《鐵甲奇俠》頭 1、 2集夾埋，票房大收超過 12億美元（約 93億港元）。咁好賺，唔怪得電影公司急急拍第 3集，套戲 4月尾先上畫，但電影公司已預計今集起碼收 6億美元票房，超大口氣。
西面
2013英雄世界
傳說中的世界末日，原來得啖笑，𠵱家個個平平安安，梗係要繼續 happy，等睇好戲啦。
2013年，大把荷里活猛片輪住上，除傳記式巨著，更有科幻動作大製作，不過承接 2012漫畫英雄片熱，今年繼續係漫畫英雄片獨大，打頭陣有 4月上畫的《 Iron Man 3》（鐵甲奇俠 3），緊接有講超人嘅《 Man of Steel》及《變種特攻：狼人外傳》續集，統統漫畫英雄，呢期大包圍騷畀你睇。
Iron Man唔夠打
《鐵甲奇俠 3》
上映日期： 4月 25日
打到入廠
上年蝙蝠俠玩折墮，今年輪到鐵甲奇俠。新一集《鐵甲奇俠》中，羅拔唐尼飾演嘅 Tony Stark唔只精神出現問題，仲慘被壞人打到散晒要入廠，失晒威。
女友被虐
戲中開頭，鐵甲奇俠同女友兼助手 Pepper Potts原本好癡纏，恩愛到死，但之後唔只被壞人打殘，連女友亦被人擄走，仲被綁凌虐，搞到鐵甲奇俠束手無策。
老友幫拖
今集，鐵甲奇俠唔夠班恐怖組織砌，據知由 Don Cheadle飾演嘅 War Machine要出手幫拖抗敵，今次仲換埋新盔甲上陣，誓要幫老友鐵甲奇俠出番一口氣。
最新奸角
戲中最大奸角係由老牌演員 Ben Kingsley飾演嘅 Mandarin，今次 Ben sir做恐怖組織首腦，頭腦冷靜又機智，鐵甲奇俠都唔係佢手腳。
上集講到羅拔唐尼飾演的鐵甲奇俠 Tony Stark幾經辛苦先打敗大奸狗「喪鞭」成人人景仰的英雄，不過英雄唔會一世風光，今集將講到鐵甲奇俠點樣折墮。
女友被綁架
腳傷照開工
炸爛豪宅
恐怖組織要攻擊鐵甲奇俠，先從佢屋企埋手。戲中，鐵甲奇俠同 Pepper Potts位於加州嘅豪宅愛巢，慘被兩架直升機發炮狂攻，最後全屋盡毀，鐵甲奇俠更被轟入海底。
戲中羅拔唐尼慘被打到散晒，而上年 8月羅拔拍打戲途中，亦因出現意外，搞到腳踭受傷。據知傷勢頗嚴重，但羅拔為免阻礙拍攝進度，就算激痛都照開工。不過受《 Iron Man》帶挈，𠵱家羅拔拍一部戲收成 1千萬美元（約 7,800萬港元），真係辛苦啲都抵啦！
狼人殺去日本
《狼人外傳》續集（ The Wolverine）
上映日期： 7月 25日
失憶開始
新一集《狼人外傳》講 Hugh Jackman因失憶，繼而到日本找尋自己嘅身份，一切由失憶開始。
惡鬥忍者
去得日本，戲中當然要加插日本最出名嘅忍者同狼人比試吓武功。就連宣傳海報，狼人都要揸住東洋刀踎喺塔頂擺甫士。
狼人經常要赤裸上身騷肌肉，主角 Hugh Jackman於開拍前 3個月，日日玩 gym 4粒鐘，終於練到 8嚿腹肌，連手筋都現形，同《孤星淚》的大好人 Jean Valjean完全唔同 feel。
跟鐵甲奇俠一樣同屬 Marvel漫畫英雄，由 Hugh Jackman主演的第 1集《變種特攻：狼人外傳》（ X-Men Origins: Wolverine），於 09年推出，埋單票房接近 4億美元，雖勁收得但口碑麻麻。
話晒《狼人外傳》係 Hugh Jackman招牌作，今次拍續集梗係唔衰得，於是改搵曾執導《弦途有你》導演 James Mangold操刀，諗住擦出新火花。今次故事講失去記憶的狼人，為尋找自己的身份，將殺到去日本，所以今次《狼人外傳》續集將加入大量東瀛元素；話晒日本市場咁大，身兼監製同演員的 Hugh Jackman真係識計數。
超人 reboot
6年前由 Brandon Routh主演嘅《超人》，劣評如潮。今集重新洗牌，由 29歲英國演員 Henry Cavill擔正，就連超人套制服都換埋。
《 Man of Steel》
上映日期： 6月 27日
06年大導演 Bryan Singer曾執導《超人強戰回歸》（ Superman Returns）反應一般，但超人屬於 super hero中的大哥大，點可以認輸，於是電影公司將超人從頭 reboot，今年推出的《 Man of Steel》將描寫超人由阿爸送去地球，長大後擔任《每日星球報》做記者，同 Lois Lane拍拖，之後成為英雄的故事重新講一次。呢條橋上年《蜘蛛俠》都玩咗一次，一樣大收超過 7億美元票房，相信超人都唔會輸蝕。
騷肌狂跑
身高 6呎 1吋嘅 Henry，擁有 42吋巨胸，戲裹面梗係要剝衫騷吓 quali。
超人都拉
雖然超人擺明正義，但今次都被壞人老屈，搞到要塔上手扣被拘捕。
科幻點少得？
美國人，無論幾時都諗住有外星人入侵地球，所以要團結起嚟打喪屍、異形仲有外星人。拯救地球，真係靠晒美國人。所以 2013嘅荷里活大片，又點少得科幻巨作？
畢佬新戲中，橫行嘅喪屍襲擊全城，嚇到班市民爭相走避造成恐慌，睇見畢佬捉住個女狂走嘅緊張樣，就知美國人又係時候拯救地球。
畢佬打喪屍
《地球末日戰》（ World War Z）
上映日期： 6月 20日
由型佬畢彼特主演，改篇自美國暢篇小說的《地球末日戰》，講述飾演聯合國職員的畢彼特，一天同屋企人出街時，發現一群喪屍摧 毁整個城市，於是帶住家人拯救世界的故事。近年畢佬轉型拍嚴肅劇情片冇票房冇口碑，上年開始食回老本拍商業片，今次《地》片唔打外星人，轉打喪屍，算有啲新意。
大師出手
《星空奇遇記：黑域時空》（ Star Trek Into Darkness）
上映日期： 5月 16日
卻克隊長 Chris Pine（左）同冼樸 Zachary Quinto（右），唔只對抗侵略者， 2人仲會爭靚女科學家 Alice Eve，友情將受考驗。
照舊由 Chris Pine飾演卻克隊長、 Zachary Quinto主演冼樸，今集 2人巡邏太空時，被犯罪天才 John Harrison襲擊，仲要致所有艦隊於死地，目的其實係復仇。今年《星空奇遇記》，將由史匹堡愛將、曾執導《 S8驚世檔案》的 J. J. Abrams加埋《變型金剛》幕後班底炮製特技，有大師出手，肯定爆！
靚湯再戰外星人
《 Oblivion》
上映日期： 4月 11日
片中靚佬湯動作連場， 50歲嘅靚佬湯，近年狂拍動作片，體力、魄力及身形的確令人敬佩。
繼《強戰世界》後，靚佬湯主演新片《 Oblivion》再次同外星人打仗，講未來地球經歷浩刧後，為保衞地球，靚佬湯自己維修戰機同外星人死過。上年中，靚佬湯拍此片時，正值前妻 Katie Holmes帶住 6歲愛女 Suri走佬鬧離婚，但據稱靚佬湯當時情緒極度低落，但埋位拍戲時一樣好投入。
另類選擇
荷里活貴為夢工場，怎會獨孤一味？ 2013年除漫畫英雄片外，唔少傳記式或改篇舊作的電影，好似《林肯》、《大亨小傳》同《獨行俠》等預告一出，即成話題，唔少更被睇好會被提名奧斯卡。
《大亨小傳》
上映日期： 5月 10日
靚人靚景
第 5次翻拍的《大亨小傳》，由里安納度加杜比麥奎爾及索女嘉莉慕萊根主演，講述杜比飾演的作家見證里安納度飾演的富翁（ Gatsby）由燦爛到腐敗的故事。此片以金光閃閃的靚景為大賣點，戲服更由 Prada提供，未上映已贏咗個勢。
《林肯》
上映日期： 2月 21日
一代偉人
《林肯》描述由 Daniel Day Lewis飾演的美國總統林肯，由如何施展政治手腕，到遇弒身亡的經 歴。據稱 Daniel當初曾推拍此戲，但史提芬史匹堡託好友里安納度游說後， Daniel先肯接拍。𠵱家《林肯》一片被視為奧斯卡大熱電影，如果得獎真係要多謝里安納度。
《獨行俠》
上映日期： 8月 1日
Sell怪雞
翻拍美劇的《獨行俠》，講蒙面嘅獨行俠同紅番 Tonto於美國西部儆惡懲奸嘅故事。由怪雞男星 Johnny Depp飾演紅番一角，雖然唔係主角，據知係佢自己揀，因為想試吓做配角嘅滋味。 Johnny Depp連諗嘢都怪雞過人。 
留言列表
