在富良野遊覽時， Ivy看見了一大片向日葵田，猶如置身花的海洋。

青雲路

80後玩盡日本 Working Holiday

2013年01月09日 ~~ 第1094期 交易通．搵車快線

香港人一直都熱愛日本文化，漫畫、動畫、服飾等都有一大群支持者，日本在 10年宣布舉辦「工作假期計劃（ Working Holiday Scheme）」後，讓一眾哈日族有機會體驗當地生活。而今期〈青雲路〉就找來剛參加完日本 Working Holiday的 Ivy，與大家分享當地的工作生活及旅遊實況，去日本都可以 work hard play hard。


到京都遊玩時， Ivy一時興起，打扮成舞妓拍了一輯照片。

「嗰次係我第一次見到真雪，成個天地都雪白一片，氣溫得-10度，我 着到好似隻 糉咁，不過都忍唔住攤 喺雪地上玩，仲喺上面寫字，諗番都覺得好笑，唔使返工 嗰陣仲可以免費滑雪。」說起去日本 Working Holiday， Ivy說最難忘第一次看到滿地白雪的體驗。
今年 27歲的 Ivy，大學畢業後做了 4年公關，為了想有空間找未來方向，她在 12年 1月開始日本工作假期之旅，「覺得 PR呢行好似唔係咁 啱自己，想畀一個空間自己諗將來 嘅方向，讀大學時冇去過外國交流，於是決定參加 Working Holiday。」
對日本文化十分有興趣的 Ivy，二話不說便選擇了日本的工作假期計劃，「好多去日本 Working Holiday嘅人都會揀東京、大阪等市區做落腳地，但我去日本係想體驗香港冇 嘅 嘢，於是我去郊區搵工，本來想去北海道，不過咁 啱我上 Inni Consulting網搵工，交咗 CV之後，第二日就有 agent聯絡我，話長野有度假村請我做服務員，於是定 咗 1月飛去日本。」 

搭 8個鐘車去長野

要到位於本州的長野， Ivy要從東京坐 8小時巴士前往，「我 喺座雪山上 嘅滑雪場入面 嘅餐廳做打雜，好似上菜、洗碗、煮嘢食都要做，而放工就住 喺山腳 嘅宿舍，如果想去最近 嘅鄉鎮都要行個半鐘，有時我夜晚會去鎮上浸溫泉，好彩見我係滑雪場員工，每晚優惠價只係 300日圓。」日薪約有 5,600日圓，但要交 20%稅，每星期放 1天假，月入約有 12萬日圓。
在長野打工，讓 Ivy認識到日本人的認真，「日本人做 嘢好嚴謹，好似有同事將碗拉麵淥多 咗幾秒，師傅就鬧佢發緊夢，要倒 咗佢再淥過，但後面已經有客人排隊等緊，初頭覺得咁做太誇張，慢慢先知師傅想將最好 嘅畀客人，係一種敬業 嘅精神。師傅連切蔥、叉燒等都親力親為，但 喺我做 咗差唔多 1個月時，佢竟然叫我幫手切蔥，令我好感動，因為佢信得過我。」
這份工作除令 Ivy體驗到未試過的冰天雪地生活外，還令她適應了與日本人溝通。「日文分 N1至 N5級，我 喺香港學到 N5係最基本級數，可以作簡單對答，最初同日本人對答都唔係幾聽得明，好彩佢 哋見你識識 哋日文，會放慢講嘢速度就番我，慢慢就適應到。」


完成長野的工作後， Ivy便到東京周圍賞櫻。


最令 Ivy（左）難忘的是日本雪景，在公餘時，她會到滑雪場滑雪。

轉工作前趁機遊玩

在長野逗留 3個月後， Ivy去了本州其他地方旅遊，「做完長野份工後， agent話餐廳幾滿意我 嘅表現，就再介紹我去北海道一間民宿做接待員，見 7月先過去，想周圍去玩，當時 4月頭係櫻花盛開時，我去咗東京周圍賞櫻，之後去埋京都同名古屋。」
經過 1個月的旅行， Ivy只剩下約 5萬日圓，離北海道的工作還有個多月時間，旅費不足，她去了廣島的觀光農場工作，「日本有農業或牧場體驗組織提供工作，包食住，但只有薄酬算係半義工性質，雖然日薪只有 3,200日圓，但唔使扣稅，查實都唔少。」
在廣島的工作雖短，但令 Ivy留下難忘印象，「我 喺農場主要負責照顧巨峰提子， 喺佢開花時修剪、施肥，結果時就用袋套住佢 哋防止俾蟲咬。最正係遇到螢火蟲祭，夜晚同一班人拎住燈籠行入森林，見到成條河都係螢火蟲閃吓閃吓，個畫面真係好夢幻。」

民宿體會溫情生活

在日本， Ivy有不少初次體驗，包括第一次玩彈珠機，便贏了 4,000日圓，令她十分興奮。

完了農場工作， Ivy便出發到北海道的英式民宿 Yorkshire Farm工作，民宿是家庭式經營，主人是一對夫婦及 80歲的奶奶，擁有 15公頃的牧場和大片農地，「雖然話係接待員，除 咗招待人客，都係要入廚房煮 嘢，不過 嗰家人對我好好，佢 哋有一塊田種蔬果、香料畀民宿用， 喺我請求下，畀 咗 啲位我種紅蘿蔔，令我感受到食自己親手種 嘅 嘢 嗰份開心。」扣稅後每月約有 15萬日圓的收入。
竹田家待 Ivy猶如親人，令她感到非常親切，「合約完結後，竹田家特登唔做一日生意，陪我去附近餐館食 嘢同浸溫泉幫我 farewell，返到 嚟香港繼續同佢 哋保持聯絡。竹田先生就 嚟生日，打算送份禮物畀佢，當做驚喜。」
3個月的民宿工作結束後， Ivy再回到廣島的觀光農場工作，「 10月係農場收成期，都想睇番自己照顧過 嘅農作物收成，於是返去農場做 嘢，今次就喺加工場工作，將 啲製成果醬、蘋果乾 嘅成品包裝好，工作都幾簡單，人工反而高 咗，日薪有 4,000日圓，十分唔錯。」
在 11月， Ivy有朋友去日本探望她，於是結伴去了和歌山縣遊玩，到訪變了夏威夷 Waikiki齊名的白良濱，「我 哋住 喺蒲島酒店，佢有兩個天然洞窟溫泉，浸緊溫泉都可以望到個海，仲有 4個特色溫泉，可以望到日出、日落等唔同景觀，真係度假好地方。」好的享受當然要付出代價，短短 1星期便花了約 25萬日圓。 

返工要早到

在日本工作，不是要準時而是要早到，「雖然話 9點返工，但你要早 15分鐘到，因佢 哋每日都有個『早禮』，類似 briefing，好似我喺長野份工，上司就會講番今日會有咩活動、有咩要注意、之後振奮吓士氣，佢份約冇寫明你要出席，不過唔去會俾同事白眼，好似怪物咁望你。」


右：竹田先生
Yorkshire Farm老闆
到達北海道的英式民宿 Yorkshire Farm工作時，老闆竹田先生一家對待 Ivy猶如親人，故在離開時，十分不捨，「好唔捨得佢 哋，成日攬住佢 哋喊！」

我𠵱度唔少客人都係外國人，但有 啲日本人唔識英文，所以想請個識英文 嘅人返 嚟幫手。我 哋請 Working Holiday呢類短期工，想應付夏天 嘅旺季。 Ivy嘅工作表現亦十分好，不但識日文、英語同中文等語言，而且佢 嘅好客令到唔少客人都好開心。 

有多餘錢帶回香港

Ivy本想再去三重縣觀賞深秋紅葉，但因訂不到旅館，於是決定打道回港，「我最初帶 咗最低規定 嘅 20萬日圓過去，大約係夠來回機票同 1個月生活費，上網睇去過 嘅人通常要倒貼多 2、 30萬日圓，而我目標係可以最後帶到錢返香港，日本 嘅物價係香港 3至 4倍，食一個簡單拉麵要成 80蚊港幣，車費係最貴，搭 JR去其他縣，閒閒哋都要成千蚊港幣，要就住 嚟用。」 11個月的日本之旅，日本共有 47個都府縣， Ivy便去了其中 19個，最後更有 11萬日圓用剩帶回香港。
在上年 11月尾返港後， Ivy已決定今年 1月再去澳洲，「返到嚟覺得香港 嘅急促節奏、人多車多唔適合我，我 喺日本可以坐 喺草地上望 2個鐘羊， 喺香港就做唔到，有 啲唔適應。咁 啱有朋友想去澳洲 嘅 Working Holiday，於是我又一齊去，個申請都批埋，打算 1月就出發。」


Ivy請求竹田先生讓她在田上種紅蘿蔔，「原來食自己親手種 嘅 嘢咁開心。」


回港後， Ivy仍會與日本朋友保持書信聯絡。

點搵工？
搵定工先出發

去工作假期最理想當然可以邊打工邊玩樂， Ivy說在出發前已做足準備，「日本經濟唔係太好，用工作假期簽證去到當地，唔可以幫同一個僱主工作超過 3個月，教識你做冇耐就要走，其實好多公司都唔願請，最好就係網上搵到工先出發，咁就最穩陣，網上有好多唔同類型 嘅工作職位，實搵到 啱自己 嘅，我都係 喺網上搵到度假村 嘅工作。」
Inni Consulting︰ http://www.inniconsulting.com

搵農場工

Ivy說如果想去農場或牧場工作，可以到日本全國農業或牧場體驗情報站找尋半義工工作。「可以搵到全日本 嘅農場空缺，通常包食宿及有薄酬。」
日本全國農業或牧場體驗的情報站︰ http://www.volubeit.com/index.html

Hello Work搵市區工

想了解有關日本 Working Holiday， Ivy推薦 Hello Work，「入面提供 嘅服務同香港勞工處類似，唔少以東京、大阪等大城市作為落腳地 嘅人，都會喺到 埗後去交履歷表搵工，不過我比較鍾意去郊區，所以冇試過 喺呢個網搵。」
Hello Work︰ http://www.hellowork.go.jp

如何申請日本工作假期計劃？

日本的工作假期每年有 2次申請期限，分別是 4月及 10月，每年會發出約 250個簽證，獲簽證人士可在日本最長逗留 1年工作、旅行及交流。去日本會要求經濟證明最少有 20萬日圓，足夠購買回程機票和維持在日本逗留初期的生活費用。
申請人年齡必須介乎 18至 30歲、持有香港特別行政區護照或英國國民（海外）護照的人士。此外，要填寫履歷、自薦信及行程計劃書，講解申請日本工作假期的理由及預計工作、活動等內容。
2013年的日本工作假期簽證第一期將於 4月 15日開始接受申請，有興趣的人士可到日本領事館的網站查詢詳細資料。 Ivy說︰「坊間介紹日本 Working Holiday嘅書入面會有 啲範本參考，而我就寫 咗對日本文化有興趣，想去當地感受吓，加上我學緊日文，想有進步作為申請理由。」

日本領事館︰ http://www.hk.emb-japan.go.jp 

撰文：曾志恒
攝影：彭自維
部分圖片由被訪者提供