花花轉攻網上生意，反而賺錢更多。

職場起底組

Follow up　失鋪轉攻網購　手作滴膠飾物賺多 2成

2013年02月06日 ~~ 第1098期交易通．搵車快線

11年頭〈創業通〉訪問過在尖沙咀 gi Mall專賣手作滴膠（水晶膠）寵物頭像飾物嘅 Faz Jewelry，店主花花因商場於上年初突然清盤，適逢一田百貨嘅專櫃又約滿，被迫休息半年，其間只靠接熟客訂造飾物生意，但花花冇放棄，除利用呢段時間製作產品外，仲將產品放到一個專賣手作嘅美國網站，成功打入外國市場，連美國 blogger都讚佢嘅手製飾物有特色，吸引唔少外國客同佢攞貨，𠵱家月賺約 3萬幾，比以前開鋪時多咗 2成。

「自上年初 gi商場間鋪同一田個專櫃冇咗之後，呢一年嚟我擺過 2次市集， keep住作品嘅曝光率，但每月只靠熟客翻單，月入只得 4、 5千。」花花有諗過再開鋪，但市面商場租金太貴，佢諗不如趁呢個機會休息吓，再物色售賣點，「喺呢段時間，我喺屋企整咗好多產品，仲俾我搵到個專賣手作嘅美國網 etsy.com，月費同拆佣都比 ebay平，我一件貨賣約$100，服務費只係收一個幾毫美金，試得過。」

專揀細件放上網賣

花花揀咗啲細細件滴膠飾物，好似貓貓頭耳環、狗狗戒指等放上網，希望以款多嚟吸引客人注意，由於呢個網冇同類型產品，結果一 post上網即有人落單，外國客人仲喺網站畀評語，勁誇讚花花嘅作品，起到宣傳效用。「到咗上年 8月有個專介紹貓產品嘅 blog介紹我嘅產品，嗰晚連接二、三十個 order，勁開心。」
客人嚟自美國及歐洲，連約旦都有，每件貨品定價$70至$150，「郵費另計，由於香港寄掛號到外國好平，只係喺原本嘅郵費加二、三十蚊，客人都好樂意畀，慢慢仲有班批發客，每次訂百幾件貨到美國賣。」
花花話會繼續向外發展，但唔會放棄香港市場，佢喺葵芳新都會廣場一間格仔鋪花約$900租咗個櫥窗位 display貨品，另有 2間專賣貓精品嘅店鋪亦有花花作品寄賣。「𠵱家外國市場佔 7成，香港佔 3成，香港接訂造生意多，好似有男仔嚟訂造寵物樣戒指送畀女朋友，又有父母用子女嘅樣嚟造飾物。」

除飾物外，花花不時推出新產品如手機殼，售$298（訂造費另計）。

客人亦會帶仔女的相片來造匙扣，售$128（訂造費另計）。

花花於葵芳新都會廣場的格仔鋪租格仔箱 display， keep住產品曝光率。

Faz Jewelry
http://www.facebook.com/fazjewelrycom