娜姐近日喺微博話自己「出嫁」,原來係簽咗新經理人,做張栢芝師妹。
博出位
失戀自作業
有愛情滋潤固然好,但冇愛情嘅生命唔一定枯竭乏味。好似一班啱啱經歷情傷嘅藝人,繼續樂觀面對人生。 The show must go on,失戀最緊要自強!
周秀娜放眼世界
備受情變困擾而瘦剩棚骨嘅周秀娜,近日搬屋換大牀重新出發。早前佢喺微博放咗張喺眼前做心心手勢嘅相,擺明寓意做人要放眼世界啦!講真,本土好男人買少見少,娜姐咁諗都有佢嘅道理。
娜姐收禮物
雖然今年冇情人陪過元宵佳節,但娜姐依舊收到盒心形法式小甜餅禮物,向前度高呼活得比你好。
Avis發錯功
前度陳偉成( Avis)校啱時間喺微博發功,仲寫上「希望妳都要過得快樂」。 Avis所指嘅妳係唔係娜姐都好,都唔及寫錯元宵節個「宵」字咁礙眼啦!
Vivian啅四男
被指係小三嘅 Vivian亦不甘示弱,放咗張拍戲時同梁烈唯及其他劇組人員嘅合照,力證自己依然人見人愛。
高鈞賢美國飄移
啱啱宣布同圈外女友分手嘅高鈞賢,原來早前就去咗美國單身旅行。佢喺當地仲租咗架跑車玩飄移,非常寫意。佢話呢次遠行原本預埋圈外女友去,家陣因為分手而要孤身上路。凡事兩睇啦,依家一條友去旅行, free好多囉!
高鈞賢一條友去超市買咗包特大薯片,化悲憤為食慾。
龔嘉欣繼續放電
被鄧健泓飛咗大半年,龔嘉欣終於走出陰霾,笑番做人外,仲好似有咗新目標㖭。早前沈震軒放咗張同龔嘉欣合照上微博,講笑咁稱呼龔做老婆。但 dry咗一段時間嘅龔就好受落,仲留言嗌番沈做老公,認真肉麻。
沈震軒同龔嘉欣最近拍劇做兩公婆,但私底下二人繼續以老公老婆相稱。
留言列表