何俊仁議員有飼養寵物，他十分支持成立動物警察，為動物爭權益。

Petbook

何俊仁　與狗同眠

2013年02月06日 ~~ 第1098期交易通．搵車快線

任職超級議員的何俊仁，經常要開冗長會議，公餘時間要陪家人之外，仲不會忽略他的愛犬豬仔，雖然 12歲大的豬仔是收養回來，但何俊仁對牠寵愛有加，除了不時抽空帶囝囝散步、玩耍外，仲晚晚與愛犬同眠。

豬仔雖然是從狗場收養回來，但何俊仁夫婦對牠寵愛有加。

採訪當日，何俊仁議員中午剛剛參加完一個爭取設立動物警察的遊行，一返到屋企，就和八哥狗豬仔嬉戲，可惜豬仔愈叫愈走，不過何生一出撒手鐧──水泡餅，豬仔即刻狂奔過來。「豬仔好為食㗎，咩都鍾意食一餐，可能由細到大，我哋咩都畀佢食，連榴槤都照畀，好在佢腸胃好好，未試過肚屙，佢最鍾意食水泡餅，一見到會好興奮。」

患病允上主人床瞓

雖然豬仔已經 12歲，屬老狗一名，不過動作依然好靈活，在沙發上不停跳來跳去，「佢咁耐以嚟都冇乜病痛，係個幾月前骨膜發炎，隻腳生晒膿，我要每日 3次，幫佢用針筒抽膿，見佢咁唔舒服，就畀佢同我哋一齊瞓，安慰吓佢。」
點知豬仔瞓上癮，病癒後依然愛與主人同眠，「佢之後晚晚嚟瞓，我趕完佢走，佢趁我瞓着時，就偷偷爬上嚟，我發現咗就懶得再趕佢落床。」
其實豬仔是何生收養回來，約 10年前，有個狗場結業，好多狗仔待人收養，豬仔便是其一，若沒人要便需人道毁滅，幸得何生收養。「嗰時我養咗隻波斯貓，最初驚佢哋唔夾，點知豬仔我行我素，完全冇理隻貓。」

豬仔
性別：男
年齡： 12歲
品種：八哥

豬仔最黐何太，不停伸脷親親主人。

豬仔最愛食水泡餅，一見到即趴上枱喪食。

豬仔平時不理睬另一隻白威，但在對方臨終前，卻在旁陪足兩日，有情有義。

白威患病陪伴左右

何生一有空，便帶豬仔到平台散步。

3年前，何生又收養了另一隻白威，豬仔仍然不理睬對方，「兩隻狗幾年都各有各生活，直至幾個月前，白威患病，臨逝世前兩日，豬仔竟然全日留喺佢身邊，兩隻狗好似有交流咁，唔知係咪講緊遺言。」
看似甚 cool的豬仔，不理會其他貓狗，但最愛何太，採訪時一直尾隨，又會主動伸脷舔何太，「佢好黐我太太，可能太太成日陪住佢，照顧得佢最多。」
由於何生的狗仔都是收養回來，深切體會到社會存在很多寵物問題，包括遺棄、虐待等，「我真係好想快啲有動物警察，可以幫到小動物，唔好再畀人虐待，同時亦想啲主人養動物時，真係要諗清楚，養咗就要照顧佢哋一世。」