《大太監》飯局，「太監五虎」中，只有黎耀祥被記者爭影單人相，曹永廉扭計：「冇人影我單頭！」黃浩然說：「影咗都唔出啦，畀心機啦！」兩人相視而笑。
十年前，黎耀祥陷事業低潮，黃浩然是杜琪峯新貴，《PTU》海報中，他企得比主角任達華還要前。數年間，劇情峰迴路轉，資優生沒有拔尖，試過九個月開不到十日工。「被杜Sir鬧就多，怎會是資優？」轉戰電視，「給自己last chance，『的起』心肝再學過。」
重讀生努力洗底，不忘飲水思源，「希望杜Sir退休前我磨利咗把刀！」
蔡加讚一句「成功需苦幹」，網民嗤之以鼻，有玩具大王蔡志明作父，汪圓圓為未婚妻，贏在起跑綫上，少不免令平民產生「吃不到的葡萄是酸的」心態而揶揄一番。換個例子，黃浩然天生靚仔，有觀眾緣，1997年金融風暴之際，被杜琪峯發掘參演《十萬火急》，大概睇中他兩者兼備，有潛力，但不到十年敗走影圈。「我從沒幻想過會飛黃騰達，那時我演得不夠好，咪要再學過囉，我不信僥倖，成功需苦幹，一定的。」聽落順耳得多。
重讀生
由電視出身的電影巨星比比皆是，黃浩然調轉行，乃現實所迫。「做電影那十年，慢慢做到冇飯開，影圈容不下我，那時電視有機會給我，博埋睇下有冇機會，再衰真係要轉行。我當然想再同杜Sir合作，但我做不做到他想要的？他幫到我之餘，我都要幫到他，他才會找我。」
02年開始替亞視拍劇，07年轉投無綫，資優生變重讀生，背水一戰份外賣力。「找我演的劇，九成我都會接，沒努力過不會成功，我沒有接受過正統戲劇訓練，入電視，正好鞏固所學過的。不論成就，學習態度好緊要，做演員要有紀律操守，杜Sir教的。」
考第十
想當年，陳豪在影圈比他頹得多，如今左手一杯咖啡，右手一個陳茵媺，現為視帝戰常客。「阿Mo是我同輩中的頭號偶像，無論工作、待人處世，都做得十分好。」不同的是，陳豪是親生仔（經理人合約藝人），遊戲會易玩些。「這一刻我和中國星還有合約，二來現在大家合作得很舒服，都OK。」
很OK，去年憑《拳王》以非親生仔身份躋身視帝十強，算是突破。「我當考第十，但我自知有好大距離，你畀個獎我都受之有愧。做戲做到黎耀祥咁，收視保證，是我的目標，成就作別論，但別人一聽你個名，已經知好睇，這樣很重要。」馬國明O嘴那晚，黃浩然志在參與，同樣開心。
撰文：莫志樑
攝影：林良明
留言列表
