Bobby見到媽咪姐，不單冇黑面，仲笑晒口打招呼，之後仲拉住媽咪姐吹水。
媽咪姐
Bobby出院即撚狗
大吉利是講句，打開報紙，日日都有意外發生，有時都幾灰！
就講歐陽震華（ Bobby），大年初三凌晨喺朋友屋企拜年期間，因食得太飽搞到急性肺炎昏迷，入院搶救 12小時，好彩肥頭耷耳一副福相嘅佢，最後吉人天相，留醫 11日，上周五（ 22日）病癒出院。
Bobby出院即撚狗
神清氣爽嘅 Bobby，做埋柴可夫，車住四人一犬（ Happy仔）去深水灣 high tea。
Happy仔，你真係識摸門口囉！
Bobby經此一役，開始識得節制食慾啦，見佢對任何食物都係淺嚐即止。啱㗎，都係健康緊要嘛！
死過翻生嘅 Bobby返屋企休息咗一日，第二日（ 23日）黃昏五點左右就急不及待做司機，車老婆傅潔嫻、愛犬 Happy同兩友人去深水灣露天茶座曬住太陽食 tea。 Bobby雖然剛剛出院，不過尚算精神，同朋友有講有笑。媽咪姐亦發現，向來為食嘅 Bobby，聲稱以後飲食會檢點。原來佢唔係齋噏，媽咪姐見佢就算食炸薯條，都係一條起兩條止咋。
傾傾吓，眼利嘅 Bobby發現媽咪姐，仲好有禮貌同媽咪姐吹咗幾句：「嘩！你知唔知喺醫院十幾日真係好悶，仲唔出嚟曬吓太陽咩！我尋晚 12點幾瞓㖭呀，以前唔天光唔瞓㗎嘛！個人真係健康咗。不過個肺依然『 chok』吓『 chok』吓，唔係好順，要再休息多啲！」 Bobby臨走前仲識講笑，千叮萬囑媽咪姐唔好寫佢咁快出嚟蒲。
放心啦！有圖有畫有真相，媽咪姐從來都唔會亂嚟嘅！
唔好寫我咁快出嚟蒲呀！（真實對白）
吹水期間，媽咪姐發覺 Bobby瘦咗好多，比三個月前（右圖）足足瘦咗一個圈。
新劇《情逆三世緣》喺 Bobby入院期間停咗廠，不過佢會喺 3月中復工。關詠荷應該最開心。
出院前一日，心情勁好嘅 Bobby坐住輪椅都仲向記者示意 OK，不失其幽默本色。
留言列表
