FACE weekly
低俗百科 彭浩翔
原是免費網劇
彭導喜歡寫完劇本，用不着的戲位就留在下套用，「《低》本有幕講導演兼職賭檔，其實就係當時拍《買兇拍人》時寫落冇用的。」
要令粵語大方傳播，最好係免費，「想網劇方式播放，但搵贊助商時，佢哋考慮到商業因素，想加普通話版。」即時離開彭浩翔原意，結果《低俗喜劇》被擱置近一年多，「要放棄 13億國內市場、又要放棄香港 18歲以下市場，邊有人肯投資？」最終由太陽文化娛樂投資 800萬開戲，「心諗咁夠薑，好，我就碌晒人情咭， 12日內搵盡朋友如 Fiona、千嬅等撐場。」不過冇咁多 budget，就算某大星話到明免費拍都要 say no，「因為期好趕，拍的話要另開一隊 crew。唔講邊個星喇，下套你就知。」 12日工作天平了彭導於'07有 Eason、余文樂客串的《破事兒》的工作時間，但票房贏 4倍有多！
曾志偉是繆思
鄭中基戲中飾演的廣西人暴龍，粗口絕對唔係爆肚，彭導有研究過，「廣州人同我哋粗口唔同，我哋用 X佢哋用 Y。」喂，再講就要三級，入場自己睇啦！
彭浩翔電影，粗口橫飛、愈禁忌愈要講，《買兇拍人》、《大丈夫》真正笑死人，及後《公主復仇記》、《春嬌與志明》講愛情，講後生仔愛一腳踏兩船，對白夭心夭肺，中晒仔口味。今天 800萬成本《低俗喜劇》，擺明賺到笑兼贏口碑，「十幾歲去金聲戲院睇曾志偉套《小小小警察》，啲爛 gag笑到後面個古惑仔踢凳，那時立志要拍到笑×到踢凳電影。」爛 gag如「唔好彎低身執番梘」、連爆廿句粗口，斯文友謝絕入場，「年幾前廣東地區禁止粵語節目廣播，我在微博係咁嘈，這是限制方言傳播，要令粵語大方傳播，就係拍套最草根、最搞笑的戲，所以請大家放開禁忌包袱。」
搣甩 DaDa大眼仔
戲中有幕 DaDa冇濃妝冇大眼 con.，淨着件單薄背心凸點，「屋企都要濃妝咪犯駁囉！」細心夠，亦請男觀眾食冰淇淋！
市面如此多模，為何偏要找陳靜（ DaDa）演「爆炸糖」一角？「上年寫《愛的地下教育》，出版社要出一個讀音版，找來 DaDa讀稿。之後聽番，仆×喇，點會咁多懶音？」雖然覺得佢上套戲演得一般，卻覺得 DaDa可以做一個好演員，「我直覺覺得佢可以演到戲。」不少人「叫醒」彭導咪後悔，「咁樣好唔公平，因為一個演員，好被當時所演的限制，最緊要肯教肯試。」彭導在《春嬌與志明》找 黄曉明演搞笑一角，大受好評就是一例。同新人合作，最緊要找其特性，「 DaDa既然咁童顏巨乳，就要她純真一面，開戲首天，我要求她除低大眼 con.同假眼睫毛。」耐性同樣要緊，「試過 NG無數次，不過 DaDa自己都好有要求，頭兩天演到喊，因為怕背唔到對白，連累收工。」愚子可教也！
後記 不會拍《低俗喜劇 2》
我問彭導會唔會食住個勢，開拍《低俗喜劇 2》？「唔會喇，套戲冇《春嬌與志明》開拍第 2集的空間。反而同鄭中基、 DaDa第一次合作好開心，開拍新戲的話，有再合作的可能性。」男觀眾繼續有眼福！ 
留言列表
