《今日我至勇》將軍澳
湯盈盈年底同錢嘉樂奉子成婚，有咗三個月嘅盈盈前晚竟然唔戒口去買魚生、壽司食，係盈盈呢啲外國長大嘅，先至會做咁勇嘅準媽媽。
湯盈盈年底同錢嘉樂奉子成婚，不過懷孕3個月嘅盈盈，前晚9點幾喺無綫拍完《老表，你好嘢》之後，竟然走咗去將軍澳新都城買魚生壽司。記者話有咗 BB仲食生冷嘢，盈盈就尷尬咁笑，跟住揸車返咗佢同樂樂匡湖居愛巢。
噚日上晝10點盈盈同郭晉安以及林盛斌（ Bob）喺銅鑼灣拍《老表》，隱約見佢肚凸凸。盈盈下晝同安仔等人去大坑火車頭食晏，叫咗碗全熟牛河。
銅鑼灣 吸二手煙 
食熟牛河 
請教養胎 拍劇搵替身
問盈盈係咪減少動作戲份？佢話：「冇特別要求，嚟緊仲有場跣低嘅戲。」係咪要戒口？佢就話：「少食生冷嘢，今日特登唔食生牛肉湯河。」講到佢終於嫁得出，佢好得戚咁話：「應該話佢（樂樂）終於恨到。」盈盈話喺《老表》度俾阿 Bob搞大咗個肚，似乎呢部劇好 lucky，盈盈笑笑口話：「係啦！」講到佘詩曼班姊妹嬲佢咁口密，盈盈話前晚要 WhatsApp解釋，搞到唔夠瞓。安仔就話遲吓盈盈要搵替身拍劇，又踢爆盈盈好心急請教佢有關大肚婆嘅飲食。
採訪：文國駿、李志明
攝影：楊浩賢、朱志聰
錢嘉樂裝修愛巢 迎接BB
錢嘉樂與湯盈盈造人成功，鐵定年底結婚，向來浪子的嘉樂一夜變成「愛妻號」，昨日全日家中靜思，打算翻新愛巢，就連最愛的戰車也要轉為家庭車代步，婚禮則全權交由好友梁靖琪（Toby）策劃，至於準新娘盈盈則繼續為新劇開工，全程報以甜笑。
錢嘉樂前日突然宣布年底迎娶女友湯盈盈，雖然女方未肯公開承認有喜，但已私下向身邊好友證實懷孕，即將榮升爸爸的嘉樂興奮不已，為給盈盈及BB最好的生活，大細路嘉樂也一夜長大，加入愛妻號行列。
昨日嘉樂接受本報訪問時仍難掩興奮心情，笑言沒有想過將人生大事告知親友，原來是那麼困難，再被追問是否雙喜臨門？他繼續避談：「首先享受咗結婚過程，其他嘢一步一步嚟。（要準備好多嘢？）都同盈盈諗過，係咪要買過間屋？但住緊呢個地方好舒服，有諗過裝修同翻新囉，車都要轉過部大車。」
錢嘉樂終於生性，為盈盈及ＢＢ換大車。（資料圖片）
湯盈盈前晚獨自駕車到將軍澳買外賣。
拍檔郭晉安不時叮嚀盈盈要小心。
夢想小島行禮
嘉樂更透露二人夢想在小島舉行婚禮，但現時卻決定於香港註冊及擺酒，婚禮一切事宜將交由好友梁靖琪策劃。尚未開工的他昨日全日於家中靜思計劃將來，問可有擇日結婚？他說：「交晒畀盈盈負責，唔好以為佢係鬼妹仔，其實好傳統。」
準錢太盈盈前晚完成新劇《老表，你好嘢！》拍攝後，獨自駕車到將軍澳某日本餐廳買外賣，對記者所有提問也只以微笑回應，之後便返西貢匡湖居愛巢。及至昨早盈盈又再出動，與郭晉安、林盛斌（Bob）到大坑繼續為《老》劇開工，約中午前完成戲份離開，腹部微隆的盈盈不時摸着肚皮，又用手袋掩肚，兩位拍檔前後護送穿上高踭鞋的盈盈上車，眾人到附近的越南餐廳食晏，問她是否戒口？盈盈說：「我今日都冇食生牛肉啦。」其後劇組再轉到尖沙咀繼續拍外景。
梁靖琪讚賢妻
盈盈接受訪問時，未有正面回應懷孕傳聞，問到嘉樂求婚時是否喊晒？她甜笑：「邊有呀！（擺脫盛女行列嫁嘉樂？）係佢恨到！」而她拍完尖沙咀戲份後，先乘公司車返電視城再取回座駕返西貢。
至於身為二人婚禮策劃人的梁靖琪，透露嘉樂與盈盈在2、3個月前已邀她計劃婚禮：「我會盡量滿足佢哋嘅需要，（盈盈着褂？）梗係啦！會畀佢揀，盈盈係個好傳統嘅女人，平時好照顧嘉樂，又會煮飯，係賢妻良母，依家都幫佢諗緊婚紗係點。」
文：影視組
攝：追蹤組
留言列表
