最後公開露面
諸葛最後一次出席公開場合係 6月尾，之後已停工安胎，冇再露面。
造人成功
有餡 3個月 諸葛紫岐生贏法拉
年初因為小產而同大嫂陳法拉隔空對鬧的諸葛紫岐，自從 3月與 Neway二少薛嘉麟正式擺酒後，一直努力再造人，又不時被影到狂掃補品補身。
催谷多月，據知週一（ 20日）踏入 30歲的諸葛，成功懷有薛家骨肉，佗 B約 2、 3個月。曾經歷小產的二人今次相當小心，諸葛閉關暫停接 job、二少更放低市值 20億的上市公司業務，停工陪實老婆安胎。
高調入門再佗埋薛家金叵羅，諸葛呢鋪穩贏唔願生法拉喎！
比起遲遲唔認係薛家人、又唔肯為家庭放棄事業的陳法拉，聽教聽話的諸葛紫岐明顯比較得寵，獲批 800萬大搞婚禮同 3千萬首飾做結婚禮物，加上老公薛嘉麟深得老父薛濟傑疼錫，將 20億王國交畀佢打理，兩公婆絕對要風得風。
休養半年
一直想為薛家添丁的諸葛，上年聖誕節與二少到夏威夷旅行時意外小產，消息傳出後，法拉竟搶先澄清「冇事發生」，妯娌誤會更深，最後要諸葛喊住親證小產。
不幸流產，好在諸葛仲後生復原快，而且有薛老太貼身照顧，經常買補品畀新抱進補。據知諸葛卒之成功在 3個月前再度懷孕，等生蛇 B。「其實上次 Marie（諸葛）同二少都好唔開心，反而薛老太睇得開，冇迫新抱再追 B，淨係叫佢要調理番個身體，又介紹 咗北角一個有名中醫師畀佢！ 𠵱家諸葛除 咗睇呢個醫師，另外都有 keep住去佢睇開油麻地嗰個閻慶昕醫師。」知情人士透露。
諸葛造人成功，難得二少薛嘉麟肯放低工作，陪老婆度假安胎。
30歲生日兼有喜，唔喺香港嘅諸葛將食蛋糕相放上微博。一個人食 3件蛋糕，好胃口喎！
諸葛以老闆娘身份幫 Neway旗下的 HotCha重新打造新形象，但如今諸葛大肚停工，據知 HotCha非常擔心呢段時間冇工開。《忽然 1周》圖片
鬥到末日
薛家兩個新抱由未入門開始已針鋒相對，鬥足多年，如今諸葛成功爬頭早過法拉佗 B，打到埋身，唔到法拉唔急啦！
外地安胎
被法拉暗指假小產，諸葛今年 2月喊晒口證實流產消息。
早前被影到狂掃人參等補品的諸葛，得知自己再次有 咗即非常謹慎，與二少商量後，決定停工專心安胎， 6月尾出席完最後一個手袋騷後再冇公開露面，連 7月原本應承的時裝騷都突然 no show。
據知即將做老豆的二少相當細心，一早向公司請假陪實老婆。由於懷孕頭 3個月最關鍵，薛家兩老已吩咐諸葛盡量少出街，諸葛亦聽話飛到加拿大老家養胎，由屋企人同老公照顧，確保萬無一失。
週一撞正 30歲生日的諸葛，對於有餡 3個月一事，在電話中連聲否認：「冇呀冇呀！邊個講㗎？真係冇喎！（有消息話你喺外國安胎？）唔係呀，不嬲暑假我都去旅行，呢一個半月我去咗幾個國家，今日正日生日就返咗北京同媽咪一齊慶祝。（係咪怕未夠 3個月小器呀？）冇呀，我下個星期返㗎喇！」上年諸葛小產前亦曾公開否認佗 B，今次繼續一貫作風唔認有咗，明白嘅！
蛇 B輪住 嚟
龍年旺結婚生仔，出年蛇年都唔弱，周家蔚同湯盈盈已證實懷有蛇 B，梁詠琪、關心妍同 Amanda S.等人亦話會努力，希望佢哋成功！
湯盈盈
早前拍拖 5年的錢嘉樂，喺蘇梅向湯盈盈求婚成功，盈盈更懷有約 3個月身孕，計劃先於年底註冊，下年再擺酒。 
周家蔚
今年 3月同洪天明拉埋的周家蔚，婚後努力造人，早前承認懷有 3個幾月蛇 B，預計下年 1月生得，暫未知性別。 
留言列表
