高人一等紅豆冰$20以刨冰機刨成特長冰柱，加入紅豆沙及黑白淡奶，依照舊式做法，飲落淡淡的豆香加香濃奶味，湧現兒時回憶。

庶民飯堂

香港八幾……

戴卓爾夫人過身了，又吹起懷念港英年代的回憶風。在天后新開業一個月的香港 80's冰室，老闆 Tommy索性將八十年代的收藏品，濃縮在店鋪裝潢中。牆上掛滿他至愛的精品，包括《回到未來》電影海報、中森明菜唱片封套、啟德機場及皇后碼頭照片等。「八十年代開心啲，不公義好似少啲。」點止，嗰陣時大家仲敢言啲添。

有兩個兒子的 Tommy，未做飲食業前是一名音樂製作人。「我玩爵士樂結他，曾監製兩隻唱片，做過演唱會幕後；四年前細囝出世，令我開始想轉型，始終有份實業穩陣啲。」冰室推出十多款茶餐、常餐，配搭屬街坊口味，如叉燒意粉、雞絲湯通粉，但 Tommy會揀重身牛骨熬湯，飲落有鮮味，夠誠意。還有自家製鹹牛脷，用巴西貨，先浸個半鐘，人手刮走脷胎，再用自家上湯熬煮幾小時而成，味道帶鹹卻開胃。還有十多款懷舊飲品，經典的忌廉溝鮮奶、滾水蛋、薑煲檸樂通通齊備。齋懷舊， Tommy仲嫌未夠，預計五月起晚市轉賣糖水，「我想喺鋪頭搞 live，請好朋友 jam歌，客人邊聽邊食糖水，幾有 feel！」 Tommy講到笑不攏嘴，八十年代真美好。

常餐（番茄濃湯火腿雞絲意粉、炒滑蛋配火腿、牛油多士）$32很少吃茶記意粉，會連湯汁都撈埋，足見用牛骨熬過的湯底好飲。炒滑蛋用了北海道 3.6牛乳，很香滑。

招牌豬扒配薯仔沙律$32（茶餐配凍橙檸加$17）豬扒用蛋汁蘸粟米粉炸，食落零舍嫩滑、肉汁豐盈。沙律用新鮮薯仔及生果，配鮮橙汁加檸檬，小朋友至愛。

自家鹹牛脷包$28牛脷煮得入味，鹹鹹哋卻不會太膩。麵包如果再鬆脆點更佳。

開鋪前， Tommy在網上用五千多元競投一部舊式卡式收音機，再駁埋 iPad，變成店鋪音響。好多七十後客人見到後勾起不少回憶，有如另類招財貓。