感、肺炎等病要入院。」

協康會資深兒科物理治療師張威文解釋，晞晞因睡眠質素惡劣，以致抵抗力弱，令鼻敏感問題加劇，睡眠狀態更差，兩者形成惡性循環。晞晞除了要睇醫生，亦應從生活行為方面改善失眠問題，如嘗試不看電視數天、增加日間運動量，若情況沒有改善，須接受失眠治療。

專家出招

嚴重的鼻鼾問題可能是睡眠窒息症的警號，宜找專科醫生作詳細檢查。
戒「典床」、減少床上活動（如玩玩具），令小朋友建立「一上床就要瞓覺」的習慣，睡不着時就落床。
試用意象鬆弛法，教囡囡合上眼想像，例如：「將你諗緊的事，好似放風箏咁將佢慢慢放走。」或者教她想像一個舒服的地方，讓她放鬆自己，慢慢睡着。

意見提供：香港復康會適健中心註冊社工兼催眠治療師黎詠雅、協康會資深兒科物理治療師張威文

話你知

如小朋友調整生活後仍未能解決失眠問題，協康會有資深兒科物理治療師提供「耳穴貼壓治療」，幫助經常出現失眠症徵狀，如難以入睡、易醒、睡中磨牙的小朋友。
網址： slp.heephong.org
keyword：「個別專業評估及治療」>「兒童失眠症耳穴治療」

撰文：吳穎湘
攝影：陳健邦