Peter仔終有出頭天。（設計對白）
真係估你唔到！（設計對白）
探熱針
風生水起 姑爺仔變富商 麥德和賣咪 5千蚊起步
八十年代經典電影《𡃁妹仔》重拍，得當年飾演片中男主角「長樂街 Peter仔」的麥德和出山客串，跟舊拍檔溫碧霞扮演夫妻。在娛圈消失多時的他，原來早已轉行賣音響並研發麥克風，八年前成功發明光環咪，更令 Peter仔賣咪賣到揸近億豪宅。
研發出財路
年近五張的麥德和復出做 Peter叔，《𡃁妹仔 2013微交少女》開鏡當日，牛記笠記見人，唔知以為他復出撲水，查實禾稈冚珍珠。
當年麥德和脫離影圈轉行搞音響科技，守業廿年，八年前憑住成功研發出有紅、黃、藍、綠及粉紅變色的光環無線咪，並在內地申請成為專利，自設生產線，從此撈到風生水起。
「 Peter仔光環咪」在中港台 K場大行其道， Neway及 Redbox都有採用。記者在網上搜尋，麥德和的「聲霸王」公司及廠房均設於深圳，公司網頁更放上胡杏兒及 G.E.M.男友林宥嘉攞住「 Peter仔光環咪」演出相片，而最貴的一支，是值二萬多元的水晶咪。
當年 Peter仔
30年前電影《𡃁妹仔》，演 Peter仔的麥德和同林碧琪一幕床戲，甚為經典。
麥德和發明的光環咪，在內地攞埋專利，令他走上發達之路。其兄舞王麥德羅（右），至今仍登台頻頻，又跳又唱。
唔想招搖
做咗咪霸，麥德和近年將彈藥投放房地產。手上的磚頭，據知包括有天璽、擎天半島及君臨天下等，個個單位均值三千萬以上，單是賬面資產已億億聲。
當年《𡃁妹仔》經典對白：「我係長樂街 Peter，邊個唔識我？」性格招積，但暴發後的麥德和，卻堅持低調；衣食住行平民化，除了舊拍檔溫碧霞知道他是隱形富豪，片中台前幕後都不曉得打扮樸素的麥德和其實是有米老闆。
「去片場開工，麥德和都專登揸架日產七人車出入唔用 Benz，佢話唔想太招搖。不過因為拍完戲要趕返深圳公司開會，先要司機接送；平日佢都仲係鍾意坐街邊檔食炒粉麵，好慳儉。」知情者說。
新版《𡃁妹仔》開拍，除溫碧霞及麥德和在該片延續經典，其餘男女主角一律起用新人。早前該片投資者，有「工廈炒王」之稱的李冠亮（箭嘴）率領開鏡儀式。
當年《𡃁妹仔》激情戲落在林碧琪身上，新版的重口味劇情則由魔鬼胸蔚雨芯負責。
過百員工
上週四（三月廿一日），麥德和有通告，對於身家被揭，他顯得十分錯愕。「你哋點解知咁多嘢？唔好講我呢啲啦！」幾經追問，他才心軟公開發跡史。
「當日我用五千蚊起家，由 one man band做到依家有百幾個員工。多年嚟我不斷研發，改良靚聲咪，直至○四年，發明咗光環無線咪，攞埋專利，生意至由不過不失變搵到大錢。除咗東南亞，我嘅光環咪亦開始打入歐美市場。依家好多歌手都用我啲咪做私家咪。但邊個就唔方便講啦！」
對於有指他手揸億元物業，麥德和即耍手擰頭的說：「唔講呢啲！我好窮㗎。」之後更轉身閃走，避開記者。
至於溫碧霞一早知舊拍檔已變成億萬富豪，她說：「我淨係知佢做咪嘅生意做得好好，唔知佢有幾多身家喎！」
在麥德和的公司「聲霸王」網頁發現貼有胡杏兒攞住他發明的光環咪相片。
問麥德和係咪賣咪賣到身家有億億聲，他笑笑口說：「唔講呢啲！」
陳年經典
三十年前由麥當雄監製的電影《𡃁妹仔》，因劇情寫實又夠爆，即使全新人孭飛，都做到千萬票房，並橫掃電影金像獎的最佳導演、編劇、女主角及女新人獎項。當時只得十七歲的女主角林碧琪，一幕紋身露兩點，一脫成名，而另一女主角溫碧霞及麥德和亦憑此片彈出。之後林碧琪急流勇退嫁杜麗莎胞弟弗烈，從此相夫教子不肯復出；而打碟出身的麥德和亦轉行做音響，做到今日變富商。片中五女只有溫碧霞長期作戰留在圈中發展，三十年來長做長有。
撰文、攝影：娛樂組
留言列表
