close


製作資源總監樂易玲：May姐養尊處優啦！真實對白戲劇製作總監曾勵珍：你放支針喺我度！真實對白《蘋果日報》圖片

隨住陳志雲離職、六叔六嬸退休，無綫高層黨派之爭愈演愈烈！最近有傳主持《May姐有請》的前無綫高層馮美基，將被召回巢，原來係當年共事的好姊妹高層曾勵珍拉線，為求阻止宿敵樂易玲坐大。消息一出，樂小姐當然大怒，實行出招同珍姐鬥個你死我活。講起May姐，樂小姐寸嘴：「佢養尊處優啦！」擺明唔想May姐阻住晒。三個女人內鬥，好睇過重頭劇啦！


自陳志雲離開後，無綫只剩樂易玲和曾勵珍兩大陣營，而樂小姐加薪4成後要兼任電影及演唱會等工作，勢力擴張比珍姐快，難怪有人要搞小動作。 本刊得悉，去年本有意離職的樂易玲，敵不過TVB加人工4成的誠意，雖然加薪後樂易玲要兼顧電影部，一人兼兩職呻笨之餘，另一方面卻令樂易玲勢力更大。據知近期已有不少藝員經常在化妝間公開讚揚樂小姐，實行提早歸邊博有運行。

留任呻笨
樂易玲勢力大，但據知無綫另一高層、戲劇部總監曾勵珍亦開始拉攏早年一手開創藝員部的May姐馮美基做顧問。知情者說：「珍姐同May姐好熟，極力向主席（梁乃鵬）同殼王（陳國強）推薦May姐，目的係加多個自己人入朝，講嘢都有power啲。點知單嘢傳番去樂小姐度，樂小姐嬲到話要搵個人返嚟頂珍姐，但佢心知唔可能，最多擺條針喺戲劇部收風咁囉，總之有排鬥。」

愛將唔敢多口

珍姐缺席
上週四（15日），身為珍姐馬房的前頭馬監製劉家豪和梅小青兩公婆為離巢過now而舉行餞別宴，但偏偏身為兩人頂頭上司的曾勵珍冇現身，更有說劉、梅兩人已與珍姐反面，刻意不請這位前上司；反而樂易玲在餞別宴上分外風騷。對於May姐回巢，樂易玲反應甚大：「真係有接觸過May姐，但只係希望佢再拍新一輯《May姐有請》。佢肯入嚟幫手就真係好喇，但係佢養尊處優啦！前輩嚟㗎，記得嗰時我喺第二度搞電影時，都係打畀May姐度演員期㗎。」至於同珍姐鬥法，樂小姐就話：「我同珍姐都係主管級，但佢一定大過我，因我嘅部門係服侍佢哋嘅！」至週一（19日）TVB大晒冷，6齣新劇包括《怒火2》、《金枝貳》等演員出席國際影視展，樂易玲與珍姐兩大「世仇」同場，珍姐則回應：「你放支針喺我度、我又放支針去你度，邊有咁多嘢挖呀？」淨係聽你兩個講嘢都夠寫個長劇啦！

金牌監製餞別恩怨
樂易玲暗鬥珍姐，雖然大家都唔肯認，不過上週劉家豪和梅小青兩位前珍姐頭馬搞餞別宴，竟然冇請珍姐，反而同樂易玲握晒手。梅小青解釋點解唔請珍姐時，更不停耍太極，似乎真係同珍姐唔啱嘴形喎！ F：《FACE》 梅：梅小青 F：點解得樂小姐嚟？梅：張枱得22個位，主席（梁乃鵬）由得我哋揀人選，請唔晒咁多人。 F：冇請珍姐？梅：製作部（珍姐部門）會陸續約食飯，有啲排到返新工至食。 F：有冇約珍姐呢？梅：（刻意避開問題）Stephen（陳志雲）、李寶安都不停約我哋。 F：咁珍姐呢？梅：Stephen叫我哋留低，但仲早過我哋走，李寶安仲送咗禮物畀家豪添。 F：係咪冇約到珍姐呢？梅：唔只佢，會陸續食飯嘅，唔想公開，在心中啦！

潘霜霜遊街避林峯
週一（19日）會展舉行國際影視展，TVB出動林峯、黎耀祥、陳豪等十幾位演員壓場，聲勢浩大，連事先張揚於會展出席電影《名模》開拍記者會的潘霜霜，情願甩底記招單拖到銅鑼灣shopping亦不敢踩場。問到林峯是否無綫施壓避免跟前女友同場，林峯說：「呢啲要問番公司先知喎，其實事隔咁耐，見到都唔介意打招呼。」 ####


馮美基（左）主持的《May姐有請》口碑不俗，惹來回歸TVB傳聞，樂小姐表示May姐於下月初回港，一切自有分曉。


陳志雲去年宣布離任，本月初突然轉投商台，暫別電視圈，變相令樂易玲手握大權。《蘋果日報》圖片


有傳樂易玲的則師老公陳君毅（左）怕她壓力大，曾勸她辭職，但TVB加薪挽留，不過樂小姐卻工作量大增，大呻比以前更辛苦。《壹週刊》圖片


陳豪：對與錯、是與非都唔理，唔理是是非非，我只係喜歡TVB工作。


馬國明：相信唔係鬥氣啩？邊個好啲？唔敢講！


徐子珊：有冇咁複雜呀？兩個都係高層、兩個都好錫我。


玉女伴太后 15/3上週四（15日）TVB監製梅小青和老公劉家豪發辦請座上客，主家席有22人卻冇預曾勵珍。徐子珊、楊怡及鍾嘉欣到達飯局會場，一見樂易玲即第一時間過去寒喧，可見樂小姐地位非凡，唔熟絡冇運行。


樂小姐亦好識照顧藝員，走到鍾嘉欣旁邊密談私事。


19/3週一無綫在影視展大晒冷，珍姐照顧藝員上台影大合照，樂小姐一個箭步上台，卻擋在珍姐旁邊，連高層都爭位。


見勢色唔對，樂小姐才讓開給珍姐「歸位」，似刻意避免再傳是非。


行政主席梁乃鵬（左）表示有打算請高層來飯局，但不知兩位主角會請邊個：「佢哋話事，樂小姐嚟，我唔覺得奇怪。」


林峯出席影視展同時，本來要在同場宣傳《名模》電影的潘霜霜，竟然出現銅鑼灣買金飾（右），唔通受壓要去購物發洩？


之後潘霜霜又去了銅鑼灣地帶揀bra，一副失落的樣子。


林峯唔認TVB施壓迫舊愛缺席，但上台時頭耷耷，似乎有點心虛。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄