BoA為谷新韓文大碟《 Only One》，亦唔錫身， sell女人味晒靚腿，絕對唔比少女時代班師妹遜色。
韓面
BoA V煞回歸
韓國名牌經理人公司 SM Entertainment旗下粒粒巨星，當中最有分量並非東方神起或者少女時代，而係國寶級天后 BoA。
BoA由 14歲唱到 𠵱家 26歲，再進軍日本市場，近年仲攻埋美國，唱勻全世界咁滯，上月 BoA終於回歸韓國樂壇推出新大碟《 Only One》。天后唱得跳得冇甩轆，仲包辦作曲兼填詞 sell才華，最奇係 BoA回歸竟忽然變咗大眼妹，下巴更尖到㓤死人，變臉程度誇張過香港「 V煞」黃婉曼。
已出道 12年的 BoA（真名權寶雅），於 02年 16歲時推出韓文大碟《 No. 1》勁賣超過 60萬張，成銷量天后，之後更主攻日本市場，多張日文大碟如《 Valenti》等銷量超過 100萬張，可惜近年 BoA於日本的氣勢被同鄉女團 KARA壓住，今年轉陣再戰自己地頭韓國市場，上月尾便推出全新韓文大碟《 Only One》。
’10：鼻扁下巴圓
前年出席 MBC FM電台節目時， BoA罕有地以素顏示眾，矇豬眼加扁鼻，完全認唔出佢係天后 BoA。
’12：直鼻尖下巴
今年 26歲嘅 BoA，唔只雙眼忽然大得嚟有神，個鼻仲直到變間尺，最明顯係下巴，尖到㓤死人。
Sell埋才華
BoA身為神起同少時大師姐，歌藝同舞技當然有番咁上下，最新《 Only One》大碟歌曲以一貫大路 Hip Hop跳舞歌為主，而主打歌〈 Only One〉更由 BoA親自作曲兼填詞， sell埋才華。音樂風格照舊，但 BoA個樣就愈變愈靚，以前單眼皮兼扁鼻的她， 𠵱家唔只變大眼妹兼間尺鼻，最明顯係面形尖晒變 V煞，成個樣唔同晒。
師弟力撐
BoA回歸，上月尾上《人氣歌謠》谷新歌〈 Only One〉， SHINee嘅泰?就傍住師姐一齊跳舞，夠晒合拍。
最近喺韓國節目《 Show Champion》中， BoA表演跳舞，仲攞埋第 1名，唱得跳得，佢玩晒！（網上圖片）
自爆戀圈中人
BoA新碟《 Only One》在韓國仍未公布銷量，但於美國 Billboard嘅「 K-pop 100」榜佔第 3，被 SISTAR嘅《 Lovin U》壓住。
BoA由 14歲加入樂壇後，一直好似隻牛咁係咁做，冇時間拍拖，但最近她上 KBS Cool FM電台節目時，竟自爆曾經拍拖，最後一次戀情原來是 3年前的事，佢仲爆對方是圈中人，雖然 BoA死都唔肯開名，但就好怕醜咁話同對方主要在放假時拍拖，平時就用電話跟短訊維繫感情，不過點解分手就封口唔講。不過 BoA坦白承認自己貪靚仔：「以前我多數着重男朋友外形， 𠵱家揀男友，唔只要靚仔，仲要高大。」話晒 BoA係天后，男友梗係要有番咁上下靚仔先襯得起佢。
阿哥都猛料
BoA親大佬權順暄，曾於韓國推出多隻鋼琴古典名曲精選集，於藝術界非常出名。
原名權寶雅的 BoA，已貴為韓國天后，而她的哥哥權順暄一樣咁猛料。本身是鋼琴家的權順暄，唔只畢業於首爾大學音樂系，還取得該大學的碩士研究生學位，由於琴藝出色，最近更被首爾綜合藝術大學聘用，擔任鋼琴系教授。韓國 K-pop界同古典音樂界都被佢兩兄妹玩晒。 
留言列表
