close

 

「係可以冇人再搵我拍戲。」他捏一把汗。幸好現今觀眾也有腦袋，最終遭放逐的不是他。羅仲謙繼續拍戲，女朋友繼續升呢。從前傳緋聞的是一大堆是非模、嫩口港姐、過氣歌星；現在連電視台上位小花與中女一姐也死在他壯闊胸膛與強勁臂彎。「多緋聞，可能因為我鍾意講笑，易同人玩得埋，經一事長一智，以後會檢點啲。」巨胸或會多奇遇良緣（有時可以是孽緣），但還是識時務重要。

自己都有責任
去年八月，傅穎主動向傳媒爆料，指羅仲謙跟她拍拖期間一腳踏幾船，又曾毆打她，以致她手、腳均有瘀傷。事件轟動娛圈，事後二人各自開記者會，羅仲謙也承認與女友有過肢體碰撞， 並向女方道歉，但卻否認一腳踏幾船。
「之後報紙同我計數，話我有十幾個女朋友。佢哋只不過係同我合作過嘅女仔，由第一套劇開始到依家。我記得經理人講過，藝人未紅時，係需要有新聞；但出名之後，就冇得揀新聞。水能載舟亦能覆舟，我明白呢啲係工作一部分。」
拍《搜下留情》傳他跟當時仍是「鵪鶉妹」的黃智雯撻着；拍《婚前試愛》時跟周秀娜與「浸大E神」楊梓瑤都有親熱牀戲而傳緋聞；去年擔任港姐嘉賓時又傳他看上某幾位佳麗而秘密約會……還未計正印女友傅穎，如全部屬實的話，這兩年羅仲謙應該好忙。
「老實講， 我真係冇咁嘅能力，無論精神上、時間上同金錢上都冇。單係一個情人節，已經準備唔到咁多份禮物，亦冇可能講到咁多大話。但我承認，成日同拍檔傳緋聞，自己都有責任，正所謂一隻手掌拍唔響，唔能夠全怪記者寫我。我太貪玩，太鍾意講笑，玩起上嚟唔會理對方男定女，好容易惹其他人誤會。經一事長一智，日後會識分輕重， 會避忌啲。」
他甚至否認自己是感情騙子。
「我好長情，我甚至敢講，自己好顧家。以前我好大男人，鍾意啲傳統又乖巧嘅女仔，唔鍾意女朋友着得太性感，連對方出夜街都唔鍾意。最近一、兩年先明白到， 鍾意一個人唔係要控制佢， 即使女朋友都唔等如屬於自己。」
傅穎一度拋胸行性感，莫非因此遭男友毒打？
「都話唔講佢！依家最重要係展望將來。將來見到？希望大家再見亦是朋友，希望佢工作愉快，有錢齊齊搵。」

可能只係好彩
大家信不信羅仲謙？信不信都好，反正他經理人公司星皓和TVB都選擇信了。那邊廂苦主傅穎玩自爆不但未得到太大同情，反而遭公司雪藏，之後還要寫上洋洋千字的悔過書才得以解凍。她近日在北京拍戲，表面是新發展，實際是自生自滅冇眼屎乾淨盲。這邊廂羅仲謙道歉過後大難不死，劇接劇的開工，還以為他是無綫親生仔。「舊年嗰件事，真係可以一鋪將我打殘，娛樂圈咁多人，唔一定需要搵羅仲謙拍戲。唔死得，可能係之前record好，監製見我做戲有進步，所以繼續用。但更大可能，只不過係好彩。」他有自知之明，能夠留低，不過是權衡輕重後較有價值而已。他也不負眾望，拍《On Call 36 小時》再接再厲撻着比他大五年的一線花旦楊怡，人望高處。「我哋係有約會，食飯係正常交往，佢係一個好女仔，一個好啱傾嘅朋友。（已正式拍拖？）依家仲係食飯傾偈階段，將來發展會隨緣。其實唔敢諗太多感情事，難得冇俾人叮走，會專注工作先。」

只想做消防
從乳臭未乾的模到成熟花旦，大家不禁會問，羅仲謙到底憑甚麼縱橫情場？單憑大胸？未免把港女看得過分膚淺。這條問題他自己也無頭緒，我嘗試在他的成長背景中找答案。他成長於大埔區，住的是村屋，在十分單純環境下長大。
「我爸爸嗰代成日捉禾花雀同水曱甴燒嚟食，我都有玩過，不過已經屬尾聲。我鍾意通山走，唔驚蛇蟲鼠蟻。我適應力好強，世界末日或者可以唔使死。」
未住過高樓大廈，連升降機也算是新鮮事。
「從來好少搭，一入就會諗，假如等陣墮點算呢？未至於有恐懼症，但就會經常諗埋啲無聊嘢。」
入行前最遠只去到旺角，銅鑼灣幾年都去不到一次。
「冇需要嘛，買波鞋去旺角就得，銅鑼灣又唔識路。」
父母在他四年班那年離異，他跟當髮型師的爸爸住，嫲嫲和幾個伯伯照顧他。
「爸爸媽媽雖然離咗婚，但媽媽依然住大埔，成日有得見。可能係一種補償心理吧，每次見媽媽都有玩具，所以又唔覺得父母分開有幾咁大件事。幾個伯伯都好錫我，管教又嚴，放學想去踢波都唔准；但知我鍾意卡通，又會夜晚十二點叫我起身睇《聖鬥士星矢》。」
中學讀大埔官立中學，會考成績只有單位數字。青少年時期的羅仲謙只愛游水，二十歲時考獲救生員資格。
「好多人以為做救生員好『筍』，其實好多時坐到屁股痛。有人游水固然要坐喺度睇實，冇人游時都冇得走， 正宗『睇水』。泳池又唔會有樹蔭，夏天曬死！」
他長駐青衣灝景灣會所泳池， 以為常有養眼靚女？錯了，下水的通常是外傭姐姐和上了年紀的公公婆婆。


「泳池勝在有暖水，長年無休。同班公公婆婆熟咗之後好好傾， 佢哋去飲茶梗打包俾我食，過年又有利是𢭃，幾開心㗎！」對羅仲謙的性格開始有點眉目了， 這小子四肢發達頭腦簡單，小小事也心滿意足。他志願做消防員，貪返一日放兩日，放假那兩天仍可做救生員。○五年女朋友去試鏡，他怕女友被騙，才陪着去。「睇得《警訊》多，點知係咪呃人？上到去見到鄭丹瑞，先冇咁驚。」鄭丹瑞監製《阿嫂》，羅仲謙當時女友落空了，他自己卻被選中了。戲份不多， 但正式入行。「真係從來冇諗過做呢行，以前都冇乜睇戲， 最多只係鍾意聽郭富城。」

擂台好大
通常都是這樣，無心插柳柳成蔭。他有樣貌但欠墨水，走不了公子路線，只好走偶像派。原本寂寂無聞，迷上健身後觀眾才「驚為天人」。「做gym真係會上癮，拍《飛虎》時半夜收工，健身教練俾咗條鎖匙我， 自己上去操，操到三、四點。觀眾認識我係因為呢個body，我會keep好佢。」他知道自己位置，打好呢份工。「之前同郭晉安傾偈，佢教我一個道理：娛樂圈呢個擂台好大，位置唔止一個，可以容納好多人，藝人最重要知道自己有乜能力同不足，經常保持競爭力就唔會俾人迫落台。我都係咁諗，現階段唔介意企最邊，希望每年可以逐少移向中心。即使移唔到，至少一定要企喺擂台上。」他的目標，是任達華。「有演技，有家庭，身形又好呀！」三句不離本行。

大埔最強
羅仲謙廿七歲，成熟穩重談不上，但也不是無事生非的死仔。同事知我訪問他，都問：「靚唔靚仔？有冇電你？」或許我這個姨姨太老了，羅小朋友絲毫沒有浪費資源。他頗聽話倒是真的，叫他行就行跳就跳，還不忘加自選動作扮甄子丹的宇宙最強。「嚟多次，今次係『大埔最強』！」全影樓都被他逗得開開心心。（詳情請觀看今期網上片段）我開始明白三十二歲的楊怡為何會揀他。 ####


楊怡與羅仲謙皆承認互有約會，今次大方好多。《Face》圖片


與周秀娜緋聞一度好熱， 但觀眾應該知道，一向非池中物嘅娜姐又怎會睇得上平凡謙仔？


與傅穎離離合合，拍拖時死口唔認，到分手後又玩爆大鑊……我絕對反對暴力，但感情事， 真係一隻手掌拍唔響。


開記者會認死狗，道歉最緊要快。


BB時代已眼仔睩睩，十分精靈。


○八年拍《尖子攻略》，幾年後羅仲謙和身邊的梁烈唯都叫做彈起了。


《缺宅男女》沒有和人妻陳自瑤傳緋聞，今次算罕有。


《On Call 36小時》又有黃智雯，謙仔說：「應該會繼續傳緋聞㗎！」



arrow
arrow
    全站熱搜
    創作者介紹
    創作者 litalife 的頭像
    litalife

    818 娛樂八掛大放送★

    litalife 發表在 痞客邦 留言(0) 人氣()

    E-mail轉寄