Fun App

語音版 Instagram《啪啪》　跟明星隔空吹水

2013年01月16日 ~~ 第295期 Face

咪上得高登太多，一聽《啪啪》二字就心邪，其實呢個係強國出品嘅「影相+錄音版」 Instagram，畀你用語言代替相片文字。
其實𠵱家 WhatsApp、 Line等都有錄音 send畀朋友的功能，後起嘅 facebook messenger，都即將加入傳送語音新功能，用講嘢代替文字呢個新 trend愈吹愈盛。《啪啪》 app就食正呢陣風，影相後錄音，朋友又可以錄音回應相片，互動感更強。一出冇耐，成班香港明星就齊齊開戶，粉絲可以隔空跟偶像用語音溝通，感覺親切好多，即睇阿奴示範玩法！

阿奴教路：試吓 chok聲玩！

我覺得好好玩呀！用講嘢代替打字，聽到人哋把聲，感覺好 close呀！大家錄嗰陣，除非係鋪性感相，想有特別效果，唔好將手機隊得太埋個嘴，否則錄音把聲會好怪。但反過來又可以玩吓 chok聲，或者用丹田氣講嘢，咁就 fit啦！

step 1

第一件事，當然係影相或者於相庫搵相啦， app入面有成 15個 filter，都算合格。 

step 2

喂，你兩隻肥雀咪迫咁埋喎！

影完相就可以錄音，限時 90秒。阿奴教路：「錄個陣唔好出聲快過 㩒掣，搞到 cut鬼咗個頭！」 

step 3

仲 Angry Birds？𠵱家興轉珠呀！

朋友回應你個 post，只要同樣有裝《啪啪》，都可以直接錄音留言，一按 play就可以聽，方便過聽留言信箱，要聽一大輪電子錄音。 

記者玩命測試

平時喺微博寫「平反六四」，九秒九俾人河蟹。但玩《啪啪》轉做錄音發布，記者影張蠟燭相，再錄句平反六四，放足成日都冇俾人刪走，正！ 

拆解啪啪

官方冇解釋個 app點解叫《啪啪》，但開發者就講明想「讓照片說話」，呢個構思都叫強國發明， Instagram都未有，威番次。玩法當然係裝 app、影相、錄音、再鋪上去。仲可以同微博綁定，透過啪啪喺微博發布嘅 link，班童鞋一樣可以聽到你把聲。如果想回應，除咗打字，仲可直接錄音作 reply，實際測試最長可以錄 90秒，想唱首歌就未必夠喇！


啪啪
iOS/Android Free


Andioid用 QR


iOS用 QR

必睇明星啪啪
超 fantasy陳敏之

晚晚喺電視見到長腿女神陳敏之，講句嘢都鬼咁巴渣。不過玩《啪啪》，陳敏之好似擺得手機太近個口，呼吸聲鬼咁勁。而且佢仲好似匿喺被鋪下面講嘢咁，足足 42秒都講到氣若柔絲，真係帶畀人無限遐想。 

笑爆回應
傅穎

傅穎喺自己《啪啪》度用普通話宣傳廣州粉絲活動，不過頭兩位留言嘅粉絲都留言話：「可唔可以用番廣東話呀老闆？」聽完笑到 gap gap聲。 

超星級人馬
鄭裕玲

聽完傅穎講一堆嚇人煲冬瓜，不如聽 Do姐用好純正嘅英文、普通話同廣東話講祝賀語。不過講到尾，最爆都係 Do姐都 in成咁，阿奴話係成班 DJ同明星搞成喎！ 

反貼 facebook the pancakes

用《啪啪》發布後，就會有條 link，方便冇 account嘅用家聽你嘅發布。樂隊 the pancakes就將條 link放番喺自己 facebook，同粉絲互動。 

撰文：鄺浿鏇
攝影：顏青瑋