唔可以出鏡
薛可正做訪問不肯見樣亦不願透露真名，他說：「我想將寫書同真實嘅人生分開一啲，本書寫嘅已經過去，我𠵱家係一個好幸福有個好家庭嘅人。」
搜尋氣
《男人唔可以窮》出書 作者薛可正：女主角最好搵薛凱琪
繼《一路向西》、《紅 van》之後，高登再有爆紅網絡小說出書，最近勁 hit的作品《男人唔可以窮》冇召妓、冇市民失蹤，講男主角薛可正望見女友登上別人的名貴跑車開始，至爸爸患癌病逝，發現作為男人絕對唔可以窮，於是寫下這個有血有肉的自傳式故事，唔少熱血高登仔睇到喊，出書一個星期已加印第二版。
幾年前「窮」過，薛可正現已 33歲，短褲 T恤典型毒男 look，但其實他現時婚姻美滿，有個五歲大的兒子，同時協助太太爭取跟前夫所生兒子的撫養權，他說除咗講錢，男人鬥志更加唔可以窮！
本書開頭寫咗好多前女友嘅嘢，有同太太傾過㗎，佢亦詐過型！其實愛情嘢只係引子，爸爸走嗰段至令我想寫出嚟，佢 07年證實患腸癌，醫生話切咗就 ok，我以為冇事，後來仲同佢嗌大交，痛都唔帶佢睇醫生， 08年食團年飯至知原來佢未好番， 2月癌症復發，但我已挽救唔到；佢 6月離開，我 5月做爸爸，好大感慨！第時個仔點對我呢？我唔想父子關係有個咁大遺憾，惟有寫出嚟發洩。
本書寫嘅「窮」係代表一個男仔成長，鬥志呀、錢呀、責任感呢啲都唔可以窮，唔可以再任性！書入面有寫我做倫敦金賺好多錢，但賺到錢反而令我內疚，辭職之後賣咗架寶馬，𠵱家開咗間食肆，生活上唔缺就得，起碼去吓旅行，買到件玩具畀小朋友，呢種生活已經好足夠，冇嘢緊要過屋企人！
𠵱家想買架家庭車，冇再話要威囉！想有架闊落啲，個仔上車都開心啲，呢樣係做爸爸嘅滿足感，諗番以前爸爸係咪都有咁諗呢？最大嘅遺憾係唔可以問番佢喇，我𠵱家搵幾多錢都畀晒老婆，因為我成日要返大陸入貨（燒烤店食材），費事佢懷疑我返大陸叫雞啦，所以我入 2,000蚊貨，最多都係帶 2,300蚊上去。
𠵱家最重要係幫太太爭取番佢個仔嘅撫養權，因為佢前夫吸毒，我覺得要盡做丈夫嘅責任，我亦唔介意阿仔多個阿哥。
冇諗到拍電影咁遠，如果真係，我希望自己寫番劇本，女主角最好搵薛凱琪啦，我鍾意佢！
薛可正去年在高登連載時並冇諗過出書，點知高登仔不斷叫好兼 share，至於拍電影，薛可正話最想由薛凱琪演女主角以娜，以娜是貪錢前女友，唔知 Fiona制唔制呢？
他正在討論區寫緊 part 2，為了宣傳新書開了新 facebook帳戶，由於唔想出鏡，結果接受高登仔提議，用咗老婆喜歡的竹野內豐來做大頭貼。
採訪、撰文：何志衡
攝影：攝影組
留言列表
