Alan每星期也會抽空四出影貓貓。

Petbook

流浪貓攝影師　以相喚愛

2013年01月16日 ~~ 第1095期 交易通．搵車快線

近來虐貓新聞不斷，當大家怒吼要嚴懲兇手時，其實喚起大家愛護動物之心，才是最重要。正因如此，剛於去年奪得國家地理頻道攝影比賽公開組季軍的 Alan，一年來四出拍攝流浪貓，又開個人純貓相展，希望以一張張可愛貓相，取代血淋淋的虐貓照片。


Alan愛踩着單車四圍影相。

星期六下午， Alan攞住相機、踩住單車，穿梭於舊街冷巷，一見到貓咪即停下來，一邊悄悄靠近；一邊調校相機快門、光圈，然後抓緊機會，拍下貓貓照片。「影貓千祈唔好同佢有眼神接觸，唔好俾佢知道你望住佢，最好四圍望吓，慢慢行近，等佢唔好有防備，跟住校好晒相機，再去捕捉佢 嘅神態，如果想影到佢望你，可以發出少少聲音，例如 sit sit、咇咇等，最後一招可以用鞋擦地面，不過可能會嚇走佢。」
Alan影貓的經驗，在這兩間年慢慢累積，「我本身從事平面設計，以前主要接 freelance匿 喺屋企做 嘢，朋友成日抱怨話見唔到我，我唔想自己變做失蹤人口，諗到『 one day one photo』概念，每日 喺 facebook上放一張相片，最初 1年乜都影，有次 喺後巷見到幾隻貓，覺得佢 哋幾得意，就影 咗幾張放上網，點知好多人鍾意，反應好好，咪再影多 啲，影影吓，我都愈 嚟愈鍾意貓。」 

難忘紅磡大眼貓

自此， Alan四出影流浪貓，最難忘在紅磡區內某冷巷的簷篷上，偶遇一隻眼大大的貓仔。「 嗰次我咁 啱經過，我 喺下面行，隻貓仔 喺簷篷上面望住我，又一路跟住我行，我 嗰次冇帶相機，個心一路掛住佢，過幾日夜晚專登再去影佢。」
隔了一段日子， Alan再探望貓仔，順便拍照，「見到佢已經冇之前咁肥， 嗰刻好心痛，好想帶佢返屋企，但簷篷太高，我掂唔到佢。跟住再過一排去，已經唔見佢，不過見到幾隻貓好似佢，唔知係咪佢 啲 BB。」


Alan最難忘紅磡簷篷上的貓貓，可惜貓貓已不在，「呢隻貓貓同佢好似樣，唔知係咪佢 嘅 BB，我影低呢張相，心中充滿祝福。」


貓貓在石縫窺探出來，正是「人在做、天在看」。


這張得獎相片，以雀鳥為主題，攝於屯門碼頭附近。


Alan去年奪得國家地理頻道攝影及紀錄片大賽，攝影公開組季軍，林憶蓮為頒獎嘉賓。

假如我們都是貓

因為愛錫流浪貓， Alan對於近來的虐貓事件更是心痛，「我好想透過我 嘅照片，畀人見到貓仔可愛 嘅一面，令人學識愛護小動物。好似我有幾張相，都係影貓貓 喺樹葉叢或門縫中望出 嚟，想帶出 嘅主題係『人在做、天在看』。」於 1月 15日至 2月 16日， Alan會在中環藝穗會開純貓相展，名為「假如我們都是貓」，希望讓大家代入貓貓角色中，可以更加愛護貓貓。
除了相展，去年 Alan還推出相集，更奪得國家地理頻道攝影比賽公開組季軍，雖然得獎相片並非貓貓，但 Alan亦把部分貓貓相片放進相集中，讓讀者欣賞，「出相集係我個人夢想，今次第一本，結合我以往好多類型 嘅相，但下一本，我好想出純貓相集，希望透過相片，令大家更愛錫貓貓。」


為免嚇怕貓仔， Alan通常會離遠拍照。


相集內每張相片都附有一段文字，寫出 Alan對相片的感受。

舉報虐貓

本港接連出現虐待動物個案，為緝拿兇徒，警方、漁護署及愛協等，於 2012年推出動物守護計劃，過去 1年共接到 49宗舉報，破案率約 33%，只要市民發現有動物受虐，就可以即時報警，作出指控和擔任證人。警方會將這些「動物案件」，移交給「指定隊伍」負責（第九組），不過由於「指定隊伍」亦要做其他刑事案件，所以不少愛護動物的團體，均認為警方需要盡快設立「動物警察」，負責調查、拘捕和起訴「動物案件」。
現時 10個愛護動物團體，包括動物地球、 NPV非牟利獸醫、動物友善政策關注小組等，一起組成「爭取成立動物警察大聯盟」，希望爭取警方盡快設立「動物警察」。
市民如發現有人虐待動物，記得即時報警，或找愛護動物協會到場協助救援受傷動物。

愛護動物協會 24小時緊急熱線：

2711 1000 

撰文：洪芳俠
攝影：傅新發、吳偉業
部分圖片由被訪者提供