Toby每日落鋪幫手，招呼熟客，連公司電話也接駁到手機，親力親為。

創業通

元朗泰菜搞包場　月賺 5萬

2013年01月16日 ~~ 第1095期 交易通．搵車快線

元朗多食肆，但泰菜卻偏偏只得 3、 4間，而且都是平民化小店，居於元朗的 Toby看準這點，於 4年多前開設泰菜餐廳，主打中高檔路線，菜式精緻又具特色， 2年前店鋪擴充，更大搞包場服務，為客戶度身訂造食物及提供不同服務，成功吸納到一班熟客，現時每月盈利達 5萬。

晚上 9時，經過位於元朗劇院附近的 Mint，即使寒冬下，店內及露天位置也坐滿人，氣氛非常熱鬧，驟看餐廳裝潢，設有酒吧位置，還以為是西餐廳，原來該店主打特色泰菜，像烤雞上桌時，只見職員在雞上倒酒，以打火機點火，烤雞在火焰中散發陣陣香氣，吸引全店人的視線。
老闆 Toby說：「菜式全部由我構思出嚟，因為我份人好嘴刁，除咗要好味，仲要夠特別，所以鋪頭好多係 fusion菜。我日日都喺鋪頭，呢味火焰雞一定係由我親自點火。」
Toby還要求菜式賣相精緻，像春卷以紅酒杯盛載，菜式伴碟不再是蘭花，而是一束束香草及花束，「我哋喺流浮山白泥有塊過萬呎農地，以前我 daddy用嚟做雞場，後來被政府收咗牌，𠵱家用嚟種香草、番茄等，夠晒新鮮同健康，而且慳到唔少成本。」


Toby接不少包場服務，最大型有 80人生日派對，收費約 5萬。


餐廳可因應客人要求，由師傅即場燒烤。

提供包場　訂造菜式

另一跟其他泰菜館不同之處，就是 Toby提供包場服務，當中包括生日客及春茗等公司客，「有次熟客問可唔可以包場，我就試吓，點知反應好好，特別係冬天冇咁多客，最適合包場搞 party。」
Toby會為客人度身訂造食物，如他曾為小朋友開生日會，便會製作適合小朋友的泰菜，例如細細件的一口烤雞肉、多款泰式甜品等。「我哋仲會因應客人要求，即場開蠔，或者喺露天位置設燒烤爐，由師傅即場燒海鮮或串燒等，好有氣氛。」
此外，他還提供其他服務，包括租車接送客人、找樂隊現場表現、放置 backdrop等，好像搞 event一樣。「如果小型 party，我仲會充當攝影師，幫賓客影相，如果大型就索性請專業攝影師返嚟，完咗 party後，會免費將相放落 USB，送畀佢哋留念。」
現時餐廳每月至少有 1次包場，收費視乎人數及服務種類，一般大約$200一位， 12位起，如包全場，收費過萬起。「有次 80人生日派對，因提供多項服務，費用便需約 5萬元；我哋仲會有到會服務。」


Toby於 11年尾申請到露天位置，擴充店鋪，成為賣點之一，因夠情調，常常爆滿。

看準元朗　少泰菜店

諗頭多多的 Toby，之前曾開過酒吧及潮州打冷，但在元朗長大的他，一向喜歡泰菜，「元朗好多嘢食，好似日本料理、打冷，偏偏泰菜比較少，有都係一啲細鋪仔，坐得唔舒服。」 4年多前，他把打冷店頂手給人後，便決定開泰菜館。
為了營造像赤柱般舒適環境，又要慳成本，選址現時的安康路，「雖然呢度隔籬左右都係汽車零件、維修等鋪頭，再過啲係元朗劇院同球場，入夜後會好靜，但我就係貪呢一點，同埋店鋪前面有條好闊嘅行人路，畀人放狗同踩單車，感覺夠 relax。」由於地點僻靜，租金只需約 2萬。不過自 Toby開店後，帶旺了條街，餐廳旁已開了糖水鋪和小食店。
為走中檔路線， Toby在餐廳裝潢上都花心思，由於最初開業時，餐廳還沒有露天位置，於是 Toby便使用摺門，當天氣好時，可以全部打開，營造半露天感覺，餐廳還有投射熒幕，晚上播放音樂或泰國歌手 MV，配合酒吧枱，甚有氣氛。「我哋除咗做晚市，仲好希望畀個地方啲人食完晚飯，坐低飲杯嘢、傾吓偈。」


泰式燒蠔$138/4隻
蠔肉肥美，淋上泰式醬汁，酸甜惹味。


泰式火焰雞$138
食用前先淋上酒、點火，火焰造型不但吸引，而且烤雞入口更香脆。


甜酸魚$138
炸魚配上甜酸汁，非常醒胃，配合伴碟的一束珍珠花，賣相精緻。

被廚出賣　重領牌照

店鋪有不少名人明星幫襯，圖為鄧麗欣和朋友來包場時與 Toby合照。

不懂得做泰菜的他，最初重金禮聘一位泰國師傅幫手，一起研究菜式，「我喺其他泰菜餐廳試過佢嘅手勢，覺得好好味，就請咗佢過嚟幫手。」為表誠意，加上對師傅信任， Toby不但分股份給師傅，連飲食牌照及酒牌都寫上對方名字，「希望佢有安全感，覺得間餐廳佢都有份，大家講個信字，我好多嘢都放手畀佢搞。」
可惜最終被對方出賣，開鋪 2年後，泰國師傅辭職，在屯門開設同名的餐廳，不少客人還誤以為是分店，不只流失部分客源，最慘是沒有牌照營業。「當時真係好慘，要拉閘成個星期，自己拿拿聲申請過所有牌照，之後膽粗粗無牌經營咗 21日，先攞到個臨時牌。」幸而屯門的餐廳不夠 1年已結業，沒有造成太大影響。 

露天位置　擴充店鋪

因為要重新申請牌照， Toby索性擴充店鋪，租了餐廳後面的鋪位打通，變成 VIP房， 11年尾，再租埋餐廳門前的露天位置，「露天位置感覺好舒服，又可以方便吸煙客，好受歡迎。」
以往單靠熟客生意，店鋪擴充後， Toby即開公司 facebook、請人製作短片放上 YouTube宣傳、寫公司 apps等，吸引了不少傳媒訪問，包括雜誌及網上飲食節目等，「我哋仲有會員制，生日會有 7折優惠。」
冬天屬於泰菜淡季， Toby想盡方法吸客，像推出新菜式，例如泰式火鍋、雞煲等，最近又推出 lady night。加上 Toby凡事親力親為，除了日日落鋪，連公司電話都接駁到手機，親自為客人訂枱，經過多番努力，現時餐廳每月盈利約 5萬。「暫時唔會諗開分店，想做好呢間鋪先，希望啲人嚟元朗，講起食泰菜，就會諗到我哋。」


Toby在元朗農地種香草和水果等，提供給餐廳使用。


店鋪 2年前租埋後面鋪位，打通成 VIP區。

客人林太

我住喺附近，好鍾意佢哋鋪頭環境，食物亦好特別同新鮮，所以經常嚟幫襯。 

開業成本

租金：$60,000（ 2按+1上）
裝修及牌照：$400,000
入貨：$40,000
總投資：$500,000

每月收支

租金：約$35,000
入貨：$90,000
人工：$100,000（ 7人）
雜項：$20,000
營業額：$295,000
盈利：$50,000

Mint薄荷葉泰國菜

地址：元朗安康路 2號怡康大廈地下 12-13號鋪
電話： 2475 5872

露天位置要攞牌？

根據食環署資料，露天座位牌照可供已領有普通食肆牌照（俗稱「大牌」）和領有小食食肆牌照的持牌人申請，申請人須向食環署遞交申請書，連同擬設的露天座位設計圖則，列明露天座位的範圍及面積。
食環署會徵詢地政總署、屋宇署、消防處、規劃署、民政事務總署及運輸署的意見，以確保申請符合土地使用、樓宇安全、消防安全、規劃、交通及衞生等各方面的準則，民政事務總署亦會在當區進行公眾諮詢，一般情況下會在 20個工作天內回覆食環署。若上述部門不持異議，而申請人亦辦妥相關發牌條件所列事項，便可批准食肆設置露天座位。
參考網站： http://www.fehd.gov.hk 

撰文：洪芳俠
攝影：傅新發
部分圖片由被訪者提供