是我小時候：許亦妮肥鴨變天鵝

■自小肥嘟嘟的許亦妮與身邊的椰菜娃娃一樣可愛。

童年時的許亦妮既肥又醜，不時被親戚於背後取笑，但她一於少理照食可也，不過女人始終敵不過愛美天性，最後由日本雜誌啟發減肥計劃，成功搣甩肥膏變成萬人迷。撰文：王崇穎

許亦妮是2011年香港小姐季軍，出名樣靚身材正，可有人想過今日亭亭玉立的她，求學時期居然屬肥妹族，體重超過一百四十磅，就連母親亦要求她節食減肥，幸好當日當機立斷，才令許亦妮踏上選美之路。家中四姊妹排行最細的她，幼時絕對集萬千寵愛在一身，她說：「五、六年級已經好反叛，成日駁老師嘴，試過駁到老師喊，諗起都覺得自己好低能。」

■許亦妮小時候是大眼妹一名，樣子精靈。

■開始發胖的許亦妮讀小學已識駁嘴，更試過弄哭老師。

被迫減肥半夜偷食

許亦妮坦言大部份童年回憶均在英國，她說：「11歲去英國讀書，當時好唔願意，喊足三年要求返香港！」她記得當年留學英國最開心的日子，就是收到家人寄來的東西，她說：「平時已經寄好多零食同用品，每年生日仲會有好多禮物，11歲生日就有11份。」

■許亦妮被家人送往英國讀書，足足喊了三年。

■在英國求學時，許亦妮跟外籍同學成為好友，才令她減少思鄉情。

當時屬肥妹一名的她，由於三位家姐均屬美女，故她常被親戚取笑，許亦妮說：「親戚喺背後話點解媽咪生到最後嗰個女又肥又醜！」她表示因母親要求節食減肥，令她半夜偷飯食，回想起十分好笑。其後因接觸日本雜誌，希望可以與女模一樣着靚衫，她說：「當時日日做運動行樓梯，來來回回廿次再跳繩一千下，三個月後成個人瘦咗，仲收晒水變靚咗，嗰年放假返港，點知喺街俾星探發掘，就係咁14歲就入行！」

■由肥妹變成索女的許亦妮參選港姐，順利殺入三甲。

■許亦妮參選港姐後，獲機會拍劇集《老表，你好嘢》令她知名度大增。

初戀既單純又開心

既然減肥成功當然不缺裙下之臣，她直認大學時有不少男生追求，高峯期有五位追求者，真正的初戀於中學發生，她說：「當年17歲，佢係隔籬男校嘅學生，喺學校聯誼舞會識㗎，大家都係香港人，嗰時拍拖真係好單純，一個月見一次，出街食吓麥當勞，講吓電話，諗番都開心。」