上星期五Kay（16日）到中大講talk時一臉落寞，睇嚟仍然為解約一事煩爆！

謝安琪（Kay）同唱片公司環球仲有3年先約滿，但早前已不斷傳出Kay經理人夏森美唔合作，甚至瞞住環球私自同其他唱片公司接觸，辣　環球董事總經理黃劍濤（Duncan），Kay要賠足400萬換自由。不過實情係謝安琪方面一直想「好來好去」，但仍被咬住唔放，據知近日Kay已就贖金還價，但環球寧取拖字訣仍未回覆。慘被綁死的Kay一日未成功解約，一日都冇得出唱片，天后都要罰停唱。


35歲的謝安琪06年簽約環球，加入後即備受公司力捧，即使07年生完囝囝張瞻，但09年憑〈囍帖街〉紅爆升呢做天后，坐穩一姐位。

決裂真相
可惜上位後連環不幸事件接住發生，整容隆胸態度差，又與同門陳奕迅傳出婚外情，令謝安琪事業跌落谷底。加上環球同謝安琪經理人夏森美（Sammy）唔啱嘴形，高層黃劍濤去年決定打Kay入冷宮，將資源轉移到由金牌過檔的吳雨霏身上，今年1月謝安琪紅館騷更加冇環球歌手捧場，擺明決裂。黃劍濤與夏森美不和，據知導火線在於上年一件小事。「Duncan有次夾好咗想阿Kay配合宣傳，傾好晒之後先通知Kay嗰邊，Sammy覺得唔係好啱阿Kay做，一口拒絕咗，Duncan覺得好冇面，兩個之後更加唔妥。」知情人士透露。

拍戲搵到食
合作唔到，雙方幾個月前開始傾解約，據知環球提出要謝安琪賠償400萬，而夏森美亦已經還價。「Duncan覺得人急佢唔急，即使拖住先都冇乜所謂。」贖金未有共識，好在爆過肺的謝安琪生命力強，停唱都唔愁冇工開。「其實阿Kay都想盡快解決件事，家呢段時期，佢惟有轉去拍戲，一樣搵到食！《大追捕》票房唔錯，連安樂電影老闆睇完後都好欣賞Kay，講明一定會再合作；下個月又會同泰迪羅賓拍一套社會寫實片，片約接唔停，所以Kay真係未驚過！」不過唱歌始終係Kay老本行，週一（19日）出席活動時都忍唔住話：「自己都怕出唔到碟，會叫經理人快啲搞掂件事。」而夏森美則說：「家同Duncan商討緊繼續合作定係買回餘下合約嘅可能性，所以一切都唔方便回應！」

追住打
同環球擘面，謝安琪惟有靠自己同經理人殺出血路，偏偏Duncan追住打，每當Kay有好事發生，突然就會有不利佢的消息傳出，咁似豬狼選戰嘅！

玩孤立
今年1月舉行演唱會前夕，突然爆出Kay會拎300萬同環球解約的消息，開騷當日，環球歌手更全體玩失蹤，連有親戚關係的張敬軒亦no show，Eason同Kary又自稱唔舒服去唔到，而Duncan只係到一到後台，騷都冇睇就閃人！

再狙擊
《大追捕》成績理想，截至週日收6百幾萬，但電影首映後幾日，即有報道指Kay要賠400萬贖身，又指Kay 05年試過為轉會環球而同Avex主動解約，暗示Kay誠信有問題，但實情Kay當年與Avex並冇唱片約，擺明抹黑。


有雜誌列出謝安琪三宗罪，指佢唔配合公司宣傳、私自接觸其他唱片公司，又話Kay有解約先例一向麻煩。事後Kay及經理人立即發聲明澄清。

中大講talk自爆抑鬱
愛與年輕人交流嘅謝安琪，出席講座時主動同學生合照，十分親民。

Kay：命都保唔住
謝安琪上週五（16日）出席中大「音樂人生」講座，其間主動提起3年前患上抑鬱症，又唔介意講囝囝，唔似其他「偽人」乜都收埋！

想跳樓
09年我患咗抑鬱症，不停聽到有人同我講嘢，係一啲唔識嘅人，講埋啲好惡意嘅說話，仲有把聲叫我「跳落去！」我當時覺得自己連命仔都保唔住！

學MJ
作為家長，我好怕小朋友成日曝光，我曾經諗過學Michael Jackson用布蒙住阿仔塊面添！同埋我對住個仔有時會好忟，反而張繼聰就有耐性好多！

要現實
人生唔使懶浪漫，雖然有夢想係好，但如果搵唔到食都要放棄，始終人都係要現實啲！ ####


'10撐場前年謝安琪攞金唱片，除經理人夏森美（左一）和周博賢（左二），環球高層黃劍濤（右一）亦有到場支持，但今年初Kay搞演唱會就連影都冇，反面唔認人。《蘋果日報》圖片


'12冇影謝安琪上週35歲生日，老公張繼聰為佢包場搞生日會，唔同公司嘅方力申、方大同有份出席，反而一個環球歌手都唔見。


泰迪羅賓去年前憑《打擂台》贏得金像獎「最佳男配角」，謝安琪可以同佢一齊拍戲，肯定大把嘢學！


09年無故傳出同Eason婚外情，Kay話接受唔到呢啲無理嘅黑心攻擊，仲搞到有抑鬱症。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄