今日好玩嘢

入工廠踢波全港首個室內 5人場

2013年01月16日 ~~ 第295期 Face

香港地，仲踢波？真係會俾人笑。師奶笑波牛冇大志，旺角場阿叔恥笑球員踢波屎。不過偏偏有班 80後繼續拎住個足球發夢，花過百萬喺觀塘工廈開設室內 5人足球場。
喺石屎森林中為球友提供踢波好地方，仲開班教波追求足球夢， book唔到街場嘅波友有新選擇喇！

互動片段

踩上 iSoccer睇 5人場

點踢 iSoccer

營業時間：每日 10am-12mn（星期一至日）
電話： 2116 2761
地址：觀塘開源道 45號有利中心 11樓 01室
網址： http://www.hkisoccer.com

收費詳情：
星期一至五
10am-6pm（$500/小時）
6pm-12mn（$650/小時）
星期六、日
10am-12mn（$650/小時）

唔理賺蝕熱血足球場

靠足球做生意，賣波衫、精品聽唔少，私營足球場真係第一次見，投資大、風險高，港甲南區球員陳銘剛（肥剛）同中學老死 Lester等總共 8個八十後，花過百萬開設 iSoccer 5人足球場，靠嘅都係一股追夢蠻勁。肥剛話：「成班波友有時唔齊腳踢大場，都想香港有多啲 5人場。傾傾吓知道外國都有室內 5人場，不如自己搞個啦。冇諗過太多賺定蝕，最初諗住衰咗都有個場可以自己踢吓波。成件事一味靠衝，經費唔夠，鋪草皮都係自己嚟，想第時老咗話畀仔女聽：老豆熱血過！」
已經辭咗份工全職打理 iSoccer大小事務嘅 Lester仲套用《那些年》名句：「因為有了我，讓這個世界，而有一點點的不一樣。」嚟形容個場，話如果搞得好，推動到政府搞好 5人場，生意少咗都唔緊要，聽到記者都眼濕濕呀！


門面跟其他工廠單位冇分別，當初業主驚噪音影響到樓上樓下，好彩 Lester佢哋做晒功課，發覺日本、星馬泰等地都相當盛行上樓足球場，最終靠誠意打動到業主。


效力過西貢區隊嘅 model Lincoln第一次踢室內場，大讚 iSoccer設備好。「呢度啲仿真草質素好好，唔覺跣。最正係有冷氣踢波舒服好多，夏天一定會嚟踢。」


初初諗住搵停車場改建，但要經過太多部門，最後諗到工廈，花咗兩個月左右搵地方終於都搵到𠵱家呢個位置，肥剛話唔係搵唔到更大嘅單位，但貪佢冇柱，而且交通方便。


肥剛、 Lester共 8位中學同學，年齡 24至 28歲，憑住一股熱血成立 iSoccer足球場，畀人 book場踢波之餘，亦開班教波、提攜後輩。

設備齊全高質草皮

幾位合夥人都係識波之人， iSoccer只有一個球場，但麻雀雖小，五臟俱全。有 13部冷氣同更衣室，夏天踢波唔使去街場乾煎。最讚係球場鋪嘅仿真草皮，冇膠粒且厚度適中，唔似俗稱「地氈」嘅人造草會刮傷。 Lester透露：「正式 5人場係用木地板，但我哋知香港人錫身，堅持要用落地都冇咁易擦傷嘅仿真草。事實上亦好多人讚，有外國人嚟到都話好踢過木地板，即使成本貴啲，草皮仲會損耗，我哋都會 keep住用。」
租金同草地維護成本不菲，價錢自然比康文署場地貴一截，喺 iSoccer租用一小時約$650，比街場貴約$300多，肥剛同 Lester初初都驚大眾接受唔到，不過開業 3個月以來愈來愈多客。「其實香港唔夠街場，有人連 book咗嘅場都拎嚟炒貴；二嚟我哋開到夜晚 12點，地段同時間都啱晒在職人士，試過有保險經紀踢完返工；又試過有鬼佬踢完波搵酒吧。環境做得好，香港人唔介意畀多少少踢波嘅。」


因為香港廠仿真草成本貴，佢哋上咗深圳、廣東一帶搵草，試過真係好踢過唔少街場，鏟波都唔驚磨薑。


更衣室有淋浴設備，沖埋涼換好衫喺工廠區走，完全唔覺踢過波，真係有客人踢完波直接返工。

Futsal 5人足球值得踢

iSoccer室內場踢 FIFA認可嘅 5對 5足球（英文為 Futsal、取自葡萄牙語 futebol），規則同球迷睇慣嘅十一人足球有啲唔同，如界外球用腳踢唔係用手擲，不過唔好以為場細波細就冇技術，肥剛反而覺得香港地發展足球應該要重視五人足球，因其講究控球技巧、著重配合，踢好五人先踢十一人，條路好行好多。 

5人足球技術更細膩

Fustal同 11人足球都係用腳踢，不過淨係場地細咗，所需技術已經好唔同。肥剛就話：「大場可以推個波 10幾碼用速度壓過對手，但細場冇呢個空間，講求嘅技術比較細膩。」仲話 Fustal好適合推廣畀香港年輕一代學習：「大眾成日話香港球員唔夠氣，其實未必關體能事，控唔到個波先係主因，成日俾人猜住踢體力自然消耗得快；學踢着重控球嘅 Fustal，少啲大腳清波，對香港足球發展都有幫助。」咁聽落，踢 5人賽咪可以訓練出好似巴塞咁有腳法同團隊精神嘅青訓球員？真係唔錯！

5人足球賽（ Futsal）
球例要點

比賽時間：上下半場各 20分鐘。
場地大小：長 38至 42米；闊 18至 25米。
比賽人數： 5人（ 4球員＋ 1龍門），每隊可有 12名球員。
換人次數：不限，隨時可在場內的換人區進行換人。
龍門球：守門員用手開出。
紅　　牌：被罰離場不得再參賽，但 2分鐘後可由其他球員替補。
界外球：用腳開出，要於 4秒內開出，守方要離球 5米。
罰　　球：防守球員必須離球 5米。

示範 1.
界外球用腳踢

大場嘅手榴彈界外球戰術大家見得多喇， Fustal就要用腳開出。為求加快節奏，仲要於 4秒之內開出，真係想唞啖氣都唔得，所以要預多幾隻腳做後備輪住出，唔係一定無氣。


大場用手擲界外球。


Fustal用腳踢，但直接攻門得分係唔計入球，多數都係傳地波畀隊友組織。

示範 2.掃把腳傳波

腳內檔掃把腳傳出法，個波貼住地板去係 Fustal嘅主流。

Fustal一樣可以大腳踢高空波，不過喺樓底矮嘅球場就會撞到天花，鼓勵地面進攻同用掃把腳傳波。 

示範 3.腳尖射波

因為個場比較細，好多時傳波、射波動作一慢，對方守衞就會拍到。所以射波非必要都唔會拉弓，直接用腳尖篤埋去，要踢好 Fustal，「快」字訣最緊要。


平時大力射門要拉弓，不過 Fustal拉得弓嚟都俾人封咗射門角度。


不妨用腳尖篤波，唔拉弓都有一定勁度，前巴西球星朗拿度 02年篤死德國隊拎世盃都係用佢。

5人足球冇圍板
香港名次高過英格蘭

一上到去 iSoccer，第一時間奇怪個龍門點解咁高， 5人足球龍門唔係得腰咁高？原來喺屋村見到有圍牆冇得出界、矮龍門嗰啲叫圍板足球，喺英國比較多人踢，但真正國際足總認可嘅 Futsal一樣有邊線會出界，龍門有 2米高 3米闊，有啲似手球龍門。 Futsal嘅人氣喺世界各地急升中，世界各地都有業，又有世界盃。唔講唔知，香港隊世界排名 77位，高過排 93位嘅英格蘭，小型球話唔定更啱香港人踢。


2012年喺曼谷舉行嘅 Fustal世界盃，就由巴西奪得冠軍，西班牙亞軍，兩大足球強國喺 Futsal界一樣超班。


康文署轄下有超過 30個圍板足球場，球唔准踢高過腰，唔准入禁區，規則較多，世界各地比較少人玩。（圖為遊戲《 FIFA Street》）


波友可能又奇怪，平時踢波係 7個人喎。但原來 7人場此產物可謂香港獨有，連日本等亞洲地區都冇。

Fustal啱香港人口味

最後都忍唔住問足總說好的「鳳凰計劃」呢？呢個振興香港足運計劃自 2011年 4月起已換過兩個 CEO，請人用咗過 200萬，但就唔見有實際成效。

試完 Fustal，覺得啱晒香港人口味，一嚟少人易齊腳開波，二嚟快上快落場地細，屎波如筆者都唔怕冇波掂。擔心嘅係香港球壇流行小高潮，但往往無以為繼， 09年東亞運冠軍恍如隔世，陳七上完娛樂版頭條北上踢中超。 iSoccer開業 3個月以嚟贏晒口碑，希望佢哋 keep到，繼續畀心機搞旺香港 Fustal，所幸一班 iSoccer搞手年輕有幹勁，比足總啲神獸計劃更信得過。 

撰文：司徒港燊
攝影：彭自維
模特兒： Wayne、 Lincoln@GME