大胃王咖喱烏冬$225
咖喱汁顏色較深，呈杰身，原因是加入大量煉奶及椰汁，味道特濃。食得多，不妨食啲椰菜中和吓，椰菜任加㗎！

潮𡃁便當

烏冬新食力

2013年01月16日 ~~ 第295期 Face

香港拉麵熱潮好犀利，拉麵的朋友烏冬，最近亦趕緊投入市場，新開烏冬店及新菜單不住湧現，用上石頭、鍋仔及鐵板盛載，顛覆烏冬以往必然係一碗碗的慣例，餸、湯底到醬汁都更多元化，例如冬蔭功、咖喱、蠔、黑松露甚至雲吞，烏冬極可能成為拉麵以後另一個飲食熱潮！

大胃王烏冬　 5的秘密

來自東京新宿的 Go!Go!Curry!，在日本有 41間分店，半年前在香港開第 2間分店，巴閉在咖喱每日從日本搭飛機來港，絕對正宗日本味，所以即使揀喺商廈內開店，亦吸引不少日本人來吃。店內主力出售咖喱飯，同時亦提供烏冬，當中最特別是一個洗面盆大小的大胃王烏冬，光是烏冬就淨重 1kg，內有 2塊由店內設下標準、長 13cm的炸豬扒， 2隻炸蝦、 4條香腸、開邊雞蛋 2隻及椰菜， 4-5個人都夠食，好嚇人！由於日文「 5」字同 go音相似，所以店鋪就特登玩嘢，揀喺早 11時 55分開門，晚上 10時 55分關門，每月 5、 15、 25號，亦有特別優惠，送 1客小吃，再睇番，大胃王烏冬都咁啱有 5樣餸，認真愛 5如命！

食客　 Anthony　大學生

貪佢呢度啲咖喱夠惹味，店鋪裝修好日本 feel！ 

Go! Go! Curry!

地址：銅鑼灣永光商業大廈 7樓
電話： 2891 5155
營業時間： 11:55am-10:55pm 

雲吞薑汁烏冬

通菜街向來多嘢食，最近新加入就有料理男，開張才一個月，提供烏冬、拉麵、泡飯、鍋等。老闆 Gary曾在別府、一平安等日本餐廳任職，所以店內稻庭烏冬，乃 Gary提供食譜，着供應商特別製造。烏冬雖是日本嘢，但 Gary就加入不少港式元素，例如在烏冬中加入手包雲吞，湯身亦經過自行調配，除了雞骨及豬骨之外，還加入薑汁，靈感來自小時候母親烹調的湯，但食落不會有太大薑味，唔搶鼻。更有一款鍋仔撈烏冬，材料包括豬軟骨、玉子及五香肉丁等，同時有麻辣、和風燒汁、鰹魚及滋味醬 4款醬汁，滋味醬乃 Gary親配，酸酸辣辣，鍾意點落都得！


雲吞豚肉$38
豚肉乃日本黑豚，雲吞則是老闆手包，於蝦肉及豬肉餡內加入大地魚，大大粒。


鐵男風御麵鍋仔撈$36
鍋連爐同上，燒熱後可攪拌醬汁同吃，最近咁凍，不失為暖身一選。


滋味醬雜錦炒烏冬$33
烏冬炒得頗香，可能加了滋味醬，微帶辣味，酸味不突出。

食客　 Brian& Sonic　維修技術人員&行政

我哋嚟咗好多次，貪呢度啲嘢又平又大份，味道都 ok，今次點咗個肉丁撈麵。 

料理男

地址：旺角通菜街 23號地下
電話： 2485 1101
營業時間： 11:30am-11pm 

黑松露烏冬

甫到八沢，就被其露天座位吸引，全店以木製裝飾為主，感覺像日式居酒屋，老闆 Andy，與曾任職日本菜的親戚合夥， 2個月前開店，專賣拉麵烏冬，但由於 Andy喜歡吃西菜，所以不忘在烏冬內加入西餐元素，大搞創意，例如以忌廉汁造湯底，加入三文魚及帶子，最特別是加埋黑松露，忌廉汁香濃，烏冬彈牙，有啲似食緊意粉咁！事有湊巧， Andy當初設計呢道菜，正正想用意粉入饌，但考慮到與店鋪日菜主題不切合，誤打誤試用烏冬，覺得效果不錯，剛過的聖誕首推，好多食客都讚！此外，店內不少食材都經過師傅自行調配，例如咖喱加入雞隻烹調，更具油香，飲品冰糖雪梨紅桑蜜，也是 Andy與師傅一齊構思，有誠意。


黑松露忌廉海鮮稻亭烏冬$88
建議將黑松露拌在忌廉汁中同吃，湯汁更香濃，醬汁更會掛在烏冬上，入口滿口汁。


叉燒烏冬$56
選用豬隻五花腩部位，食落啖啖肉。最特別是湯身上加入芝麻醬，芝麻香離遠嗅到，層次更豐富。


廣島蠔肉碎烏冬$68
每碗有 4隻廣島蠔，大大隻，肥美鮮香，配上豬肉粒，口感更豐富。而湯身方面，以清湯為主，加入鰹魚熬製，取其香，卻不會奪去蠔味。


墨魚軟骨$30
軟骨炸得尚算可口，食落有嚼勁。


咖喱吉列豬扒撈烏冬$58
咖喱汁經過自行調配，加入雞隻一齊去煮，油香較重，配埋炸得不油不膩的豬扒，估唔到咁 match。

食客　 Teddy　酒店

我鍾意呢度的咖喱撈烏冬，烏冬好彈牙，咖喱汁都好味，我得閒就會嚟。 

八沢

地址：筲箕灣筲箕灣東大街 42-52號金來大廈地下 H號鋪
電話： 2669 9200
營業時間： 12nn-3pm， 6pm-10pm 

泰日聯乘冬蔭功烏冬

烏冬專門店自家烏冬最近出新 menu，配合冬季搶先登場的乃冬蔭功烏冬，貪冬天食辣夠暖身，還加入鮮蝦、帶子、青口等海鮮，不過顧及香港人食唔到太辣，湯底落少咗辣椒，唔食得辣的朋友都可試。此外，亦首次推出叉燒烏冬，用上美國豬的里脊肉，湯底則以豬骨、雞殼、大蔥等材料熬製，好似食緊豬骨湯拉麵咁。說到烏冬，店鋪用上來自北海道的麵粉，早一天由師傅用製麵機器製造，造好後放進冰箱發酵備用， step by step按部就班。


海鮮冬陰功鍋燒烏冬$62
冬蔭功經自行調配，變得冇咁辣，帶子選用來自北海道的，肉質鮮美。


日式叉燒豬骨湯烏冬$48
叉燒選用美國豬里脊肉，大大塊，配以豬骨湯底，味道香濃。


溫泉玉子煙鴨胸胡麻醬掛烏冬$48
胡麻醬乃自家調配，更加上以日本昆布，醬油等材料調成的豉油，入口掛滿醬汁，小心食到成嘴係！

左起：

食客　 Shirley　售貨員
我鍾意呢度的南瓜野菌烏冬，健康得嚟好入味。

食客　 Ling　售貨員
我第一次跟佢嚟，點咗番茄烏冬，都係貪佢夠健康。 

自家烏冬

地址：尖沙咀重慶大廈活方地庫 23A及 25鋪
電話： 2366 6718
營業時間： 11:30am-11pm 

撰文：梁智欣
攝影：吳偉業、顏青瑋