肥鵝煲$178(大)$118(小)
鵝隻滿布油汁，非常甘香，最驚喜是芹菜、大葱等材料都入埋味，辣味愈食愈出。

潮𡃁便當

一煲兩味

2013年01月09日 ~~ 第294期 Face

最近凍到暈，望到熱食自不然雙眼發亮，行過火鍋店幾乎即決，點個雞煲，食完再打邊爐，一雞兩味好鬼爽！
最近，市面仲悄悄新推鵝煲、蟹煲、鱔煲，一煲兩味，選擇更多！

棄雞取鵝　新創炆鵝煲

食客 Joanne售貨員
我鍾意呢度嘅鵝煲同鵝肝，鵝肝好甘香，價錢都唔貴！

位於深水埗的小肥鵝，開業 2個多月，店主 Peter眼見市面雞煲火熱，反而另有諗頭，請來對火鍋食材極有認識、入廚 30年的材哥幫手，主力 sell鵝煲。由於材哥有相熟供應商，所以每日都會從內地運來新鮮獅頭鵝，鵝隻每隻例必重 6-7斤，確保肉質最肥美嫩滑。炮製鵝煲先要將鵝隻斬件去煎，再用上四川運來的香料好似八角、桂皮、指天椒等炒香，再以文火煮 1小時，上碟時加入大量芹菜，更可按吃辣程度加入店鋪自製的辣椒醬，進食時鵝隻同材料愈煮愈出味，食完之後，加上以豬筒骨熬製而成的豬骨湯打邊爐好正！

小肥鵝火鍋料理
地址：深水埗元州街 26號地下
電話： 2729 1189
營業時間： 6pm-3am

3大推介

法國鵝肝$86
鵝肝配鵝煲，甘香味 double up，非常 match，不過記得 1分鐘內上碟，唔係渣都冇！

自製蝦籽蝦腐$58
將海蝦加入蛋白等材料以慢火炸成，外脆內軟，蝦味突出，細細粒，可充當餐前小吃。

手打流沙蝦丸$78
每日新鮮製造，將鮮蝦打成膠，蝦丸內包裹鹹蛋黃。蝦丸彈牙，一咬爆黃，食時要小心。

自家製紫貝天葵$28
選用來自四川的紫貝天葵煲成。打邊爐熱氣，飲番杯酸酸甜甜的涼茶，清熱降火。

地點：佐敦港鐵站 B2行 10分鐘內到。
環境：店鋪向街，有泊車位，店內空間中規中矩，不算侷促。
打邊爐配料：有大量自家製食材，例如手打蝦滑、蝦丸等，當中以手打流沙蝦丸較具創意，坊間少食到。

無添加蟹煲鱔煲

初到位於不甚起眼處的基哥火鍋，以為店鋪以招呼本區街坊為主，原來 80%食客均來自區外，或駕車前往，或專誠慕名前往。老闆之一基哥，曾為聘珍樓總廚，入廚 40多年，經驗老到，難得是老驥伏櫪，志在千里，與朋友四哥因為喜歡邊打邊爐邊談天說地，所以 2個多月前，決定開一間火鍋店，自己開心之餘以饕食客。店內主打粉絲肉蟹煲及蒜子白鱔煲，同樣不加任何油鹽糖調味，只以食材本身特性調味，例如粉絲加入鹹香豬肉粒及蝦米仔，再以蟹膏蟹肉帶出層次及鮮美；白鱔則加入蒜子及腐乳，利用蒜子及白鱔烹調出油的特性，食落不會太乾，亦不會一味以汁調味， good fit！

XO醬金沙粉絲肉蟹煲$268(大)$398(特大)
XO醬乃基哥親製，加入指天椒、馬友、蝦米、鹹魚等材料而成，食落粉絲吸盡蟹味、 XO醬味及蝦米鹹香，蟹肉亦不遑多讓，因為經過「走油」，肉質鮮味仍能保留。

蒜子乳香爆白鱔煲$268
白鱔望落有乳白色，其實乃腐乳煮溶後再加上白鱔蒜子出油的效果，視覺上固然吸引，食落蒜香味十足，卻不會太膩，多多都食哂！

3大推介

自家炸鳳爪$38
來貨後先炸後煲再調味，然後放過夜待其定型及滲出膠質，骨膠原睇得到！

自製墨魚丸$68
墨魚丸臨上碟時，基哥仲會將墨魚肉來回在砧板上打到「啪啪」聲，更彈牙。

豬皮$25
豬皮經自家焗製，再加上白醋待其變軟，唔似坊間豬皮，來貨係咁上碟就係咁。

老闆基哥
蟹煲特選菲律賓 A級肉蟹，每隻一斤半以上，肉質飽滿鮮甜，以乾身的烹調方法去煮，粉絲仲唔會碎濕濕，可以食到粉絲焦，粉絲焦你試過未？

基哥火鍋小廚
地址：土瓜灣下鄉道 40號地鋪
電話： 5111 4230/5108 3364
營業時間： 6pm-2am

地點：不近港鐵站，一街之隔有巴士小巴到尖沙咀、旺角等地。
環境：店鋪向街，有泊車位，空間開揚。
打邊爐配料：有大量自家製食材，例如炸鳳爪、鮮蝦水餃等。

醇香花雕雞

午市還在賣米線，晚市就轉而賣雞煲，招牌醬爆雞煲用上老闆 Jason親購的秘醬，加入指天椒、桂皮、八角等材料重新再調配，乃雞煲靈魂所在。不過說到特別，還要數店內花雕雞鍋，選用古越龍山花雕酒，加入 10多種藥材如川芎、白芷、雲苓、白朮、當歸等入饌，湯身滾熱時香氣四溢，入口酒味濃郁，飲完一口又一口！最緊要是，川芎白芷等材料放埋喺煲入面，顧及到客人倒湯時，可以繼續揮發材料香味，湯底唔會愈食愈冇味，除了忙食雞，又要忙飲湯，仲要忙埋打埋邊爐，忙忙忙！

八寶花雕雞鍋$108(半份雞)$188(全份雞)
藥材及酒香味濃郁，建議可加羊肉同吃，湯底味道更濃，冬天暖身佳！

亞伯醬爆雞煲$108(半份雞)$188(全份雞)
帶沙茶醬味，雞件肥瘦適中，入口尚算嫩滑。

3大推介

蒙古羊肉片$68
羊片即叫即切，厚薄適中，羊味不算濃，吸入湯汁後層次更豐富。

章魚芝心丸$36
入口先是一陣墨魚鮮味襲來，咬落有香濃芝士汁爆出，好熱！

韮菜餃$36
乃 Jason太太親自購來新鮮豬肉及韮菜包成，皮薄餡料大，好多客人都點！

食客 Yoyo大學生
鍾意花雕雞鍋，因為花雕酒味好吸引，一食就上癮，加上呢排好凍，啲湯飲咗好暖身、好舒服。

地點：佐敦港鐵站 C2行 10分鐘到。
環境：店鋪向街，有泊車位，店內空間較小，但不侷促。
打邊爐配料：食材較大路，有丸類、餃類、魚羊雞豬等肉類。

亞伯小鍋米線雞鍋
地址：佐敦廟街 257號地下
電話： 2736 1346
營業時間：星期一至六： 12nn-3pm， 6pm-12mn，星期日: 12nn-10:30pm