close
盛女Suki降服媾女王
【今日我至甜】曾經係盛女嘅Suki同Zion拍拖年幾,到今時今日行街睇戲仲好似孖公仔咁黐到實,認真夠晒甜。
【銅鑼灣】舊年參加無綫節目《盛女愛作戰》嗰五位盛女,只有排骨盛女王Suki成功搵到高大威猛嘅男友Zion,雖然之前有讀者爆料話Zion係媾女王,不過唔經唔覺佢哋由相識到𠵱家都拍咗成年幾拖。
十指緊扣
前日下晝6點幾Suki同Zion齊齊以黑白look現身銅鑼灣翡翠明珠廣場,佢哋去咗樓上嘅MCL JP戲院,只見佢哋喺售票處左望右望搵戲睇,仲貼到實一實有傾有講,睇嚟Suki已經戒晒之前啲港女陋習,變咗依人小鳥,揀咗兩分鐘最後佢哋決定睇《3D義勇群英:毒蛇反擊戰》,畀錢重任當然由Zion搞掂啦!
因為仲有成個鐘至開場,佢哋繼續大玩貼到實,十指緊扣行番落街,點知撞正落雨又冇帶遮,不過Zion勝在大隻,喺過馬路嗰陣佢一嘢攬實女友,盡量唔畀Suki濕身,之後佢哋去咗間餐廳食嘢繼續二人世界。拍咗成年幾拖仲咁sweet,呢鋪媾女王Zion都幾難走得甩,睇怕Suki唔使幾耐就可以同盛女稱號講拜拜。
採訪、攝影:梁繼光
■兩個人連買飛都好似連體嬰咁貼埋一齊。
■落雨冇帶遮,Zion惟有用自己幫Suki擋雨。
■喺舊年嘅《盛女愛作戰》,Suki同Zion已經夠膽當眾咀嘴。資料圖片
全站熱搜
留言列表