衰咗添！（設計對白）
著住廿磅戲服玩唔掂 Solowheel，伊健傻笑遮醜。
探熱針
老頑童 鄭伊健玩轉大草原
古天樂因腳傷辭演，鄭伊健臨危受命，由大奸角坐正做《忠烈楊家將》男主角，但拍攝一場楊家七兄弟騎馬出戰大場面時，竟然失平衡墮馬，好彩有威也保命，避過遭後上的過百匹馬踩扁厄運。
死過翻生，轉過頭伊健已經無件事，見武術指導董瑋有部自己激愛的 Solowheel（電動單輪單車），即使著住廿磅戲服，都要一顯身手，仲做埋阿 sir，教曉仔仔周渝民。
四張五，人夫鄭伊健頑童性格不改。
寧願坐草原都不願匿在旅行車休息的鄭伊健，同張馨予男友李晨玩狗過日辰。
去年七月，《忠烈楊家將》拉大隊去到北京偏遠的大草原，拍千軍萬馬打仗場面，場口演員多，等的時間長過埋位開工，電影公司早有安排，為演員預備好旅行車，方便休息，但唔悶得唔停得的鄭伊健寧願擔櫈仔坐草原，同工作人員吹水打發時間，連林峯亦受感染，一齊吹，還在伊健推介下，迷上遊戲，勁打！
玩住嚟做！但有次拍楊家七子馬戰大場面，老頑童伊健一時失重心墮馬，險被隨後馬匹踩死。「嗰刻我以為死梗！」伊健說。
有威也保住命仔，逃過一劫的伊健驚完就算，轉過頭發現武指董瑋有架自己同老婆蒙嘉慧都迷爆的 Solowheel（電動單輪車），趁住對方 set機擺位，馬上「老笠」！
易上手
鄭伊健、蒙嘉慧激愛的 Solowheel是美國華裔設計師陳善，針對城市塞車問題發明的電動單輪車，於 11年 4月開始面世。 Solowheel僅重 9公斤，內置自動平衡系統，並設有操控手桿，駕駛者身體傾前，單車便會前行，操作簡單，一般人只需 15分鐘，便可完全掌握操控。
單輪車的充電時間為 45分鐘，充電後可連續行駛 2小時，售價約 13,000元。
玩慣玩熟本來無難度，不過廿磅戲服上身，平衡受影響，頻頻跌低的伊健忍不住說：「真係老貓燒鬚！」而平日唔多出聲的仔仔周渝民，亦在伊健教路下，成功試玩。
八月夏天，著住廿磅戲服開工個個嗌辛苦，七子營救撼碑自盡的秋官一幕，成晚有人造雨降溫，爽。
伙頭督軍
草原地帶，超油膩凍飯盒成為每日開工醫肚的唯一選擇。勤做 gym練到六嚿朱古力的鄭伊健，食咗唔夠一個禮拜已經嗌晒救命，為免腹肌六合一，於是同六個主要演員傾掂數，分別安排各人的助手合力買餸煮飯，解決一日三餐，連帶一班主要的幕後人員都受惠。
「山長水遠，啲飯盒送到嚟都凍晒，好難食，好彩伊健開聲發起煮飯行動，大家先有機會日日七、八個餸，白飯任食。」一名幕後工作人員說。
飾演楊三郎的周渝民，造型同《魔戒》中奧蘭多（ Orlando Bloom）好似。
草原乜都冇， iPad成為林峯解悶工具，還在伊健介紹下，同工作人員合玩一個要肢體活動的遊戲。
炒唔起
片中七個男主角，其中五個是唱家班，電影公司一心諗住搵其中一個唱主題曲，藉此炒作眾人爭唱不和，宣傳谷戲；點知冇人肯孭，最老資格的秋官鄭少秋又反建議七子同他一齊合唱，但電影公司覺得冇新意，最後搵韓國當紮組合 Super Junior-M唱普通話版主題曲。
古裝片時裝海報，韓星唱普通話，打亂章！
撰文、攝影：娛樂組
留言列表
