Derek跟 Rain未甩拖前，二人在 IFC行街，不過當日他全程面黑黑，全程只顧向前行未有理女朋友。而日前跟李詩韻食晏，他又著住同一件粉紅色「溝女」 tee。
兼職疊碼仔
兩年前與從事保險業的王傲山分手後，李彩華去年三月與 Derek正式拍拖，兩人感情穩定， Rain曾一度放聲氣想嫁，以為終於搵啱對象，怎料兩人卻因財情變，分手收場。
「早排 Derek喺澳門兼職做疊碼仔，佢見阿 Rain細佬做疊碼仔好搵，諗住齊齊拍住上，拉到客就分佣。」知情人士說。
如 Derek所料，這份高薪兼職的確收入豐厚，轉眼間便有數百萬進賬，但好景不常，有次 Derek做中間人，介紹契妹的媽咪往澳門賭錢，結果輸掉一千五百萬無錢還。「佢做疊碼仔，客仔走數要上身， Derek要嘔番之前賺嗰幾百萬，仲要諗計搞掂剩低嗰一千萬。」
去年憑內地劇《回家的誘惑》翻生的李彩華，拍劇身價升至二十萬一集，連同廣告收入，豬籠入水，年前還先後買入兩個物業。見女友「疊水」，被人走數的 Derek，於是開口向 Rain求借千萬，但賭債難追， Rain擔心血汗錢一借無回頭，於是拒絕；點知 Derek無錢唔要人，當場發爛嗌分手。
夜蒲溝女
與 Derek拍拖一年多，表面幸福的 Rain，實際上要經常忍受 Derek的少爺脾氣和風流性格，孭住欠千萬街數的他，近日仍生活富貴，開着價值百萬的瑪莎拉蒂名車出入。日前， Derek相約李詩韻、莊思明、任葆琳等一班蒲界好友到中環開餐，之後再到夜場消遣直落。
「其實 Derek同阿 Rain拍拖嗰陣，照樣喺外面溝女，對李詩韻特別殷勤，仲主動幫佢搵到時裝做贊助。」知情人說。
備受情傷的 Rain，對於因財分手事件，只說：「好失望、好痛心，同埋好傷心。」提到 Derek轉追李詩韻，她開始失控：「同 Derek冇再聯絡！」之後痛哭失聲，收線不肯再作回應。
專吼女星
前度情場得意
Rain受盡情傷，反觀前度男友王傲山（ Marcus）情場得意，二人分手後，王傲山先與亞視撰稿員 Karen Ng拍拖，之後搭上馬來西亞靚女；不久後又狂追有線娛樂新聞台女主播劉明軒，王傲山本想一腳踏兩船，但心水清的劉明軒堅持搞清關係，到王傲山飛甩馬來女友，今年初兩人才正式拍拖。
「劉明軒 mark得 Marcus好實，就算男友出外公幹，佢都會請假一齊去，今個月佢都陪咗 Marcus飛摩洛哥做嘢。」知情者說。
監視男友有一手的劉明軒，也試過失手。當年與恒生銀行創辦人何善衡孫兒何乃斌拍拖，兩人○三年聯名持有價值二千二百萬淺水灣道三號二千呎別墅，○九年分手，何乃斌入稟要求劉明軒歸還業權，當時法官建議雙方和解不果，去年劉明軒被判敗訴。
「劉明軒最初諗住有錢人怕煩，唔會糾纏，自己無 咗層樓都應該攞番筆錢，點知貪字得個貧，仲要俾多百幾萬律師費，好在男方嗰七百萬律師費唔使佢俾，唔係仲傷。」知情者透露。
留言列表
