蒲進
亞視老闆王征乜都要話事，蒲進講明大家想法完全唔同，寧願被炒都唔屈服。身為林峯藝訓班師兄，不過蒲進話唔想叨光不肯多提師弟，否則可以搵 chok峯搭路返 TVB喎！
搜尋氣
亞視劉華被炒寸王征 佢係一言堂
自從有紅色背景的王征 10年 3月入主，亞視由二奶台變騎呢台。節目無限 loop兼零收視，反發新免費電視牌照引起全城圍插，到近日走火入魔到迫旗下藝人上洗腦班，逃學即炒。
其中一個被迫食無情雞的蒲進，第 12屆無綫藝訓班出身，是楊怡及林峯師兄，拍了 10年 TVB劇， 09年加入亞視，代表作是在《香港亂噏》扮鬼扮馬，最拿手扮劉華，分分鐘比江華更神似！撈 咗十幾年都要再培訓，蒲進明寸舊老闆比古惑仔更隻手遮天，「佢（王征）係一言堂， he is the king！」
亞視搞藝訓班，請高志森同 65歲仲低胸嘅宮雪花做講師，聽到班藝員耷低頭「釣魚」。《蘋果日報》圖片
TVB年代，蒲進多數做噏唔出名嘅角色，例如《尋秦記》中嘅魏國太子，只得幾分鐘戲分，所以 09年決定過亞視搵機會。
我係 TVB藝訓班出身，當年導師有詹瑞文、羅冠蘭，仲有好多有經驗 嘅導演監製教我哋點樣演戲，詹 sir負責教身體語言，我諗大家都知佢喺呢方面係幾咁叻！我哋上 咗 4個月堂再實習 2個月，真係學到好多嘢，但亞視呢？佢所謂 嘅訓練班，我問佢為期幾耐、有咩導師，全部答我唔到！大佬呀，去補習都要知係咩人教啦！
除 咗呢 啲藝訓班，亞視班高層好奇怪，耐唔耐就叫我哋着靚 啲返去開員工大會，聽佢哋講吓發展大計。開會都唔緊要，公司仲要拍低埋當節目出街，我哋藝人主要靠騷錢開飯，你𠵱家要我上鏡但唔計騷錢，仲要貼埋車馬費山長水遠入大埔聽你哋講幾粒鐘，講唔講得通先？
入 咗亞視 4年，初初入去個感覺其實好窩心（當時亞視老闆是台灣旺旺集團主席蔡衍明），但自從新老闆 嚟 咗，全部變晒清談節目，好似《高志森微博》、《把酒當歌》等等，成間公司 嘅方向完全唔同晒。
蒲進喺《香港亂噏》多次扮劉華經典造型，《無間道》嘅劉健明、《天若有情》嘅華 Dee同狄仁傑，連神情都似到十足十。
其實 04年拍《香港亂噏》好開心，鵬哥（盧海鵬）、林超榮個個都好畀心機做，最高仲有 9點收視。 9點喎，亞視有幾何從無綫手上搶到 9點呀？但冇辦法，老闆唔鍾意呢種節目，就算有收視有口碑有廣告都要摺埋，仲要冇任何解釋同原因，話 cut就 cut，可能佢覺得我哋太胡鬧 啩！佢係一言堂， he is the king！但我覺得都幾侮辱 㗎，你可以唔鍾意睇我演出，但你起碼要尊重我囉！
好在我扮劉華都叫有 啲人欣賞，內地都有唔少登台騷，同埋我屋企有做開汽車零件生意，即使冇 咗亞視呢份工都唔使乞食！不過我知有唔少同事真係靠佢開飯養家，所以有 啲即使係演藝畢業，都要去上亞視個訓練班。喺最正規 嘅學校出身，都要由頭讀過史坦尼斯拉夫斯基（方法演技大師），你話係咪好笑先？ 
留言列表
