818 娛樂八掛大放送★

無綫劇集嘅橋段唔單止好多時千篇一律，而且來來去去都係同一班演員，搞到觀眾相當混亂，睇到唔知邊套打邊套。

冇晒人冇晒橋

近期播緊嘅《幸福摩天輪》同《法網狙擊》，鄧梓峰、鄭子誠、呂珊同韓馬利都喺兩套劇出現，最離譜係韓馬利兩套劇都係認番個親生仔，噚晚韓馬利喺《法網》認番森美，到聽晚佢就喺《幸》劇同陳智燊相認，同一個演員一星期認兩次仔，唔通無綫真係冇晒人冇晒橋？

■韓馬利噚晚喺《法網》認完森美之後，聽晚又會喺《幸福摩天輪》同另一個親生仔陳智燊相認。劇照

噚日馮仁昭打電話畀韓馬利，佢哈哈大笑話：「咁啱啫，羅樂林一日死五次都係咁啦。」講到啲橋嚟嚟去去都係咁，韓馬利話：「都分別唔大嘅。其實兩套劇唔同時間拍，不過咁啱擺埋一齊播。呢個唔到我控制，我哋好被動。但我記得幾十年前佢哋排劇，係唔會同一個演員喺同一個時間（重複）出現，怕混淆。」問點解唔同公司提出兩部劇撞橋？佢話：「唔會啦，好似challenge佢哋咁，同埋演員唔想失咗每一個機會。若果兩個角色差唔多，演員惟有豐富自己個角色，希望做法唔一樣。唔通cast到你，你唔做咩！」

撰文：馮仁昭

■噚晚《法網狙擊》講到韓馬利攞到DNA化驗報告之後，踩上森美屋企同親生仔森美相認。
電視圖片

■韓馬利（下圖）一直想搵番個仔，點知森美（上圖）痛恨親生父母將佢遺棄，知道韓馬利係佢親生阿媽嗰陣極度憤怒。
電視圖片