卓韻芝說唔記得頭紗幾多錢，「其實係我唔想記得，總之好貴好貴！」貴的原因是頭冠用象牙粒砌成，且有百年歷史。
名人收藏
卓韻芝愛老嘢
有人鍾意追求乜都要新，有人鍾意舊嘢。看似潮人的卓韻芝自言一點都不潮，五、六年前開始收藏古著，她會捐窿捐罅去尋寶，「我覺得要去展示財富係好容易，你點樣去買一啲有故事嘅嘢、點樣去揀、點樣去掙扎一個過程，呢個先至係我覺得儲呢啲小古董最難得嘅地方。」
周圍捐
卓韻芝說儲物習慣自小已形成，有鉛筆、郵票，最近五、六年才開始儲古物，雖然數量不多，但四、五十件一定走唔甩，「去旅行，鍾意去行古董市場，或者一啲跳蚤市場，所以先至慢慢開始儲一啲自己覺得手工好、同埋好有故事嘅 accessories。」
她的古物來自世界各地，包括倫敦、巴黎、比利時、柏林、東京等地的跳蚤市場，而她的第一件收藏是雀仔圖案雙層傘。「嗰一排我突然間發瘋咁收藏所有類型嘅棍，老人家士的、紳士手杖、或者一啲好似神仙棒嘅嘢。」話說數年前某日，她見到巴黎一間古董鋪櫥窗內的金色手柄雨傘，即時入店問價，「已經知道個格局佢唔會話俾你聽幾多錢，佢開始同你傾偈，睇吓同你好唔好傾，好傾就平啲俾你，睇吓你對於古董有冇認識，如果係諗住用好多錢嚟掃晒佢啲嘢，佢就唔會賣俾你。」
最難忘的一次經歷在比利時安特衞普跳蚤市場，是一條金色頸鏈，「攤位主持人阿婆指住我，跟住攞起條鏈遞俾我，突然間有堆阿婆慢慢咁滲出嚟，話：『好好呀！你戴咗條鏈好靚呀！』好似《警訊》啲媒咁，佢收我十蚊歐羅。其實佢係想你要，對於個老人家嚟講，佢見到一個亞洲人喺咁地道嘅跳蚤市場經過，佢覺得呢個女仔好適合擁有呢樣嘢，當你一路以為『係咪坤我㗎？係咪有鏡頭影住我？』但其實佢真係想俾你，我都幾肯定如果我同佢講『你俾我啦。』佢會俾我。突然間覺得購物原來係有一種人情味，而家個年代，購物已經係冇人情味，只有工廠，你行入去買、俾錢、走、排隊、碌卡。」
這頭紗是店主的私人珍藏，無打算賣，「我求佢賣俾我，猛話：『我真係好鍾意，我聽日就飛啦！唔該你吖！』最後佢都賣咗俾我，但好貴。」
卓韻芝會利用舊物去啟發自己，創造新的物件，她臂上的「手鈪」就是用閘光板製成。
Vintage YSL袋是卓母留給她的，「我諗係細個時媽咪灌輸嘅教育——物件唔好買咁多，谷晒啲錢買一件靚嘢，好正呀！」
阿婆嘢
除了在外地收集古物，她連家中外婆都不放過，主攻「阿婆睡衣」及「阿婆手巾仔」，「佢舊嗰啲睡衣好靚㗎！好 new wave㗎，搶佢啲舊手巾仔啦，舊嘅絲質手巾好靚！直情係買都買唔到，佢成日都唔俾我，『你用啲舊、老人家嘅嘢，人哋笑你呀！』我話：『唔緊要㗎！我冇朋友㗎，俾我啦！』哈哈哈！」
儲埋一堆舊古董，她說打理其實不難，不需要花費大量金錢去保養，只需要很多時間及心機，但家中的阿婆才是一個「障礙」，「佢以為我啲頭紗係布碎，叫我掉咗啲爛布碎，試過攞咗去抹嘢。喺佢個世界入面，只有窮人先至會買舊嘢，佢唔明，第一，點解舊嘅嘢咁貴？你要花咁多錢去買；第二，點解你買啲嘢係唔著，成日都哦我，『舊鞋唔好㗎，好危險㗎……舊手袋唔好㗎，會唔好運㗎……舊遮唔好呀，唔好買黑遮呀……』嘩！全部都係得到唔好！我冇一樣買到嘅 antique番嚟佢係覺得好。哈哈哈！」
去年初卓韻芝穿了法國 Thierry Mugler八十年代的 tube top，出席 talk show記招。
雀仔圖案雙層遮光傘，是她首件收藏的舊物。
買古董最易被騙，卓韻芝的心得就是與古董店主持人混熟，然後每事問，「一開始係要撞吓板，但最好方法，就係去識古董店嘅人，其實多數都好好人，同佢哋傾偈，你問佢點解呢隻紗咁貴？點解呢件褸零零舍舍咁平？佢講俾你知，你慢慢就會識睇。」還要睇很多舊時裝雜誌，慢慢認得每個年代的設計特色，「開始識得去摸嗰粒係咪真嘅象牙，會知道個主持人， feel到間鋪係咪呃你，慢慢一路去 build up，係要投放長時間落去，真係要心機，唔係容易嘅事。」
撰文：王健美
攝影：李敏軒
留言列表
