今日好玩嘢

至冧小禮　一手造成

2013年02月06日 ~~ 第298期 Face

情人節就快到，要冧盡另一半，靠自己落手整先顯得有心思。巴打一於自製型味十足皮革小物送畀女友，不過唔好整 SM皮衫喎！絲打方面最正路當然係織冷衫啦，如果怕功力未夠、時間更加唔夠，新興有班教織細細件毛冷小飾物。 D.I.Y.臨急抱佛腳，其實唔難。

皮革自作自用

成個工作坊係兩男兩女負責（左起： O’Neal、 Germany、 Faiz、 Tracy），各人都話男女各有優點，好似女仔整女性用皮具時零舍有天分，男仔力度夠，某些工序較快手完成。

手作皮革，真係好易令人迷上。好似 De Leather工作坊 4位負責人咁，只係試玩一次，就覺得造成一件可用小物嘅滿足感好大，索性夾份自設工作坊。負責人 O'Neal話：「造皮革嘅工具比較多，但基本工都唔太複雜，最多有時要用力打釘孔，有心要學都好快上手。」而且皮具好多時較男性化，所以引到唔少男仔嚟整皮具送畀女友。就算自問冇乜美術同手工天分，負責人話整一個簡單八達通套，頂多只需要 1個鐘，而且有導師睇到實，完全唔使怕失手。 




整皮具最好揀植鞣皮，做出來嘅皮具用得耐會慢慢變色，好有味道。 Faiz同 Tracy拎出自己同期製作的皮革銀包，深色係男孩 Faiz的銀包，因為長期放褲袋多磨擦，所以出現漸變的深淺色變化，愈用愈靚。 

上堂有法

趕住要學，可以上專頁，聯絡幾位導師約時間上堂。整一件情人節小物的課程約 4小時，每堂最多 8人。而做唔同皮具收費都唔同，以八達通套為例約需$420（包材料）
網址： http://www.facebook.com/Deleather 

學整自家皮套

入門學整皮具，整個八達通套畀另一半日日坐車拎住用，唔錯。紙樣只係一個長方形，夠晒直接。即睇步驟！


FACE八達通套


1.裁皮
沿住紙樣用裁皮刀剪出形狀，皮料有厚度，要用力握刀、慢慢裁出皮革。刀鋒記得微斜約 10度，咁皮料條邊先會筆直。一共需要剪出底面 2塊長方形皮料，非常簡單。


2.壓線
用一把類似夾嵌嘅壓線器，壓出一條線，標出將要縫紉的位置。


3.壓窿
用白膠漿將兩片皮料對位黐合定位，然後就進行壓窿工序，方便穿線。整個動作好似搥釘咁樣，但支釘就名為菱斬，另一端好似支叉咁，有 3個尖位，搥一下就可以壓出三個窿。


4.穿線
之後用粗身蠟線將兩塊皮縫合。呢種叫交叉法，即係一條線的頭同線兩端都要穿上針，如圖喺皮套兩面各自縫合。


5.修邊
於皮邊塗上床面劑，然後以修邊樁慢慢磨，將皮革邊磨得平滑。


6.壓字
最後又係好似搥釘一樣，逐個字粒壓上皮具。可以壓名、寫字句，有心思過送刻名 iPad啦！

暖入心毛冷小禮

織個心畀情人，一定冧！

整皮革又搥又磨，女孩子未必夠力水。絲打唔想年年都做織女，來來去都係冷衫、頸巾，仲怕收嗰位只係扮驚喜。搞搞新意不如改織毛冷小禮物，比如心形手機飾物，貼身又窩心。 

學師有法

想跟 Esther學織小物，可以上其專頁，會不定期開班教學。 2小時課堂，連材料收費約$450，織女必睇。
網頁： http://www.facebook.com
keyword search： knitteresther 

細小就是美　編織小物超簡易

細細件嘅毛冷禮物，唔使織到大大件，𠵱家先郁手都唔算遲。而且織一件嘅時間比較短，織夠一對玩情侶裝都冇問題。呢類小物冇冷衫頸巾咁覺眼，就算織得未算好靚，對方日日跟身都唔會反感。今次就搵到編織達人 Esther，教各位絲打以勾針法整心形匙扣，其技巧要求跟織針相若，加上勾針勾一下有成 15mm闊，比起織針織一下約 5mm闊，可以更快完成、更有成功感。整一個心形毛冷匙扣只需個半鐘，好啱新手學。
Esther話好多時學生常犯錯誤都係漏針同數錯針數：「前者就搞到個心形有一個個窿，後者就會搞到個心形走晒樣，歪歪斜斜。」熟習織法後，透過加減行數，就可以做出各種唔同形狀。想再進一步， Esther話自己都係睇書或者上網參考其他高手嘅設計，其中佢最鍾意一位英國高手 Patricia Roberts，設計出各類形 3D畫，值得一睇。


學勾針嘅織法唔難， Esther話第二步就係學打圈同併湊唔同顏色嘅織法，之後就可以自己設計唔同款式嘅毛冷小物。


同幾位手作師合辦嘅工作坊「木星基地」，擺咗唔少 Esther作品，好似呢隻毛冷公仔， model一見到猛咁話要學。


學織小物的工具好簡單，基本的勾針、公仔棉花同毛冷，對勾針同毛冷要求唔高的話，買齊全套都係一百蚊有找。

勾心匙扣逐格睇

1.勾針起步針
同一般勾針的起針法一樣，先整出 U形手勢拎實毛線，勾針與線相對繞一圈轉出第一個結，然後再反方向圈多個圈，勾實毛冷穿過，如此重複就會令毛冷織出類似嬪辮的 pattern。 




2.短針塑形
起好針，就要慢慢用短針織出心形。短針織法都係相類似，先用勾針向毛冷篤，勾起一個環，再以毛冷線繞住勾位，拉一拉就穿過個環位。心形最底只需 1針，每行加 2針，即 1、 3、 5針加上去，最闊的位置只需 11針。 




3.塞棉花
織到 2塊心形毛冷，就可以用收針合併。最簡單的方法可用毛冷以縫紉方式縫埋。縫到咁上下就可以塞入棉花，所需嘅棉花約 4個拳頭咁多，而且仲要逐下塞入先至平均。 




4.縫字
整好個心形，可以用一般繡花針縫上飛佛字樣，唯獨係揀針時要用針孔較大讓毛冷先可以穿過。 

Model玩後感

之前有織過頸巾嘅 model Waye，今日初學勾針，佢就猛話好好玩。「開頭學手法真係有少少難記，不過慣咗個動作都好快上手。咁快可以織到一樣嘢出嚟真係好開心，我下次想學織隻公仔送畀人。」 

奴 COMMENT

全世界得一個
如果可以造一個皮革手機套都幾好！一來有自己心思，而且全世界只有一個，這個提議不錯！自己試過做蠟燭送畀人，織頸巾就少嘞！收過好多禮物，最難忘係小日記，對方將每日生活點滴記低再加即影即有同我分享，𠵱家仲好好 keep住㗎！睇番都好窩心！不過農曆新年咁多假期，要快手報堂學整，整得唔好仲有時間去諗 plan B氹對方呀！ 

撰文：鄺浿鏇
攝影：彭自維、攝影組
模特兒： Waye@GME