裴斗娜於《雲圖》中，飾演再造人星美 451，除好似奴隸一樣要被勞役，仲會被監控。雖然慘過做狗，但勝在可以大騷長腿。
韓面
韓國膠女郎大戰國產周迅
韓國娛樂事業近年 hit爆全世界，歌壇有騎呢肥叔 PSY攻陷美國；電影又有型男李秉憲同 Rain相繼進軍荷里活，而今年接力拍西片有模特兒出身的韓妹裴斗娜。
今年 33歲的裴斗娜，唔算靚，但堅有型格氣質，最重要唔錫身， 4年前於日片《援膠女郎》扮過吹氣娃娃；於 1月 24日香港上畫的西片《雲圖》中，就化身再造人，露 42吋長腿任人勞役，戲分仲拋離國產周迅，絕對唔可以睇小。
今年已經 33歲的裴斗娜， 16年前於街頭被星探發掘做模入行。身高 5呎 7吋半身形纖幼的斗娜，最初做模特兒起家，之後轉投影視界開始演藝生涯。斗娜由於演技夠放又肯露，唔只本土受歡迎，更在 99年扮韓版貞子俾日本仔留意， 05年過江主演日片《 Linda Linda Linda》扮番韓籍旅日留學生成功攻日， 4年前在日片《援膠女郎》再擔正扮吹氣公仔，乜都敢試。
戲中斗娜被 Jim Sturgess飾演嘅地下反革命組織成員多次營救。斗娜雖是再造人，但亦對 Jim產生感情，情到濃時還上演激咀床戲。
片中同屬再造人嘅周迅（左）飾演斗娜好姊妹，但周迅因一次反抗而被處決，一早已消失於戲中，所以斗娜戲分多過周迅好多。
搶過周迅
扮吹氣公仔
喺《雲圖》就扮再造人， 4年前拍日片《援膠女郎》，斗娜就扮過讓人洩慾嘅吹氣公仔，之後變成人，仲同人類產生愛情。而戲中小田切讓就飾演吹氣娃娃設計師，同斗娜頗多對手戲。
19歲拍床戲
14年前，即 2000年，出道兩年嘅斗娜曾孖住男星金來沅主演講述性愛初體驗嘅韓片《青春》，戲中 2人上演大量床戲，當時只得 19歲嘅斗娜已經好大膽！
處女戲扮貞子
99年斗娜第一套戲就係拍有韓版《午夜凶鈴》之稱嘅《午夜寃靈》，戲中斗娜就扮貞子嚇人，連鬼都扮過。
迫練英文
而今次斗娜可以升呢拍西片《雲圖》，據知電影公司一早想搵一個亞洲女星演出，而咁啱該片導演 Tom Tykwer睇過斗娜於《援膠女郎》演出，覺得斗娜氣質好特別，而且識用靈魂去演戲，於是着手搵斗娜參演。所以傳聞斗娜是再造人星美 451角色第 1人選。早前斗娜接受訪問時亦謙稱：「我得到導演賞識，非常開心，我知自己未必符合導演嘅要求，但為咗唔令佢失望，我一直迫自己練好英文同演技，最後導演都好滿意。」識做戲的女星大有人在，但斗娜肯謙虛學習先係最大優點，抵佢紅！
5呎 7吋高的裴斗娜，最煞食係一對 42吋長腿，除拍戲、拍劇外，間中亦為雜誌做模特兒展示完美身段。而斗娜嘅 keep fit秘訣，除每星期起碼抽 4小時跑步外，每晚亦會用熱毛巾包住雙腿 10分鐘，既可燒脂、又可促進新陳代謝，唔怪得雙腿又長又白滑。
拍住影后
除拍西片外，斗娜上年拍住影后河智苑合作拍韓片《朝韓夢之隊》，戲中 2人扮演國家乒乓球隊員，為勝出世界錦標賽而奮鬥，極之勵志。
撻着國寶
現身價達 500萬英鎊（約 6,200萬港元）嘅朴智星，係亞洲至 top球星，裴斗娜真係有眼光。
最近裴斗娜拍西片升呢做國際女星，連搵對象都要搵有番咁上下 level先襯得起自己。早前，就有人目擊斗娜同韓國國寶、現效力英超球隊昆士柏流浪的韓籍球星朴智星，喺倫敦一把傘兩份揸嘅拍拖情景，據知當時有 fans見偶像出現，上前要求簽名時遭 2人當面拒絕。事後斗娜例牌否認：「朴智星係我嘅好朋友，並冇拍拖，當時喺倫敦係以朋友身份見面啫！」 
留言列表
