好戲等於黐線？資深演員游飈入行廿多年，大部份演反派角色，他笑言任何年代的賊都演過，但從未間斷的演繹，竟令他難以抽離，有次行街更一度想打人：「隨時揸把牛肉刀、AK47跟大佬搵食。」幸好他立時醒覺，游飈表示演員最難是控制自己的情緒起伏。
撰文：黃曉妍
從事演藝工作的人，十分信邪，有人會找師父改藝名，游飈亦不例外，但他最後選擇信自己：「曾經搵師父幫我改藝名，叫游世賢，我咁粗魯，同我都唔夾，所以我完全冇用過，用番真名游飈。」15歲做暑假工，游飈選擇做臨時演員，一做就做了六年多，年少無知誤入一間搵笨的臨時演員公司，他說：「一日做16個鐘冇OT，只得$40，因為有啲人食夾棍，但我發現自己好鍾意做呢行，希望做多幾年臨時演員先考訓練班，90年報讀電視製作專業訓練中心第三期，91年畢業正式加入無綫。」
■游飈入行廿多年，演過不少反派角色，是奸角中的綠葉王。攝影：葉君海
■游飈試過太投入角色令他難以抽離，他曾與郭羨妮在《情越雙白線》合作。劇照
■《心戰》中游飈與鄭少秋、邵美琪等有不少對手戲。劇照
■早於90年代，游飈已有機會與廖偉雄和周海媚合演《成日受傷的男人》。
劇照
投入角色難抽離
回想做臨時演員，第一次難得有對白，但游飈被嚇到腳震震，他憶述說：「86年高雄主演嘅《林沖》，突然捉我出嚟講一大段對白，我對腳震到控制唔到，好彩高雄哥叫我定啲，慢慢嚟，呢行有啲前輩好值得尊重。」他坦言90年前做臨時演員，基本上要帶100個老母返工，他說：「畀人鬧係好正常，唔好講做錯，做啱都係鬧你，工作人員唔可以鬧演員，咪指桑罵槐鬧我哋，不過呢個磨練係好。」
當年雄心壯志卻遭家人反對，叫游飈做汽車維修員，可惜他沒興趣，不過演藝路程走起來甚艱辛。訓練班畢業的頭三年，游飈被安排演古裝賊、清朝賊、時裝賊，從未間斷，最終發現自己有情緒病，他說：「有日喺旺角行街，有人撞到我，我係想打佢，我突然醒一醒，心諗『死喇，做乜鬼？』平時我啲角色就係咁，隨時攞把牛肉刀、AK47跟大佬搵食，啲戲入咗，完全抽離唔到，自己又唔知，係呢幾年大家先研究到有情緒病呢樣嘢。」
游飈續說：「一個職業演員有情緒病可能連自己都唔知，角色係會影響自己對家人同同事，影響得好大，但自己唔知，只怪自己功力唔夠，基本上一個好演員係黐線，我係開心得好快，傷心得好快，呢場戲死老母，下場戲結婚，下一場死老婆，再下一場老婆話生，因為跳亂晒嚟拍，情緒會好亂，要學識控制情緒起伏，係好高難度。」
游飈參演的劇集多不勝數，在《搜神傳》的水鬼角色更獲觀眾認同，他開心地說：「好慶幸有極少數人認同，但在我嚟講，可唔可以遇到一啲角色會令人嘩一聲？有啲人唔爆出嚟係咪因為戲唔好，唔係?，有時要撞啱好劇本，機緣亦好重要，我好多謝添哥（監製李添勝），佢畀咗好多機會畀好多同事，夠膽用游飈有幾多人？能夠有幾多個會畀戲我做？其實戲劇係team work，等於《義海豪情》嘅臨時演員都可以感動到喊，冇人可以鶴立雞群而歸功於某一個人，一定係全team人。」
感激添哥睇得起
游飈曾經試過一年做387個騷，近年轉簽一年60個騷，可惜結果under騷：「我聽到做賊就推，制度改變咗，以前有責任接騷，就算拍唔足，公司都會畀足錢，唔使還騷。當公司諗到要我哋還騷，就算我每套劇接一個騷，拍晒咁多套都係under，佢叫我嚟緊幾個月唔好出糧還騷，你叫我點生活？」一份卑微的薪金，游飈只好做密封式浴室抽風系統生意維持生活，他說：「真係幾難生活，需要做多幾瓣，冇辦法。」游飈在無綫的日子，最感謝的人是添哥，他說：「當年話佢走，嚇得我！」
游飈與無綫結束21年賓主關係，去年轉簽王維基的香港電視，他希望遇到更多變化、層次深少少的角色：「例如以前做菜販，好，做完，咁搵邊個都得啦，所以做嘢有目標先有意思。」
■在《幕後大老爺》中，游飈扮演打手。劇照
■游飈在處境劇《誰家灶頭無煙火》中演活小人物角色。劇照
■游飈感激監製李添勝一直給予他不少機會。
縱橫娛圈21年
■《搜神傳》中水鬼一角，令游飈獲得觀眾認同，令他很開心。劇照
游飈15歲時入行當臨時演員超過六年，由於熱愛演戲，90年決定修讀電視製作專業訓練中心第三期，翌年畢業後正式加入無綫。
轉投香港電視
在電視圈打滾21年，游飈參演的劇集多不勝數，包括《金蛇郎君》、《神劍魔刀》、《萬里長情》、《搜神傳》、《翻新大少》、《巾幗梟雄之義海豪情》、《鐵馬尋橋》、《幕後大老爺》、《心戰》等，去年2月尾約滿無綫，3月1日轉簽王維基揸弗的香港電視成為旗下藝員，作品包括《童話戀曲201314》及客串《三面形醫》等。
留言列表
