媽咪姐

求愛大作戰《求愛》番外篇　 Whitney黐仔上癮

追女真人騷節目《求愛大作戰》班盛男唔多掂檔，好在有「綠魔」 Karl掀起話題，平均收視先企得住廿點。今周結局篇，眾剩女為溝仔進行大廝殺，大隻國產女 Vivien同爆瘡妹 Sharon會夾擊索女 Whitney，搞到佢眼濕濕話：「佢哋真係好下流！」唉，不過媽咪姐就覺得有啲嘢自己攞嚟嘅。之前有傳同 Mia前夫拍拖嘅 Whitney，逢異性都嗲，甚至連幕後人員都唔放過，所以班女仔唔多妥佢。

早幾日《求愛大作戰》先喺灣仔某酒樓搞慶功，之後再轉到附近酒吧唱 K直落。節目中嘅「冧仔王」 Whitney車輪轉向三位盛男發功，喺佢哋身邊挨身挨勢，不過都係得阿 Guy理下佢（據聞阿 Guy之前有 date下 Whitney，但 Whitney臨時話病，唔出街喎！）。悶悶不樂嘅 Whitney惟有黐住班幕後行，其間忽然有一陣怪風吹過，着住白色裙仔嘅佢㩒都㩒唔切，好在有個男幕後幫佢㩒裙底，證明仲有魅力！不過大家追開《求愛》都知班 so-called「女神」，個個都想食「大茶飯」，呢場「仗」仲有大把嘢睇呀！

Justin唔受Justin屋企做紅酒生意，幾位盛女都好嗒佢糖， Whitney唔執輸，趁過馬路嗰陣想繑住佢。點知男方唔受喎，仲行快兩步，拉開距離。

Rocky縮手Whitney猛撥頭髮， Rocky出手……攬住自己嗰 8塊朱古力！掂都無掂「女神」。

阿 Guy執雞愛情顧問陳定邦教班男仔要借啲意同女仔有身體接觸，讀到博士嘅阿 Guy最受教，見 Justin唔理 Whitney，即刻出手搭實。